របាយការណ៍ ស្ដីអំពីចក្ខុវិស័យអភិវឌ្ឍន៍អាស៊ីឆ្នាំ២០២០ របស់ធនាគារអភិវឌ្ឍន៍អាស៊ី ដែលបានចេញផ្សាយនៅក្នុងខែមិថុនានេះ បានឲ្យដឹងថា ប្រទេសកំពុងអភិវឌ្ឍន៍នៅអាស៊ីឬហៅថា Developing Asia ដែលមានប្រទេសចំនួន៧ រួមមាន បង់ក្លាដេស កម្ពុជា ឡាវ ម៉ុងហ្គាលី មីយ៉ាន់ម៉ា ណេប៉ាល់ និងស្រីលង្ការនោះ នៅឆ្នាំ២០២០នេះ ប្រទេសទាំងនេះ នឹងរក្សាបានកំណើនសេដ្ឋកិច្ចតិចតួចប៉ុណ្ណោះ ត្រឹមតែ ០,១% តែនៅឆ្នាំ២០២១ នឹងកើនដល់ ៦,២% ខណៈដែលបណ្ដាប្រទេស តំបន់អាស៊ីអាគ្នេយ៍វិញ នឹងមានសេដ្ឋកិច្ចដាំក្បាលចុះ -២,៧% នៅឆ្នាំ២០២០នេះ តែនឹងកើនឡើងដល់ ៥,២% វិញ នៅឆ្នាំ២០២១។
រូបថតតំណាង។
ធនាគារអភិវឌ្ឍន៍អាស៊ី (ADB) បានចេញរបាយការណ៍ព្យាករថ្មីចុងក្រោយមួយរបស់ខ្លួន ដោយបានព្យាករថា សេដ្ឋកិច្ចរបស់ប្រទេសកំពុងអភិវឌ្ឍន៍នៅអាស៊ី (Developing Asia) នៅឆ្នាំ២០២០នេះ អាចនឹងរក្សាបានកំណើនត្រឹមតែ ០,១% ប៉ុណ្ណោះ ដែលអត្រាកំណើននេះ គឺមានកម្រិតទាបបំផុតមិនធ្លាប់ក្នុងរយៈពេល៥៩ឆ្នាំចុងក្រោយនេះ។ ក្នុងនោះដែរ សេដ្ឋកិច្ចកម្ពុជា ក៏ត្រូវបានធនាគារនេះ ព្យាករដែរថា នឹងមានការធ្លាក់ចុះ ពោលគឺនឹងមាន -៥,៥% នៅឆ្នាំនេះ តែអាចនឹងកើនឡើងដល់ ៥,៩% នៅឆ្នាំឆ្នាំ២០២១។
របាយការណ៍ ស្ដីអំពីចក្ខុវិស័យអភិវឌ្ឍន៍អាស៊ីឆ្នាំ២០២០ របស់ធនាគារអភិវឌ្ឍន៍អាស៊ី ដែលបានចេញផ្សាយនៅក្នុងខែមិថុនានេះ បានឲ្យដឹងថា ប្រទេសកំពុងអភិវឌ្ឍន៍នៅអាស៊ីឬហៅថា Developing Asia ដែលមានប្រទេសចំនួន៧ រួមមាន បង់ក្លាដេស កម្ពុជា ឡាវ ម៉ុងហ្គាលី មីយ៉ាន់ម៉ា ណេប៉ាល់ និងស្រីលង្ការនោះ នៅឆ្នាំ២០២០នេះ ប្រទេសទាំងនេះ នឹងរក្សាបានកំណើនសេដ្ឋកិច្ចតិចតួចប៉ុណ្ណោះ ត្រឹមតែ ០,១% តែនៅឆ្នាំ២០២១ នឹងកើនដល់ ៦,២% ខណៈដែលបណ្ដាប្រទេស តំបន់អាស៊ីអាគ្នេយ៍វិញ នឹងមានសេដ្ឋកិច្ចដាំក្បាលចុះ -២,៧% នៅឆ្នាំ២០២០នេះ តែនឹងកើនឡើងដល់ ៥,២% វិញ នៅឆ្នាំ២០២១។
តាមរបាយការណ៍របស់ ADB បើពិនិត្យទៅលើការព្យាករសេដ្ឋកិច្ចរបស់ប្រទេសកម្ពុជានៅ ឆ្នាំ២០២០នេះ អាចនឹងមាន -៥,៥% ខណៈដែលការព្យាករពីខែមេសាថា មានកំណើន ២,៣%។ ទោះយ៉ាងណា បើតាមការព្យាករដដែលនេះ នៅឆ្នាំ២០២១ សេដ្ឋកិច្ចកម្ពុជា អាចនឹងហក់កើនខ្ពស់ឡើងវិញដល់ ៥,៩%។
ដោយឡែក បើយើងមើលទៅលើសេដ្ឋកិច្ចនៅតំបន់អាស៊ីអាគ្នេយ៍ ដែលមានប្រទេសចំនួន ១១ ដែលក្នុងនោះ រួមមានប្រទេសអាស៊ានទាំង១០ រួមជាមួយនឹងប្រទេស ទីម័រលេស្ទេនោះ ឃើញថា នៅឆ្នាំ២០២០នេះ សេដ្ឋកិច្ចប្រទេសថៃត្រូវបានព្យាករថា នឹងមានការធ្លាក់ចុះខ្លាំងជាងគេដល់ទៅ -៦,៥% បន្ទាប់មកគឺសិង្ហបុរីមាន -៦% និងកម្ពុជាយើងមាន -៥,៥%។
បើតាមការគូសបញ្ជាក់របសស់ធនាគារ ADB ការរក្សាបានកំណើនតិចតួចរបស់ប្រទេសកំពុងអភិវឌ្ឍន៍នៅអាស៊ីនៅឆ្នាំ២០២០នេះ ក៏ដោយសារតែវិធានការគ្រប់គ្រងការទប់ស្កាត់ការឆ្លងរីករាលដាល និងការដោះស្រាយបញ្ហាដែលបណ្ដាលមកពីមេរោគកូវីដ-១៩ ដោយវាបានធ្វើឲ្យរាំងស្ទះដល់សកម្មភាពសេដ្ឋកិច្ច និងការចុះអន់ថយនៃតម្រូវការខាងក្រៅ។
លោក យ៉ាស៊ុយយ៉ូគី សាវ៉ាដា ប្រធានសេដ្ឋវិទូនៃធនាគារ ADB បានឲ្យដឹងថា សេដ្ឋកិច្ចនៅក្នុងតំបន់អាស៊ី និងប៉ាស៊ីហ្វិក នឹងបន្តទទួលរងគ្រោះ ដោយសារតែជំងឺរាតត្បាតរ៉ាំរ៉ៃនៅឆ្នាំនេះ បើទោះបីជាការចាក់សោរបិទទ្វារប្រទេសត្រូវបានបន្ធូរបន្ថយជាបណ្ដើរៗ និងការជ្រើសរើសសកម្មភាពសេដ្ឋកិច្ចឡើងវិញ នៅក្នុងសេណារីយ៉ូថ្មីធម្មតាក៏ដោយ។ ប្រធានសេដ្ឋវិទូរូបនេះបានបញ្ជាក់ទៀតថា ខណៈដែលយើងមើលឃើញពីទស្សនវិស័យកំណើនខ្ពស់សម្រាប់តំបន់ នៅក្នុងឆ្នាំ២០២១ នោះក៏ដោយសារតែតួលេខធ្លាក់ចុះនៅឆ្នាំនេះដែរ ហើយនេះ ក៏នឹងមិនមានការងើបឡើងវិញក្នុងទម្រង់ជាអក្សរ V នោះដែរ។ រដ្ឋាភិបាលគួរតែអនុវត្តវិធានការណ៍គោលនយោបាយដើម្បីកាត់បន្ថយផលប៉ះពាល់អវិជ្ជមានពីវិបត្តិកូវីដ-១៩ ហើយធានាឲ្យបានថានឹងមិនមានការឆ្លងរីករាលដាលជារលកថ្មីទៀតនោះទេ៕（សរុបដោយវិច្ឆិកា）
មតិពីមិត្តអ្នកអាន