កិច្ចប្រជុំក្រុមប្រឹក្សាកីឡាសាកលវិទ្យាល័យអាស៊ាន លើកទី២៤ នឹងត្រូវរៀបចំលើកដំបូង នៅក្នុងប្រទេសកម្ពុជា ចាប់ពីថ្ងៃទី១០-១២ ខែមិថុនា ដើម្បីបូកសរុបលទ្ធផលការងារប្រចាំឆ្នាំ និងលើកទិសដៅអនុវត្តបន្ដ ជូនក្រុមប្រឹក្សាកីឡាសាកលវិទ្យាល័យអាស៊ាន ។
កម្ពុជា ត្រៀមធ្វើម្ចាស់ផ្ទះកិច្ចប្រជុំក្រុមប្រឹក្សាកីឡាសាកលវិទ្យាល័យអាស៊ាន លើកដំបូង ស្អែកនេះ
កិច្ចប្រជុំប្រចាំតំបន់នេះ នឹងធ្វើឡើងក្រោមវត្តមានលោក ស សុខា រដ្ឋលេខាធិការក្រសួងអប់រំ យុវជន និងកីឡា និងជាប្រធានសហព័ន្ធកីឡាសិស្សនិស្សិតកម្ពុជា ដោយមានការចូលរួមពីថ្នាក់ដឹកនាំក្រុមប្រឹក្សាកីឡាសាកលវិទ្យាល័យអាស៊ាន និងសមាជិកក្នុងតំបន់អាស៊ាន ដើម្បីពង្រឹងទំនាក់ទំនង បង្កើនចំណងមិត្តភាព សាមគ្គីភាព ស្វែងយល់អំពីប្រពៃណី វប្បធម៌ រវាងសមាជិកនៃប្រទេសក្នុងតំបន់អាស៊ានផងដែរ ។
បើតាមការបញ្ជាក់របស់មន្ដ្រីសហព័ន្ធកីឡាសិស្សនិស្សិតកម្ពុជា នេះគឺជាលើកទី១ ហើយក៏ជាមោទនកភាព សម្រាប់ការធ្វើម្ចាស់ផ្ទះកិច្ចប្រជុំប្រចាំតំបន់នេះដែរ ។ ឆ្លងតាមការប្ដូរវេនរបស់ក្រុមប្រឹក្សាកីឡាសាកលវិទ្យាល័យអាស៊ាន នៅថ្ងៃអនាគត កម្ពុជានឹងទទួលធ្វើជាម្ចាស់ផ្ទះការប្រកួតកីឡាសាកលវិទ្យាល័យអាស៊ាន(ASEAN University Games) ក្រោមការប្រគល់ភារកិច្ចរបស់ក្រុមប្រឹក្សាកីឡាសាកលវិទ្យាល័យអាស៊ាន ដោយសហការ និងមានការចូលរួមពីសមាជិកអាស៊ានទៀតផង ។
គួរដឹងថា ក្រោយបញ្ចប់កិច្ចប្រជុំក្រុមប្រឹក្សាកីឡាសាកលវិទ្យាល័យអាស៊ាន លើកទី២៤ ដែលគ្រោងធ្វើឡើងរយៈពេល ៣ថ្ងៃ នៅរាជធានីភ្នំពេញ ថ្នាក់ដឹកនាំក្រុមប្រឹក្សាកីឡាសាកលវិទ្យាល័យអាស៊ាន និងគណៈប្រតិ ដែលចូលរួមកិច្ចប្រជុំ ក៏មានគម្រោងធ្វើដំណើរទស្សនៈកិច្ច នៅសារៈមន្ទីរជាតិ និងតំបន់ទេសចរណ៍មួយចំនួន ជុំវិញរាជធានីភ្នំពេញ មុនធ្វើដំណើរនិវត្តន៍ចាកចេញពីប្រទេសកម្ពុជាផងដែរ៕
（ប្រភព៖ Freshnews）
មតិពីមិត្តអ្នកអាន