អ្នកវិនិយោគជប៉ុនជាច្រើនកំពុងចាប់អារម្មណ៍ចង់មកវិនិយោគរកស៊ីនៅក្នុងប្រទេសកម្ពុជា។ ជាមួយនឹងការអះអាងដូច្នេះ សមាគមជប៉ុន-កម្ពុជាក៏សន្យាថា នឹងជួយជំរុញវិនិយោគិនជប៉ុនបន្ថែមទៀត ដើម្បីឱ្យមកវិនិយោគរកស៊ីនៅកម្ពុជា។
លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម។ (រូបថត៖ dap.com.khmer)
លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម លើកទឹកចិត្ត ឲ្យក្រុមហ៊ុនជប៉ុន ធ្វើការវិនិយោគបន្ថែមទៀត នៅកម្ពុជា ជាពិសេស ក្នុងវិស័យឧស្សាហកម្ម និងកែច្នៃផលិតផល កសិកម្ម ។នេះបើយោងតាមគេហទំព័រ ហ្វេសប៊ុករបស់ ក្រសួងពាណិជ្ជកម្ម ។
ក្នុងជំនួបពិភាក្សាការងារជាមួយ សមាគមធុរកិច្ចជប៉ុននៃកម្ពុជា (JBAC) នៅថ្ងៃទី២ ខែកក្កដា ឆ្នាំ២០២០ លោក ប៉ាន សូរស័ក្ដិ រំលឹកថា តាមរយៈការអនុវត្តគោលនយោបាយ ក្រសួងពាណិជ្ជកម្ម បានដឹកនាំការចរចាកិច្ចព្រមព្រៀង ពាណិជ្ជកម្មសេរីក្នុងតំបន់ និងទ្វេភាគី ដោយក្នុងនោះ កិច្ចព្រមព្រៀងភាពជាដៃគូគ្រប់ជ្រុងជ្រោយតំបន់ (RCEP) ដែលកម្ពុជា និងជប៉ុនជាភាគី នឹងបញ្ចប់ និងឈានទៅរកការចុះហត្ថលេខាក្នុងឆ្នាំនេះ។
លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម ជួបជុំជាមួយតំណាងក្រុមហ៊ុនជប៉ុនមួយចំនួន។ (រូបថត៖ dap.com.khmer)
លោកបន្ដថា កិច្ចព្រមព្រៀង RCEP នឹងបង្កើតនូវទីផ្សារទូលំទូលាយសម្រាប់កម្ពុជា ហើយកម្ពុជាក៏កំពុងតែឈានទៅរកការធ្វើឧស្សាហនីយកម្មសេដ្ឋកិច្ចរបស់ខ្លួន ដើម្បីបង្កើតការងារ ក៏ដូចជាបង្កើតតម្លៃបន្ថែមសម្រាប់ផលិតផលក្នុងស្រុក។
លោកមានប្រសាសន៍ថា «លើកទឹកចិត្តឲ្យក្រុមហ៊ុនជប៉ុនធ្វើការវិនិយោគបន្ថែមនៅកម្ពុជា ជាពិសេសក្នុងវិស័យឧស្សាហកម្ម និងកែច្នៃផលិតផលកសិកម្ម ដើម្បីទាញយកផល ប្រយោជន៍ ពីកិច្ចព្រមព្រៀងនេះ»។
ជាការឆ្លើយតប សមាគម JBAC បានទទួលយកសំណើរ ក្រសួងពាណិជ្ជកម្ម ហើយក៏បានជម្រាបថា ក្រុមហ៊ុនជប៉ុននៅតែមានបំណងពង្រីក និងមកវិនិយោគ បន្ថែមនៅកម្ពុជា ហើយសមាគមនឹងប្រឹងប្រែងឲ្យអស់ពីសមត្ថភាព ដើម្បីទាក់ទាញ វិនិយោគិនទាំងនោះមកកម្ពុជា ។
ជប៉ុន គឺជាប្រទេសវិនិយោគធំមួយនៅក្នុងចំណោមប្រទេសវិនិយោគសំខាន់ៗនៅកម្ពុជា។ ចំណែកប្រទេសដែលវិនិយោគធំបំផុតនៅកម្ពុជាវិញ គឺប្រទេសចិន។ គម្រោងវិនិយោគមកពីប្រទេសចិនស្មើនឹង៣៥ភាគរយ នៃគម្រោងវិនិយោគមកពីបរទេសសរុបចាប់ពីឆ្នាំ២០១៦ដល់ឆ្នាំ ២០១៩នេះ។ ក្នុងនោះ ទឹកប្រាក់វិនិយោគពីប្រទេសចិនមានចំនួន៧,៩ពាន់លានដុល្លារអាមេរិកនៅក្នុងគម្រោងវិនិយោគបរទេសសរុបចំនួន២២ពាន់លានដុល្លារសម្រាប់កម្ពុជា។ នេះបើតាមក្រុមប្រឹក្សាអភិវឌ្ឍកម្ពុជា (CDC)៕
（បកប្រែដោយឌីណា）
មតិពីមិត្តអ្នកអាន