អាស៊ានពង្រឹងកិច្ចសហប្រតិបត្តិការតាមចាប់ខ្លួន និងធ្វើបត្យាប័នឧក្រិដ្ឋជនតាមដីកាបង្គាប់

សន្និសីទថ្នាក់ដឹកនាំស្ថាប័នអនុវត្តច្បាប់នៃបណ្តាប្រទេសអាស៊ាន ស្តីពីកិច្ចសហប្រតិបត្តិការប្រយុទ្ធប្រឆាំងនឹងឧក្រិដ្ឋជនតាមដីកាបង្គាប់ ត្រូវបានដឹកនាំរៀបចំដោយក្រសួងនគរបាលវៀតណាម ក្រោមប្រធានបទ «ការពង្រឹងកិច្ចសហប្រតិបត្តិការក្នុងតំបន់ ដើម្បីអាស៊ានមួយដែលប្រកាន់ខ្ជាប់នីតិរដ្ឋ និងគ្មានឧក្រិដ្ឋជនតាមដីកាបង្គាប់»។

នៅក្នុងសម័យប្រជុំជាផ្លូវការ បណ្តាប្រទេសបានផ្លាស់ប្តូរយោបល់អំពីសភាពការណ៍ លទ្ធផលនៃការសម្របសម្រួល ក៏ដូចជាការលំបាកនានាក្នុងការងារប្រយុទ្ធប្រឆាំងនឹងឧក្រិដ្ឋជនតាមដីកាបង្គាប់ អាស្រ័យហេតុនេះ បានស្នើឡើងនូវដំណោះស្រាយទាំងឡាយ សំដៅនាំយន្តការសហប្រតិបត្តិការក្នុងតំបន់ឈានចូលទៅកាន់ជម្រៅស៊ីជម្រៅ និងជាក់ស្តែងជាងមុន។

ឧត្តមសេនីយ៍ឯក Le Van Tuyen អនុរដ្ឋមន្ត្រីក្រសួងនគរបាល បានធ្វើជាអធិបតីសម័យប្រជុំពេញអង្គនៃសន្និសីទ។

ថ្លែងមតិបិទសន្និសីទ ឧត្តមសេនីយ៍ឯក Le Van Tuyen អនុរដ្ឋមន្ត្រីក្រសួងនគរបាល បានឱ្យដឹងថា សន្និសីទបានវាយតម្លៃលើសភាពការណ៍ឧក្រិដ្ឋជនតាមដីកាបង្គាប់នៅថ្នាក់ជាតិ និងថ្នាក់តំបន់; បូកសរុបលទ្ធផលនៃកិច្ចសហប្រតិបត្តិការ កំណត់អត្តសញ្ញាណការលំបាក ឧបសគ្គស្ទះ និងបានឯកភាពគ្នាលើដំណោះស្រាយយុទ្ធសាស្ត្រនានា សំដៅលើកកម្ពស់ប្រសិទ្ធភាពនៃការសម្របសម្រួល តាមរយៈយន្តការពហុភាគី និងទ្វេភាគីនៅក្នុងអាស៊ាន។

ការឯកភាពគ្នាចេញសេចក្តីថ្លែងការណ៍រួម ស្តីពីការប្រយុទ្ធប្រឆាំងនឹងឧក្រិដ្ឋជនតាមដីកាបង្គាប់

នៅក្នុងសន្និសីទនេះ ថ្នាក់ដឹកនាំជាន់ខ្ពស់នៃស្ថាប័នអនុវត្តច្បាប់នៃបណ្តាប្រទេស ប្រ៊ុយណេដារូសាឡាម, កម្ពុជា, ឥណ្ឌូណេស៊ី, ឡាវ, ម៉ាឡេស៊ី, មីយ៉ាន់ម៉ា, ហ្វីលីពីន, សិង្ហបុរី, ថៃ, ទីម័រខាងកើត និងវៀតណាម បានឯកភាពគ្នាចេញសេចក្តីថ្លែងការណ៍រួម ស្តីពីកិច្ចសហប្រតិបត្តិការប្រយុទ្ធប្រឆាំងនឹងឧក្រិដ្ឋជនតាមដីកាបង្គាប់។

យោងតាមសេចក្តីថ្លែងការណ៍រួម ចំនួនសំណុំរឿងឧក្រិដ្ឋកម្មឆ្លងដែននៅក្នុងតំបន់ ជាពិសេសគឺឧក្រិដ្ឋកម្មបច្ចេកវិទ្យាខ្ពស់ ការជួញដូរមនុស្ស អំពើភេរវកម្ម គ្រឿងញៀន និងការបោកប្រាស់តាមប្រព័ន្ធអនឡាញ មាននិន្នាការកើនឡើងទាំងចំនួន លក្ខណៈ និងកម្រិតស្មុគស្មាញ។

សភាពការណ៍ដែលមុខសញ្ញាតាមដីកាបង្គាប់ឆ្លៀតឱកាសយកភូមិសាស្ត្រនៃបណ្តាប្រទេសជាសមាជិកអាស៊ាន ដើម្បីលាក់ខ្លួន ឬប្រព្រឹត្តអំពើល្មើសច្បាប់ ក៏បន្តកើនឡើង ដែលជះឥទ្ធិពលដល់ភាពតឹងរ៉ឹងនៃច្បាប់ ប្រសិទ្ធភាពនៃប្រព័ន្ធយុត្តិធម៌ព្រហ្មទណ្ឌ និងស្មារតីនៃការប្រកាន់ខ្ជាប់នីតិរដ្ឋ។

សេចក្តីថ្លែងការណ៍រួមបានសម្តែងការព្រួយបារម្ភចំពោះហានិភ័យដែលមុខសញ្ញាតាមដីកាបង្គាប់ស្នាក់នៅ និងលាក់ខ្លួនដោយខុសច្បាប់ក្នុងសង្គម បន្តប្រព្រឹត្តបទល្មើស ប៉ះពាល់ដល់សន្តិសុខ និងសណ្តាប់ធ្នាប់ សុវត្ថិភាពសង្គមនៃប្រទេសនីមួយៗ។

ទន្ទឹមនឹងនោះ ការអភិវឌ្ឍនៃវិទ្យាសាស្ត្រ - បច្ចេកវិទ្យា និងដំណើរការសមាហរណកម្មអន្តរជាតិកាន់តែស៊ីជម្រៅ ក៏បានបង្កើតលក្ខខណ្ឌឱ្យមុខសញ្ញាតាមដីកាបង្គាប់ផ្លាស់ប្តូរវិធីសាស្ត្រ ល្បិចកល ប្រើប្រាស់រូបភាពបន្លំយ៉ាងទំនើប និងលាក់បាំងភិនភាគ សំដៅគេចវេះពីការតាមស្វែងរករបស់កងកម្លាំងសមត្ថកិច្ច។

ការរក្សាយន្តការសហប្រតិបត្តិការយូរអង្វែងនៅក្នុងអាស៊ាន

សេចក្តីថ្លែងការណ៍រួមបានសង្កត់ធ្ងន់ថា ការពង្រឹងកិច្ចសហប្រតិបត្តិការអន្តរជាតិក្នុងការផ្ទៀងផ្ទាត់ តាមចាប់ខ្លួន ទទួលយក និងធ្វើបត្យាប័នមុខសញ្ញាតាមដីកាបង្គាប់នៅក្នុងតំបន់ គឺជាតម្រូវការបន្ទាន់មួយ។

សម័យប្រជុំការងារជាផ្លូវការនៃសន្និសីទ។

បណ្តាប្រទេសបានអះអាងសារជាថ្មីនូវការប្តេជ្ញាចិត្ត និងឆន្ទៈនយោបាយក្នុងការបង្ការ និងប្រយុទ្ធប្រឆាំងនឹងឧក្រិដ្ឋជនតាមដីកាបង្គាប់ ព្រមទាំងមានបំណងចង់រក្សាសន្និសីទថ្នាក់ដឹកនាំជាន់ខ្ពស់នៃស្ថាប័នអនុវត្តច្បាប់នៃបណ្តាប្រទេសអាស៊ាន ស្តីពីកិច្ចសហប្រតិបត្តិការប្រយុទ្ធប្រឆាំងនឹងឧក្រិដ្ឋជនតាមដីកាបង្គាប់ ទុកជាយន្តការដ៏សំខាន់ និងយូរអង្វែងមួយ ដើម្បីជំរុញកិច្ចសន្ទនា ការសម្របសម្រួល និងកិច្ចសហប្រតិបត្តិការក្នុងតំបន់។

បណ្តាទិសដៅយុទ្ធសាស្ត្រត្រូវបានឯកភាពគ្នា សំដៅលើកកម្ពស់ប្រសិទ្ធភាពនៃការឆ្លើយតបនឹងឧក្រិដ្ឋជនតាមដីកាបង្គាប់ ដែលជាបញ្ហាប្រឈមសន្តិសុខមិនប្រពៃណីកំពុងលេចឡើង ព្រមទាំងរួមចំណែកអនុវត្តចក្ខុវិស័យសហគមន៍អាស៊ានឆ្នាំ ២០៤៥ ក្រោមស្មារតី «អាស៊ានមួយប្រកបដោយភាពធន់ នវានុវត្តន៍ ថាមពល និងយកប្រជាជនជាមជ្ឈមណ្ឌល»។

សន្និសីទក៏បានអនុម័តផែនការសកម្មភាពអាស៊ានស្តីពីការពង្រឹងកិច្ចសហប្រតិបត្តិការប្រយុទ្ធប្រឆាំងនឹងឧក្រិដ្ឋជនតាមដីកាបង្គាប់។

ផែនការនេះផ្តោតលើវិស័យអាទិភាពនានា រួមមាន គតិយុត្ត; ការផ្លាស់ប្តូរព័ត៌មាន; ការលើកកម្ពស់សមត្ថភាព និងការយល់ដឹងរបស់សហគមន៍; ការអនុវត្តច្បាប់; កិច្ចសហប្រតិបត្តិការជាមួយដៃគូសន្ទនារបស់អាស៊ាន ស្ថាប័ននានារបស់អង្គការសហប្រជាជាតិ និងបណ្តាអង្គការអន្តរជាតិ; ការជួយគ្នាទៅវិញទៅមកផ្នែកយុត្តិធម៌ព្រហ្មទណ្ឌ និងបត្យាប័ន ស្របតាមច្បាប់ក្នុងស្រុកនៃបណ្តាប្រទេសជាសមាជិក និងច្បាប់អន្តរជាតិពាក់ព័ន្ធ៕

នាយករដ្ឋមន្ត្រី Le Minh Hung អញ្ជើញចូលរួមមហាសន្និបាតជាន់ខ្ពស់អាស៊ាន-រុស្ស៊ី៖ បង្ហាញពីការប្តេជ្ញាចិត្តនយោបាយក្នុងកម្រិតខ្ពស់បំផុត និងជាភស្តុតាងសម្រាប់ត យុគសម័យ - នៅមុនដំណើរការអញ្ជើញទៅបំពេញការងារដើម្បីចូលរួមមហាសន្និបាតជាន់ខ្ពស់រំលឹកខួបអនុស្សាវរីយ៍លើកទី ៣៥ នៃទំនាក់ទំនងអាស៊ាន-រុស្ស៊ី របស់នាយករដ្ឋមន្ត្រី លោក Le Minh Hung (ចាប់ពីថ្ងៃទី ១៦ ដល់ថ្ងៃទី ១៨ ខែមិថុនា) អនុរដ្ឋមន្ត្រីក្រសួងការបរទេស លោក Dang Hoang Giang បានចែករំលែកជាមួយបណ្តាសារព័ត៌មានអំពីចំណុចសំខាន់ៗ និងអត្ថន័យនៃមហាសន្និបាត ព្រមទាំងការចូលរួមរបស់វៀតណាមផងដែរ។

បញ្ជាក់យ៉ាងមុតមាំពីតួនាទីរបស់អាស៊ាន និងបណ្តាយន្តការដែលដឹកនាំដោយអាស៊ាន ក្នុងការជំរុញការសន្ទនា យុគសម័យ - ក្នុងអំឡុងថ្ងៃទី ៨-៩ ខែមិថុនា នៅទីក្រុងម៉ានីល ប្រទេសហ្វីលីពីន អនុរដ្ឋមន្ត្រីការបរទេស លោក Dang Hoang Giang ប្រធាន SOM អាស៊ានវៀតណាម បានដឹកនាំគណៈប្រតិភូវៀតណាមអញ្ជើញចូលរួមបណ្តាញមហាសន្និបាតមន្ត្រីជាន់ខ្ពស់អាស៊ាន និងជាមួយដៃគូ។

ម៉ាញដាត