នារសៀលថ្ងៃទី ១៣ ខែមេសា នៅវិមានប្រធានរដ្ឋ ប្រធានរដ្ឋវៀតណាមលោក Nguyen Xuan Phuc បានទទួលជួបឯកអគ្គរដ្ឋទូត និងភារៈធារីនៃបណ្តាប្រទេសអាស៊ាន ដែលបានមកអបអរសាទរក្នុងឱកាសដែលលោកត្រូវបានបោះឆ្នោតជ្រើសតាំងជាប្រធានរដ្ឋនៃសាធារណរដ្ឋសង្គមនិយមវៀតណាម។
ប្រធានរដ្ឋ លោក Nguyen Xuan Phuc ទទួលជួបឯកអគ្គរដ្ឋទូតនិងភារធារីនៃបណ្តាប្រទេសអាស៊ានប្រចាំទីក្រុងហាណូយ |
លោក Nguyen Xuan Phuc ត្រូវបានបោះឆ្នោតជ្រើសតាំងជាប្រធានរដ្ឋវៀតណាម |
លោកប្រធានរដ្ឋ Nguyen Xuan Phuc រួមជាមួយឯកអគ្គរដ្ឋទូត និងភារៈធារីនៃបណ្តាប្រទេសអាស៊ាន។ (រូបថត៖ ក្រសួងការបរទេសវៀតណាម) |
ជំនួសមុខឯកអគ្គរដ្ឋទូត និងភារៈធារីនៃបណ្តាប្រទេសអាស៊ាន ប្រចាំទីក្រុងហាណូយ ឯកអគ្គរដ្ឋទូតប្រ៊ុយណេ លោក Pengiran Haji Sahari bin Pengiran Haji Salleh បានអបអរសាទរយ៉ាងកក់ក្តៅចំពោះលោកប្រធានរដ្ឋ Nguyen Xuan Phuc។ លោកឯកអគ្គរដ្ឋទូតបានវាយតម្លៃខ្ពស់ចំពោះការរួមវិភាគទានដ៏សំខាន់របស់វៀតណាមក្នុងការជំរុញការកសាងសហគមន៍អាស៊ាន ការគ្រប់គ្រងជំងឺរាតត្បាត និងការពង្រីកទំនាក់ទំនងការបរទេស។ លោកឯកអគ្គរដ្ឋទូតបានសម្តែងនូវក្តីជឿជាក់ថា លោកប្រធានរដ្ឋ Nguyen Xuan Phuc នឹងបន្តយកចិត្តទុកដាក់លើការជំរុញទំនាក់ទំនងសាមគ្គីភាព និងកិច្ចសហប្រតិបត្តិការក្នុងអាស៊ាន ក៏ដូចជារវាងវៀតណាម និងបណ្តាប្រទេសសមាជិកអាស៊ាន រួមចំណែកយ៉ាងសំខាន់ដល់កិច្ចសហប្រតិបត្តិការដើម្បីសន្តិភាព ស្ថិរភាពក្នុងតំបន់ និងនៅលើពិភពលោក។
លោកប្រធានរដ្ឋ Nguyen Xuan Phuc សង្កត់ធ្ងន់ថា ការចូលរួមកិច្ចសហប្រតិបត្តិការអាស៊ាន តែងតែជាអាទិភាពមួយក្នុងចំណោមអាទិភាពកិច្ចការបរទេសសំខាន់ៗរបស់វៀតណាម ហើយទំនាក់ទំនងមិត្តភាព និងកិច្ចសហប្រតិបត្តិការជាមួយប្រទេសជិតខាង និងមិត្តភក្តិក្នុងអាស៊ាន បានក្លាយជាមូលដ្ឋានគ្រឹះដ៏សំខាន់នៅក្នុងទំនាក់ទំនងទ្វេភាគីរបស់វៀតណាម។ លោកប្រធានរដ្ឋបានលើកច្បាស់ថា ភាពស្អិតរមួតនិងការឆ្លើយតប បានជួយអាស៊ានជំនះពុះពាររាល់ការលំបាកក្នុងឆ្នាំ ២០២០ ជាពិសេសផលប៉ះពាល់អវិជ្ជមាននៃជំងឺរាតត្បាត Covid-19 ទៅលើជីវិតសេដ្ឋកិច្ចសង្គមក្នុងតំបន់។
ទិដ្ឋភាពនៃកិច្ចជំនួប។ (រូបថត៖ ក្រសួងការបរទេសវៀតណាម) |
ក្នុងស្មារតីនេះ លោកប្រធានរដ្ឋ Nguyen Xuan Phuc បានសង្កត់ធ្ងន់លើស្មារតីសាមគ្គីភាពដ៏ជិតស្និទ្ធ និងកិច្ចសហប្រតិបត្តិការរវាងបណ្តាប្រទេសជាសមាជិកអាស៊ាន ព្រមទាំងបញ្ជាក់ថា តួនាទីជាមជ្ឈភាពរបស់អាស៊ានមានសារៈសំខាន់ ក្នុងការជំនះពុះពារការលំបាក និងបញ្ហាប្រឈម ដើម្បីឆ្ពោះទៅរកសហគមន៍អាស៊ានមួយដ៏រឹងមាំ និងសម្បូណ៌រុងរឿង។ លោកប្រធានរដ្ឋបានសន្យាថា ក្នុងឋានៈថ្មី លោកនឹងបន្តពូនជ្រំទំនាក់ទំនងមិត្តភាព និងកិច្ចសហប្រតិបត្តិការយ៉ាងជិតស្និទ្ធរវាងវៀតណាម និងបណ្តាប្រទេសសមាជិកអាស៊ាន អនុវត្តប្រកបដោយជោគជ័យនូវចក្ខុវិស័យសហគមន៍អាស៊ានឆ្នាំ ២០២៥ រួមចំណែកដល់ការអភិវឌ្ឍប្រកបដោយចីរភាពនៅអាស៊ីអាគ្នេយ៍។
លោកប្រធានរដ្ឋ Nguyen Xuan Phuc ក៏បានសម្តែងនូវគោលបំណងថា ឯកអគ្គរដ្ឋទូត និងភារៈធារីនឹងបន្តលើកកម្ពស់តួនាទីជាស្ពានដ៏សំខាន់របស់ខ្លួន រួមចំណែកបន្ថែមទៀតក្នុងការជំរុញទំនាក់ទំនងមិត្តភាព និងកិច្ចសហប្រតិបត្តិការរវាងវៀតណាម និងបណ្តាប្រទេសសមាជិកអាស៊ាន។
ក្នុងឱកាសបុណ្យចូលឆ្នាំថ្មីប្រពៃណីជាតិនៃប្រទេសកម្ពុជា ឡាវ មីយ៉ាន់ម៉ា ថៃ (បុណ្យជះទឹក) និងបុណ្យរ៉ាម៉ាដាននៃបណ្តាប្រទេសមូស្លីមនៅក្នុងអាស៊ាន លោកប្រធានរដ្ឋ Nguyen Xuan Phuc សូមជូនពរបវរសួស្តី សិរីមង្គល វិបុលសុខ មហាប្រសើរដ៏ថ្លៃថ្លាបំផុត ជូនចំពោះប្រជាជននៃប្រទេសទាំងអស់នេះ៕
មតិពីមិត្តអ្នកអាន