សិង្ហបុរីសាកល្បងមនុស្សយន្តបាញ់សម្លាប់មេរោគក្នុងកិច្ចប្រឹងប្រែងកម្ចាត់កូវីដ១៩

មនុស្សយន្តឈ្មោះ “XDBOT” គឺជាការបង្កើតរាងដូចប្រអប់មានកង់ ដែលអាចទៅដល់ទីតាំងឆ្គងៗដូចជានៅក្រោមតុនិងគ្រែ។

រ៉ូបូត ដែលសាងសង់ដោយអ្នកស្រាវជ្រាវនៅសាកលវិទ្យាល័យបច្ចេកវិជ្ជាណានយ៉ាង (NTU) របស់រដ្ឋទីក្រុងនេះ មានក្បាលថាមពលខ្ពស់សម្រាប់បាញ់ថ្នាំសម្លាប់មេរោគ ហើយអាចបាញ់សម្អាតលើផ្ទៃធំៗបានយ៉ាងឆាប់រហ័ស។

វាអាចបញ្ជាបានពីចម្ងាយដោយប្រើកុំព្យូទ័រយួរដៃឬថេប្លេត ដោយជួយកាត់បន្ថយហានិភ័យដល់អ្នកសម្អាតក្នុងការឆ្លងមេរោគកូរ៉ូណា ដែលបានសម្លាប់មនុស្សជាង ១៤០.០០០ នាក់នៅទូទាំងពិភពលោក។

លោកចេង អ៊ីមីង អ្នកវិទ្យាសាស្រ្តនៅសាកលវិទ្យាល័យ NTU ដែលដឹកនាំគម្រោងនេះ បាននិយាយថា “ដោយប្រើប្រាស់រ៉ូបូតថ្មីរបស់យើងពីចម្ងាយ ប្រតិបត្តិករជាមនុស្សអាចគ្រប់គ្រងបានយ៉ាងច្បាស់លាស់នូវដំណើរការនៃការបាញ់សម្អាតមេរោគ…ដោយមិនចាំបាច់ប៉ះពាល់ជាមួយនឹងផ្ទៃ”។

មនុស្សយន្ត XDBOT ត្រូវបានសាកល្បងនៅបរិវេណសាកលវិទ្យាល័យ NTU ហើយអ្នកបង្កើតវាសង្ឃឹមថានឹងធ្វើតេស្តវានៅតំបន់សាធារណៈនិងមន្ទីរពេទ្យច្រើនទៀត៕