អតីតអគ្គលេខាធិការអង្គការសហប្រជាជាតិ លោក Kofi Annan ទទួលមរណភាពក្នុងវ័យ៨០ឆ្នាំ

ឮ

អតីតអគ្គលេខាធិារអង្គការសហប្រជាជាតិ លោក Kofi Anna (រូបថតៈ Getty)

ជាមួយគ្នានោះដែរ ថ្លែងនៅលើ Twitter ​អង្គការសហប្រជាជាតិបានបញ្ជាក់យ៉ាងខ្លីដូច្នេះថា៖« នៅថ្ងៃនេះយើងពិតមានការសោកស្ដាយជាទីបំផុត ដែលយើងបានបាត់បង់បុរស និងមេដឹកនាំដ៏អស្ចារ្យម្នាក់»។ លោក Kofi Annan កើតនៅប្រទេសហ្កាណា ក្នុងឆ្នាំ១៩៣៨ បានបម្រើការងារជាអគ្គលេខាធិការ UN ​ទី០៧ ពីឆ្នាំ១៩៩៧ ដល់ឆ្នាំ២០០៦។ មិនតែប៉ុណ្ណោះ លោកក៏ធ្លាប់ជា សមាជិកអង្គការ The Elders ដែលជាអង្គការមួយធ្វើការងារពាក់ព័ន្ធនឹងសិទ្ធិមនុស្សចាប់តាំងពីបង្កើតឡើងក្នុងឆ្នាំ២០០៧ ហើយ លោកបានក្លាយជាប្រធានអង្គការនេះនៅឆ្នាំ២០១៣។

លោក Kofi Annan ត្រូវបានគេ​ស្គាល់ថាជា អគ្គលេខាធិការអង្គការសហប្រជាជាតិមួយរូបដែលមាន​ឈ្មោះល្បីល្បាញខ្លាំងលើពិភពលោក ដោយសារចំណេះដឹង ភាពប៉ិនប្រសព្វ និងការប្រឹងប្រែង​ដើម្បីសន្តិភាពពិភពលោក។ លោកបានក្លាយជាម្ចាស់ពានរង្វាន់ណូបែលសន្តិ ភាពក្នុងឆ្នាំ ២០០១ និងបានទទួលការ​គាំទ្រខ្ពស់សម្រាប់ការដឹក​នាំអង្គការសហប្រជាជាតិ​ពីរអាណត្តិជាប់គ្នាពីឆ្នាំ ១៩៩៧ រហូតដល់ឆ្នាំ ២០០៦។ ពេលដឹក​នាំ​ស្ថាប័នអន្តររដ្ឋាភិបាលនេះ​ លោកព្យាយាមប្រយុទ្ធ​ដើម្បីសន្តិភាព និងដោះស្រាយបញ្ហា​ពិភពលោកជាច្រើនមានដូចជាអំពើ​ភេរវកម្ម សង្គ្រាមស៊ីវិល និងអំពើប្រល័យពូជសាស្ត្រ។ ​ជាក់ស្តែងវាមានដូចជា ព្រឹត្តិការណ៍​ក្រុមអាល់កៃដា​វាយប្រហារ​អាមេរិកក្នុងឆ្នាំ​ ២០០១ , អាមេរិកឈ្លានពាន​អ៊ីរ៉ាក់ឆ្នាំ ២០០៣ រួមជាទាំងការកើន​ឡើងនៃចលនាក្រុមភេរវជននិងក្រុមប្រដាប់អាវុធឥស្លាមជ្រុលនិយមនៅលើពិភពលោក​។
ចំណែកស្នាដៃធំបំផុតរបស់លោក ដែលគេចាំមិនភ្លេចនោះគឺ ការបង្កើតគោលការណ៍អន្តរគមន៍ក្នុងគោលដៅ​មនុស្សធម៌ (humanitarian intervention)។ គោលការណ៍នេះមានសារសំខាន់ក្នុងការធានាឲ្យមានការការពារប្រជាជនដែលរងគ្រោះថ្នាក់ដោយសារសង្គ្រាមឬការសម្លាប់រង្គាល ឬករណីប្រល័យពូជសាសន៍ជាដើម។

បន្ទាប់ពីចាកចេញពីតំណែងជាអគ្គលេខាធិការអង្គការសហប្រជាជាតិ​ក្នុងឆ្នាំ ២០០៦ លោក Kofi Annan នៅតែបន្តការងាររបស់ខ្លួនដើម្បីបុព្វហេតុ​សន្តិភាព និងមនុស្សជាតិសាកលផង។ លោកបានបន្តដឹកនាំមូលនិធិ Kofi Annan និងធ្វើជាប្រធាននៃអង្គការក្រុមព្រឹទ្ធាចារ្យដែល​ត្រូវបានបង្កើតឡើងដោយអតីតប្រធានាធិបតីអាហ្វ្រិក​ខាងត្បូងលោក Nelson Mandela ផងដែរ។

គួរបញ្ជាក់ថា លោក Kofi Annan មានកូនចំនួនបីនាក់៕

（សរុបព័ត៌មាន ដោយ ស្រីព្រេជ）

（សរុបព័ត៌មាន ដោយ ស្រីព្រេជ）