សេដ្ឋកិច្ចកម្ពុជាកំពុងងើបឡើងវិញជាបណ្តើរៗ

សេដ្ឋកិច្ចកម្ពុជា នៅតែមានកំណើនឡើងវិញ ទោះបី ពិភពលោកកំពុងប្រឈមមុខនឹងវិបត្តិប្រេងឥន្ធនៈ

ធនាគារអភិវឌ្ឍន៍អាស៊ី៖ សេដ្ឋកិច្ចកម្ពុជានឹងរីកចម្រើនយ៉ាងឆាប់រហ័សនៅឆ្នាំ ២០២២

សម្ដេចតេជោ ហ៊ុន សែន បានបញ្ជាក់ថា កម្ពុជាសម្រេចបានប្រសិទ្ធភាពក្នុងការប្រយុទ្ធប្រឆាំងនឹងជំងឺរាតត្បាត ដោយចាត់វិធានការទាន់ពេលវេលា ដូចជាការចាក់វ៉ាក់សាំងកូវីដ-១៩ ពេញលេញនៅទូទាំងប្រទេស។

ការអនុវត្តវិធានការខាងលើបានបង្កើតលក្ខខណ្ឌសម្រាប់កម្ពុជាក្នុងការបើកប្រទេសឡើងវិញ និងដំណើរការសេដ្ឋកិច្ចចាប់ពីថ្ងៃទី ១ ខែវិច្ឆិកា ឆ្នាំ ២០២១ ហើយរហូតមកដល់ពេលនេះ សេដ្ឋកិច្ចកំពុងងើបឡើងវិញជាលំដាប់។

នាយករដ្ឋមន្ត្រីកម្ពុជាបញ្ជាក់ថា សេដ្ឋកិច្ចកំពុងងើបឡើងវិញជាបណ្តើរៗ

នៅក្នុងឆ្នាំ ២០២០ ជំងឺកូវីដ-១៩ ដ៏កាចសាហាវនេះបានធ្វើឱ្យសេដ្ឋកិច្ចកម្ពុជាមានកំណើនអវិជ្ជមានដោយធ្លាក់ចុះ ៣,១% ដែលជាកំណើនអវិជ្ជមានលើកដំបូងក្នុងរយៈពេលជាង ២ ទសវត្សរ៍ ចុងក្រោយនេះ។ ដល់ឆ្នាំ ២០២១ សេដ្ឋកិច្ចកម្ពុជាបានកើនឡើង ៣% ហើយមានលទ្ធភាពនឹងកើនឡើងពី ៥% ឬ ៦% ក្នុងឆ្នាំ ២០២២ និង ២០២៣។

សម្ដេចតេជោ ហ៊ុន សែន បានមានប្រសាសន៍ថា ដើម្បីរក្សាកំណើនសេដ្ឋកិច្ចក្នុងរយៈពេលវែង រាជរដ្ឋាភិបាលនឹងវិនិយោគបន្ថែមទៀតលើវិស័យសុខាភិបាល គាំពារសង្គម ការអភិវឌ្ឍធនធានមនុស្ស សហគ្រាសធុនតូចនិងមធ្យម បច្ចេកវិទ្យាឌីជីថល និងការអភិវឌ្ឍបៃតង។

សន្និសីទ «ចក្ខុវិស័យប្រទេសកម្ពុជាឆ្នាំ២០២២» រៀបចំធ្វើឡើងក្រោមមូលបទ «ការស្តារកម្ពុជាឡើងវិញ៖ ការអភិវឌ្ឍប្រកបដោយនិរន្តរភាព បន្ទាប់ពីវិបត្តិជំងឺកូវីដ-១៩»។ សន្និសីទចក្ខុវិស័យប្រទេសកម្ពុជាឆ្នាំ២០២២នេះ មានការចូលរួមពីថ្នាក់ដឹកនាំប្រហែល ៤០០នាក់ មកពីថ្នាក់ជាតិ និងថ្នាក់ក្រោមជាតិនៃរាជរដ្ឋាភិបាលកម្ពុជា ស្ថានទូតបរទេស តំណាងបេសកកម្មការទូតបរទេសនានាប្រចាំកម្ពុជា ទីភ្នាក់ងារអង្គការសហប្រជាជាតិ វិស័យឯកជន ដៃគូអភិវឌ្ឍន៍ ស្ថាប័នអប់រំ វិទ្យាស្ថានសិក្សាស្រាវជ្រាវ និងអង្គការមិនមែនរដ្ឋាភិបាលជាតិ-អន្តរជាតិនៅប្រទេសកម្ពុជាផងដែរ។

សន្និសីទ «ចក្ខុវិស័យប្រទេសកម្ពុជា» គឺជាវេទិកាដ៏មានសារៈសំខាន់ប្រមូលផ្តុំអ្នកជំនាញ បើកកិច្ចពិភាក្សាលើប្រធានបទនានា ពាក់ព័ន្ធបញ្ហាសេដ្ឋកិច្ច និងសង្គម ដើម្បីជាធាតុចូលសម្រាប់ដោះស្រាយបញ្ហាប្រឈម និងស្វែងរកកាលានុវត្តភាពសម្រាប់ជំរុញដល់ការអភិវឌ្ឍនៅកម្ពុជា៕

kh.qdnd.vn