នារសៀលថ្ងៃទី ១៣ មីនា នៅទីក្រុងហាណូយ លោក Pham Minh Chinh នាយករដ្ឋមន្ត្រីវៀតណាម បានអញ្ជើញចូលរួមពិធីរំលឹកខួបលើកទី ៣០ នៃការបង្កើតភាពជាដៃគូធនាគារអភិវឌ្ឍន៍អាស៊ី (ADB)-វៀតណាម ដែលរៀបចំដោយធនាគារជាតិវៀតណាម។
 |
| លោក Pham Minh Chinh នាយករដ្ឋមន្ត្រីបានទទួលជួបលោក Masatsugu Asakawa ប្រធាន ADB ដែលកំពុងបំពេញទស្សនកិច្ចនៅវៀតណាម និងចូលរួមពិធីរំលឹកខួបលើកទី ៣០ នៃទំនាក់ទំនងភាពជាដៃគូវៀតណាម-ADB |
ក្នុងរយៈពេល ៣០ ឆ្នាំកន្លងមក (១៩៩៣-២០២៣) ទំនាក់ទំនងវៀតណាម-ADB ត្រូវបានពង្រឹង និងអភិវឌ្ឍជាបន្តបន្ទាប់។ ជាពិសេសគឺការគាំទ្រទាន់ពេលវេលា និងជាក់ស្តែងរបស់ ADB សម្រាប់វៀតណាមក្នុងការប្រយុទ្ធប្រឆាំងនឹងជំងឺរាតត្បាត Covid-19 ជំរុញការស្តារ និងអភិវឌ្ឍសេដ្ឋកិច្ចសង្គម បើកឱកាសសម្រាប់កិច្ចសហប្រតិបត្តិការពាណិជ្ជកម្ម និងវិនិយោគរវាងវៀតណាមជាមួយប្រទេសជុំវិញពិភពលោក។
ទឹកប្រាក់សរុបនៃជំនួយរបស់ ADB សម្រាប់វៀតណាម រហូតមកដល់បច្ចុប្បន្នសម្រេចបានជិត១៨ ពាន់លានដុល្លារអាមេរិកសម្រាប់កម្មវិធី និងគម្រោងប្រហែល ៦០០ ក្នុងវិស័យសំខាន់ៗជាច្រើនដូចជា កសិកម្ម តំបន់ជនបទ ការអប់រំ ការថែទាំសុខភាព ការដឹកជញ្ជូន ថាមពល ហេដ្ឋារចនាសម្ព័ន្ធទីក្រុង...។ ទន្ទឹមនឹងនោះ ADB បានឧបត្ថម្ភទឹកប្រាក់ចំនួន ៦.៤៥ ពាន់លានដុល្លារសម្រាប់ប្រតិបត្តិការពាណិជ្ជកម្មតាមរយៈធនាគារពាណិជ្ជនៅក្នុងប្រទេសវៀតណាម។
មានប្រសាសន៍ក្នុងព្រឹត្តិការណ៍នេះ លោក Pham Minh Chinh នាយករដ្ឋមន្ត្រីបានថ្លែងអំណរគុណ និងវាយតម្លៃខ្ពស់ចំពោះការគាំទ្ររបស់ ADB សម្រាប់វៀតណាម ជាពិសេសក្នុងការអភិវឌ្ឍហេដ្ឋារចនាសម្ព័ន្ធ ការលុបបំបាត់ភាពអត់ឃ្លាន ការកាត់បន្ថយភាពក្រីក្រ ការអប់រំ និងការអភិវឌ្ឍសុខភាព...ជាពិសេសនៅតំបន់ដាច់ស្រយាល ព្រំដែន និងកោះ។ល។ ព្រមទាំងជំរុញ និងបំផុសគំនិតដៃគូផ្សេងទៀតក្នុងកិច្ចសហប្រតិបត្តិការ និងគាំទ្រការអភិវឌ្ឍរបស់វៀតណាម។
លោក Pham Minh Chinh បានលើកឡើងពីរាល់មេរៀនក្នុងកិច្ចសហប្រតិបត្តិការ ការវិភាគបរិបទនៃស្ថានភាពពិភពលោក ព័ត៌មានអំពីសមិទ្ធផលអភិវឌ្ឍន៍លេចធ្លោមួយចំនួនរបស់វៀតណាមបន្ទាប់ពីរយៈពេលជាង ៣៥ ឆ្នាំនៃការផ្លាស់ថ្មី ក៏ដូចជានៅឆ្នាំ ២០២៣ និងអំពីមូលដ្ឋានគ្រឹះអភិវឌ្ឍន៍របស់វៀតណាម។
លោកនាយករដ្ឋមន្ត្រីបានសង្កត់ធ្ងន់ថា ក្នុងរយៈពេល ៣០ ឆ្នាំកន្លងទៅ វៀតណាម និង ADB បានសហការគ្នាប្រកបដោយប្រសិទ្ធភាព លោកសង្ឃឹមថា ក្នុងរយៈពេល ៣០ ឆ្នាំខាងមុខ កិច្ចសហប្រតិបត្តិការរវាងវៀតណាម និង ADB នឹងកាន់តែមានប្រសិទ្ធភាពក្នុងស្មារតី "ផលប្រយោជន៍រួម ហានិភ័យរួម"។
* គួរឱ្យរំលឹកដែរថា នារសៀលថ្ងៃដដែល លោក Pham Minh Chinh នាយករដ្ឋមន្ត្រីបានទទួលជួបលោក Masatsugu Asakawa ប្រធាន ADB ដែលកំពុងបំពេញទស្សនកិច្ចនៅវៀតណាម និងចូលរួមពិធីរំលឹកខួបលើកទី ៣០ នៃទំនាក់ទំនងភាពជាដៃគូវៀតណាម-ADB៕
មតិពីមិត្តអ្នកអាន