នាព្រឹកថ្ងៃទី៦ ខែមីនា នៅទីក្រុង Melbourne ប្រទេសអូស្ត្រាលី លោក Pham Minh Chinh នាយករដ្ឋមន្ត្រីវៀតណាម បានជួបសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងឱកាសអញ្ជើញចូលរួមកិច្ចប្រជុំកំពូលពិសេសអបអរសាទរខួបលើកទី ៥០ នៃទំនាក់ទំនងអាស៊ាន-អូស្ត្រាលី។
 |
| លោក Pham Minh Chinh ជួបជាមួយសម្តេចមហាបវរធិបតី ហ៊ុន ម៉ាណែត |
លោក Pham Minh Chinh នាយករដ្ឋមន្ត្រី អបអរសាទរចំពោះកម្ពុជាដោយបានរៀបចំការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ ប្រកបដោយជោគជ័យ ហើយចាត់ទុកថា លទ្ធផលនៃការបោះឆ្នោតបន្តបញ្ជាក់ពីតួនាទីដឹកនាំរបស់គណបក្សប្រជាជនកម្ពុជានៅក្នុងកម្ពុជា។ លោក Pham Minh Chinh ក៏បានអបអរសាទរចំពោះសមិទ្ធផលអភិវឌ្ឍន៍សេដ្ឋកិច្ចដែលកម្ពុជាសម្រេចបាននាពេលកន្លងមក។
នាយករដ្ឋមន្ត្រីទាំងពីរបានសម្តែងនូវសេចក្តីរីករាយចំពោះការអភិវឌ្ឍប្រកបដោយស្ថិរភាពនៃទំនាក់ទំនងសហប្រតិបត្តិការរវាងប្រទេសទាំងពីរនៅពេលកន្លងមក ហើយថ្នាក់ដឹកនាំនៃប្រទេសទាំងពីររក្សាដំណើរទស្សនកិច្ច និងជំនួបជាន់ខ្ពស់ យន្តការសហប្រតិបត្តិការទ្វេភាគីបន្តមានប្រសិទ្ធភាព។ នាយករដ្ឋមន្ត្រីទាំងពីរបានឯកភាពលើកកំពស់ប្រសិទ្ធភាពនៃកិច្ចសហប្រតិបត្តិការសេដ្ឋកិច្ច-ពាណិជ្ជកម្ម-វិនិយោគ ជំរុញការតភ្ជាប់រវាងសេដ្ឋកិច្ចទាំងពីរ ជាពិសេសតភ្ជាប់ចរាចរណ៍ ដើម្បីបង្កើតមូលដ្ឋាន និងកម្លាំងចលករថ្មីសម្រាប់ការពង្រឹងកិច្ចសហប្រតិបត្តិការលើវិស័យផ្សេងទៀត បន្តសហការ និងអនុវត្តប្រកបដោយប្រសិទ្ធភាពនូវកិច្ចព្រមព្រៀង និងយន្តការស្ដីពីការពារជាតិ និងសន្តិសុខដែលមានស្រាប់ ខិតខំដោះស្រាយ ១៦% នៃការខណ្ឌសីមា និងបោះបង្គោលព្រំដែនដែលមិនទាន់សម្រេច ដើម្បីកសាងព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍប្រកបដោយចីរភាពរវាងប្រទេសទាំងពីរ។
សម្តេចមហាបវរធិបតី ហ៊ុន ម៉ាណែត បានឯកភាពបន្តយកចិត្តទុកដាក់ និងបង្កើតលក្ខខណ្ឌអំណោយផលសម្រាប់ជនជាតិដើមកំណើតវៀតណាមនៅកម្ពុជា មានស្ថិរភាពក្នុងជីវភាពរស់នៅ និងដើរតួជាស្ពានតភ្ជាប់មិត្តភាពរវាងប្រទេសទាំងពីរ។ ទន្ទឹមនឹងនោះ បង្កើតលក្ខខណ្ឌអំណោយផលសម្រាប់ធុរកិច្ចវៀតណាមដែលកំពុងវិនិយោគ និងធ្វើអាជីវកម្មនៅកម្ពុជា ហើយស្នើឲ្យបង្កើនជើងហោះហើររវាងប្រទេសទាំងពីរ ដើម្បីបង្កើនទំនាក់ទំនងទេសចរណ៍ និងតភ្ជាប់ពាណិជ្ជកម្ម។
នាយករដ្ឋមន្ត្រីទាំងពីរបានឯកភាពបន្តសហប្រតិបត្តិការយ៉ាងជិតស្និទ្ធរវាងប្រទេសទាំងពីរ ក៏ដូចជាជាមួយឡាវ និងថៃ ដើម្បីតភ្ជាប់ចរាចរណ៍ តភ្ជាប់ទេសចរណ៍ និងទាញយកសក្តានុពលទេសចរណ៍របស់បណ្ដាប្រទេស។
ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ លោក Pham Minh Chinh បានជូនពរសម្តេចមហាបវរធិបតី ហ៊ុន ម៉ាណែត ថ្នាក់ដឹកនាំជាន់ខ្ពស់ និងប្រជាជនកម្ពុជាជួបតែសេចក្តីសុខ សេចក្តីចម្រើន៕
មតិពីមិត្តអ្នកអាន