នៅព្រឹកថ្ងៃទី១៩ ខែមិថុនា នាយករដ្ឋមន្ត្រីកម្ពុជា សម្ដេចតេជោ ហ៊ុនសែន បានអញ្ជើញជួបជាមួយឯកឧត្តម វ៉ានកាង អនុប្រធានសភាប្រឹក្សាប្រជាជនចិន និងជាអតីតរដ្ឋមន្ត្រី ក្រសួងវិទ្យាសាស្ត្រ និងបច្ចេកវិទ្យាចិន នៅវិមានសន្តិភាព។
ទិដ្ឋភាពនៃជំនួប
បើតាមប្រសាសន៍ ឯកឧត្តម អ៊ាង សុផល្លែត ជំនួយការសម្តេចតេជោ បានប្រាប់ឲ្យដឹងថា ឯកឧត្តម វ៉ាន់ កាង មានប្រសាសន៍ថា នេះជាលើកទី១ហើយ ដែលឯកឧត្តម បានមកកាន់កម្ពុជា ហើយបានឃើញកម្ពុជា មានការអភិវឌ្ឍរបស់កម្ពុជា។
ឯកឧត្ដម វ៉ាន់ កាង បានគោរពជម្រាបជូន សម្តេចតេជោថា ក្នុងដំណើរទស្សនកិច្ចរបស់ឯកឧត្តម មកកាន់កម្ពុជានៅពេលនេះ គឺមានទិសដៅពីរ, ទីមួយគឺដើម្បីសំដែងការគោរព ជូនចំពោះសម្ដេចតេជោ និងទី២ គឺដើម្បីពង្រឹងនូវ កិច្ចសហប្រតិបត្តិការ រវាងប្រទេសទាំងពីរ ជាពិសេសលើវិស័យវិទ្យាសាស្ត្រ និងបច្ចេកវិទ្យា។ ក្នុងឱកាសនោះ ឯកឧត្តម បានគោរពស្នើសុំទស្សនៈរបស់សម្ដេចតេជោ លើកិច្ចសហប្រតិបត្តិការ លើវិស័យវិទ្យាសាស្ត្រ និងបច្ចេកវិទ្យានេះ។
ជាការឆ្លើយតប សម្តេចតេជោ បានមានប្រសាសន៍ថា កិច្ចសហប្រតិបត្តិការ លើវិស័យវិទ្យាសាស្ត្រ និងបច្ចេកវិទ្យា គឺចាំបាច់ត្រូវការ ធនធានមនុស្ស ការស្រាវជ្រាវ និងជំរុញការអភិវឌ្ឍ, ក្នុងយុគសម័យឌីជីថល ឬក៏ក្នុងសម័យបដិវត្តន៍ឧស្សាហកម្មទី៤នេះ គឺចាំបាច់ណាស់ ត្រូវមានការសិក្សា ការស្រាវជ្រាវ និងការប្រើប្រាស់បច្ចេកវិទ្យាព័តមានវិទ្យា និងវិទ្យាសាស្ត្រដទៃទៀត។
ទិដ្ឋភាពនៃជំនួប
ក្នុងន័យនេះ សម្ដេចតេជោ បានជម្រាបជូនឯកឧត្តម វ៉ាន់ កាង ថា កម្ពុជាកំពុងតែតម្រង់ទិសរបស់ខ្លួន ដើម្បីធ្វើយ៉ាងណា ឲ្យសម្របស្របទៅតាមចរន្ត នៃយុគសម័យឌីជីថល និងបដិវត្តន៍ឧស្សាហកម្មទី៤នេះ។ សម្ដេចតេជោ ក៏បានមានប្រសាសន៍ផងដែរថា កម្ពុជាមានសាលាសម្រាប់បណ្ដុះបណ្ដាល លើវិស័យនេះ ប៉ុន្តែទោះជាយ៉ាងណាក៏ដោយ ក៏នៅតែត្រូវការការអភិវឌ្ឍលើវិស័យនេះថែមទៀត។
ក្នុងឱកាសនោះ សម្ដេចតេជោ ស្នើសុំឲ្យភាគីចិន ជួយសហការជាមួយកម្ពុជា លើបណ្ដុះបណ្ដាលធនធានមនុស្ស វិស័យស្រាវជ្រាវ ក៏ដូចជាវិស័យដទៃទៀត ពាក់ព័ន្ធទៅនឹងបច្ចេកវិទ្យា និងវិទ្យាសាស្ត្រនេះ។ សម្ដេចក៏ឆ្លៀតឱកាសនេះដែរ បានស្នើសុំឲ្យឯកឧត្តម វ៉ាន់ កាង ធ្វើការសហការជាមួយនឹង រាជបណ្ឌិត្យសភាកម្ពុជា, ក្រសួងអប់រំ ក៏ដូចជាក្រសួងការងារ និងបណ្តុះបណ្តាលវិជ្ជាជីវៈកម្ពុជា ផងដែរ៕
（ប្រភព៖ cnc.com.kh）
មតិពីមិត្តអ្នកអាន