ក្រុមហ៊ុនជប៉ុន Panasonic ផ្អាកធ្វើពាណិជ្ជកម្មជាមួយ Huawei

ស្តង់ពិព័រណ៍របស់ Panasonic (រូបថតៈ TeleTrader)

ក្រុមហ៊ុន​ជប៉ុន​ប្រកាសជំហររបស់ខ្លួន ​គឺក្រោយមួយថ្ងៃដែលក្រុមហ៊ុនទូរសព្ទធំៗ ចំនួន​៤ របស់អង់គ្លេស និងជប៉ុន បានសម្រេចពន្យារពេលដាក់ឱ្យប្រើប្រាស់កម្មវិធីអ៊ីនធឺណិត ជំនាន់ទី៥ របស់ក្រុមហ៊ុន Huawei។​

អ្នកនាំពាក្យឱ្យក្រុមហ៊ុន Panasonic បានឲ្យដឹងថា ក្រុមហ៊ុនលោកសម្រេចផ្អាករាល់ប្រតិបត្តិការជាមួយក្រុមហ៊ុន​ចិន Huawei គ្រប់ផ្នែកទាំងអស់។​ លោករូបនេះបានឲ្យដឹងថែមទៀតថា ក្រុមហ៊ុនលោកមានទំនាក់ទំនងជាមួយក្រុមហ៊ុន Huawei លើផ្នែកផ្គត់ផ្គង់សម្ភារៈអេឡិចត្រូនិកខ្លះ ប៉ុន្តែ លោកមិនបញ្ជាក់លម្អិតទេ។​

ទោះយ៉ាងណា សេចក្តីសម្រេចអាមេរិកនេះហាក់ដូចជាយុទ្ធនាការមួយដែលប្រឆាំងក្រុមហ៊ុនចិន Huawei ដែលចាប់ផ្តើមដោយក្រុមអ៊ិនធឺណិតធំលំដាប់ពិភពលោករបស់អាមេរិក​ Google ដែលប្រតិបត្តិការលើប្រព័ន្ធទូរសព្ទទំនើបលើពិភព លោក។​ បញ្ហាស្រដៀងគ្នាជាមួយអាមេរិកនេះ ក៏មានការលើកឡើងយ៉ាងចម្រូងចម្រាស់ផងដែរនៅប្រទេសអង់គ្លេស ដែលមានការលេចធ្លាយព័ត៌មានថា ក្រុមប្រឹក្សាសន្តិសុខជាតិបានស្នើទៅរដ្ឋាភិបាលកាលពីខែមុនឱ្យរឹតបន្តឹងការប្រើប្រាស់ អ៊ិនធឺណិតជំនាន់ទី៥របស់ក្រុមហ៊ុន Huawei។​

ថ្វីត្បិតដូច្នេះ ក្រុមហ៊ុន Huawei បានថ្លែងថា ការដាក់សម្ពាធនេះគឺជារឿងគួរឱ្យសោកស្តាយ ហើយថា បញ្ហាទាំងនេះជារឿងនយោបាយ ហើយ​ពិតជាអាចដោះស្រាយបាន៕​

（សរុបព័ត៌មាន ដោយ ស្រីព្រេជ）

（សរុបព័ត៌មាន ដោយ ស្រីព្រេជ）