បន្តវេនប្រពៃណី សរសេរបន្តនូវជោគជ័យក្នុងដំណាក់កាលអភិវឌ្ឍន៍ថ្មីរបស់ប្រទេសជាតិ

បណ្តាទិសដៅទាំងនោះត្រូវបានកសាងឡើងលើមូលដ្ឋាននៃការវាយតម្លៃយ៉ាងហ្មត់ចត់នូវបរិបទសភាពការណ៍ពិភពលោក តំបន់ ការជ្រួតជ្រាបនូវតម្រូវការកាន់តែខ្ពស់របស់ថ្នាក់ដឹកនាំបក្ស រដ្ឋ ក៏ដូចជាការអនុវត្តជាក់ស្តែងរបស់សហភាពបណ្តាអង្គការមិត្តភាពវៀតណាម និងបណ្តាអង្គការជាសមាជិកនៅថ្នាក់មជ្ឈិមជាមួយមូលដ្ឋាន។

មិនដែលធ្លាប់មានឡើយក្នុងរយៈពេលជាច្រើនទសវត្សរ៍កន្លងមកនេះ ដែលពិភពលោកត្រូវប្រឈមមុខដំណាលគ្នានឹងបម្រែបម្រួលប្រទាក់ក្រឡាគ្នា និងស្មុគស្មាញយ៉ាងដូច្នេះ - សណ្តាប់ធ្នាប់អន្តរជាតិមានការប្រេះស្រាំ ការប្រកួតប្រជែងយុទ្ធសាស្ត្ររវាងប្រទេសធំៗកាន់តែមានសភាពតានតឹងខ្លាំងឡើង ជម្លោះក្នុងតំបន់កើតមាននៅកន្លែងជាច្រើន ការកើនឡើងសេដ្ឋកិច្ចសកលមានការធ្លាក់ចុះ ការប្រែប្រួលអាកាសធាតុកាន់តែជះឥទ្ធិពលអវិជ្ជមាន និងបច្ចេកវិទ្យាស្នូល ជាពិសេសគឺទិន្នន័យធំ បញ្ញាសិប្បនិម្មិត ការរៀនម៉ាស៊ីន បន្ទះឈីបពាក់កណ្តាលចម្លង កំពុងកំណត់ឡើងវិញនូវទិដ្ឋភាពនៃទំនាក់ទំនងអន្តរជាតិតាមរបៀបរបបដែលមិនធ្លាប់មានគំរូពីមុនមក។

នៅផ្ទៃក្នុងប្រទេស ដោយជ្រួតជ្រាប និងអនុវត្តតាមការចង្អុលបង្ហាញរបស់ថ្នាក់ដឹកនាំបក្ស រដ្ឋ សហភាពបណ្តាអង្គការមិត្តភាពវៀតណាម និងបណ្តាអង្គការជាសមាជិកទើបតែបានបញ្ចប់វគ្គរៀបចំចាត់ចែងឡើងវិញនូវរចនាសម្ព័ន្ធ ក្បាលម៉ាស៊ីនយ៉ាងស៊ីជម្រៅ ដើម្បីបន្ស៊ាំទៅនឹងគំរូរដ្ឋបាលមូលដ្ឋានពីរកម្រិតលើទូទាំងប្រទេស។ ភូមិសាស្ត្រទូលំទូលាយជាងមុន បរិមាណការងារធំជាងមុន - ទាមទារឱ្យសមត្ថភាពរៀបចំចាត់តាំង និងការសម្របសម្រួលនៃប្រព័ន្ធទាំងមូលត្រូវតែត្រូវបានលើកកម្ពស់ដល់កម្រិតមួយផ្សេងពីមុន។

ពិភពលោកមានការប្រែប្រួល ប្រទេសជាតិឈានចូលដំណាក់កាលអភិវឌ្ឍន៍ថ្មី ប្រព័ន្ធចាត់តាំងទើបតែត្រូវបានរៀបចំឡើងវិញ - កត្តាទាំងបីនោះបូកបញ្ចូលគ្នា បានកំណត់នូវការទទួលខុសត្រូវដ៏ធំធេងសម្រាប់អ្នកបំពេញការងារកិច្ចការបរទេសប្រជាជននាថ្ងៃនេះ - កំណត់នូវទិសដៅធំៗ និងថ្មីសម្រាប់ដំណើរផ្លូវ ៥ ឆ្នាំខាងមុខ។

ប្រពៃណីដ៏ត្រចះត្រចង់

កិច្ចការបរទេសប្រជាជនគឺជាការច្នៃប្រឌិតប្រកបដោយលក្ខណៈពិសេស មានចក្ខុវិស័យយុទ្ធសាស្ត្ររបស់បក្សយើង និងរបស់លោកប្រធាន Ho Chi Minh - ជារបៀបរបបកិច្ចការបរទេសមួយដែលបង្កប់នូវអត្តសញ្ញាណវៀតណាមយ៉ាងជ្រាលជ្រៅ ដែលត្រូវបានបង្កើតឡើង និងអភិវឌ្ឍចេញពីសេចក្តីប្រាថ្នាឯករាជ្យ ស្វ័យភាព ចេញពីប្រពៃណីផ្សះផ្សាសន្តិភាព មនុស្សធម៌របស់ប្រជាជាតិ ចេញពីសតិអារម្មណ៍ Ho Chi Minh និងមាគ៌ាកិច្ចការបរទេសរបស់បក្ស។ នៅក្នុងបណ្តាឆ្នាំខែនៃការតស៊ូដណ្តើមយកឯករាជ្យជាតិ បង្រួបបង្រួមប្រទេសជាតិ គឺកិច្ចការបរទេសប្រជាជននេះហើយដែលបានរួមចំណែកប្រែក្លាយសេចក្តីប្រាថ្នាសន្តិភាពរបស់វៀតណាមឱ្យទៅជាមនសិការ ជាសំឡេងរួមរបស់មនុស្សជាតិជឿនលឿន។

ឈានចូលដំណាក់កាលផ្លាស់ប្តូរថ្មី សមាហរណកម្មអន្តរជាតិ កិច្ចការបរទេសប្រជាជនបន្តជាកម្លាំងដ៏សំខាន់មួយរួមចំណែកបំបែកការហ៊ុមព័ទ្ធ ទណ្ឌកម្ម មិនត្រឹមតែនាំវៀតណាម «បោះជំហានចេញទៅកាន់ពិភពលោក» ប៉ុណ្ណោះទេ ប៉ុន្តែថែមទាំងនាំពិភពលោកមកកាន់មូលដ្ឋាននីមួយៗ សហគមន៍នីមួយៗទៀតផង។ ជាមួយនឹងបណ្តាញដៃគូរាប់ពាន់នៅទូទាំងទ្វីប សកម្មភាពសន្តិភាព សាមគ្គីភាព មិត្តភាពរាប់ពាន់ត្រូវបានរៀបចំឡើងជារៀងរាល់ឆ្នាំ កិច្ចការបរទេសប្រជាជនបានកៀរគរជំនួយឧបត្ថម្ភ រួមចំណែកកាត់បន្ថយភាពក្រីក្រ សន្តិសុខសង្គម សុខាភិបាល អប់រំ ការពារបរិស្ថាន ជំនះពុះពារលើផលវិបាកដោយសារសង្គ្រាម ឆ្លើយតបនឹងគ្រោះមហន្តរាយធម្មជាតិ ជំងឺរាតត្បាត។ ព្រមជាមួយគ្នានោះ ជំរុញការងារស្រាវជ្រាវ ព័ត៌មានកិច្ចការបរទេស និងជនជាតិវៀតណាមនៅក្រៅប្រទេស រួមចំណែកផ្សព្វផ្សាយរូបភាពប្រទេសជាតិ មនុស្សវៀតណាម និងពង្រឹងការយល់ដឹង ទំនុកចិត្តរវាងបណ្តាប្រជាជាតិ។

បណ្ឌិត Phan Anh Son ប្រធានសហភាពបណ្តាអង្គការមិត្តភាពវៀតណាម។

នៅក្នុងចរន្តរួមនោះ សហភាពបណ្តាអង្គការមិត្តភាពវៀតណាម និងបណ្តាអង្គការជាសមាជិកបានរីកធំធាត់ឥតឈប់ឈរ មួយជំហានម្តងៗអះអាងនូវតួនាទីស្នូល និងជំនាញការក្នុងការងារកិច្ចការបរទេសប្រជាជន ក្លាយជាស្ពានមិត្តភាព ជាបេសកជននៃសន្តិភាព ដោយនាំយកសារអំពីប្រទេសវៀតណាមមួយដែលស្រឡាញ់សន្តិភាព ស្មោះត្រង់ និងមានទំនួលខុសត្រូវ ទៅកាន់មិត្តភក្តិនៅទ្វីបទាំងប្រាំ។

មេរៀនដ៏ធំមួយដែលប្រវត្តិសាស្ត្របានបន្សល់ទុកសម្រាប់ពួកយើង ដែលជាអ្នកបំពេញការងារកិច្ចការបរទេសប្រជាជននាថ្ងៃនេះ ត្រូវបានបូកសរុបនៅក្នុងការវាយតម្លៃរបស់អគ្គលេខាបក្ស To Lam ថា៖ ឋានៈ និងកិត្យានុភាពរបស់ប្រទេសជាតិមិនត្រឹមតែស្ថិតនៅលើកម្លាំងសម្ភារៈប៉ុណ្ណោះទេ ប៉ុន្តែថែមទាំងជា «អំណាចទន់» ទៀតផង។ នោះគឺជាប្រវត្តិសាស្ត្រដ៏រុងរឿង វប្បធម៌ដែលបង្កប់នូវអត្តសញ្ញាណជាតិយ៉ាងជ្រាលជ្រៅ សមិទ្ធផលដ៏ធំធេង និងមានអត្ថន័យប្រវត្តិសាស្ត្រនៃកិច្ចការផ្លាស់ប្តូរថ្មី គឺជាមាគ៌ាកិច្ចការបរទេសសន្តិភាព ផ្សះផ្សា ដោះស្រាយបញ្ហាអន្តរជាតិនានាដោយសុខដុមរមនា មានហេតុផល មានមនោសញ្ចេតនា គោរពច្បាប់អន្តរជាតិ និងជាការយល់ស្រប គាំទ្រពីសំណាក់ប្រជាជនពិភពលោក។

ស្នាដៃលេចធ្លោក្នុងអាណត្តិមួយដែលពោរពេញដោយការសាកល្បង

អាណត្តិ ២០១៩ - ២០២៦ ត្រូវបានបិទបញ្ចប់នៅក្នុងបរិបទដែលពិភពលោកមានបម្រែបម្រួលមិនធ្លាប់មានគំរូពីមុនមក ជះឥទ្ធិពលយ៉ាងស៊ីជម្រៅដល់វៀតណាមជារួម និងកិច្ចការបរទេសប្រជាជនដោយឡែក។ នៅក្នុងបរិបទនោះ សហភាពបណ្តាអង្គការមិត្តភាពវៀតណាម និងបណ្តាអង្គការជាសមាជិកបានខិតខំប្រឹងប្រែងជំនះពុះពារលើការលំបាក អះអាងនូវភាពអង់អាចក្លាហាន និងសម្រេចបាននូវលទ្ធផលវិជ្ជមានជាច្រើន។

សហភាពបណ្តាអង្គការមិត្តភាពវៀតណាមបានធ្វើសេនាធិការរៀបចំសកម្មភាពកិច្ចការបរទេសប្រជាជនជាច្រើននៅក្នុងដំណើរទស្សនកិច្ចរបស់ថ្នាក់ដឹកនាំបក្ស រដ្ឋ រៀបចំប្រកបដោយជោគជ័យនូវសកម្មភាពកិច្ចការបរទេសប្រជាជនរាប់ពាន់នៅទាំងថ្នាក់មជ្ឈិម និងមូលដ្ឋាន ក្នុងនោះមានព្រឹត្តិការណ៍នានាដែលមានទំហំទ្រង់ទ្រាយអ្នកចូលរួមរាប់ពាន់នាក់ រហូតដល់រាប់ម៉ឺននាក់។ យន្តការសហប្រតិបត្តិការជាច្រើនដែលមានលក្ខណៈសម្គាល់ផ្ទាល់ខ្លួនត្រូវបានបង្កើតឡើង និងរក្សាទុកយ៉ាងទៀងទាត់ជាមួយបណ្តាដៃគូសំខាន់ៗ ចាប់តាំងពីវេទិកាប្រជាជនវៀតណាម - ចិន រហូតដល់វេទិកាប្រជាជនវៀតណាម - រុស្ស៊ី សង្វាក់ផ្លាស់ប្តូរមិត្តភាពវៀតណាម - អាមេរិក កម្មវិធី «បណ្តុះពន្លកមិត្តភាព» ការប្រកួត «វត្ថុអនុស្សាវរីយ៍រៀបរាប់រឿងរ៉ាវ» ព្រមជាមួយសកម្មភាពនានាជាមួយដៃគូនៅបណ្តាប្រទេសអាស៊ាន អឺរ៉ុប និងមិត្តភក្តិប្រពៃណី រួមចំណែកពង្រឹងយ៉ាងរឹងមាំនូវទំនុកចិត្តនយោបាយ រឹតចំណងមិត្តភាព បើកចេញនូវលំហជំរុញកិច្ចសហប្រតិបត្តិការអភិវឌ្ឍន៍សេដ្ឋកិច្ច - សង្គមប្រកបដោយចីរភាព។

អគ្គលេខាបក្ស To Lam ប្រធានរដ្ឋ Luong Cuong រួមជាមួយអគ្គលេខាបក្ស ប្រធានរដ្ឋចិន Xi Jinping និងបណ្តាប្រតិភូអនុវត្តពិធីចាប់ផ្តើម «ដំណើរក្រហមស្រាវជ្រាវ សិក្សារបស់យុវជន» នៅ Ha Noi ខែមេសា ឆ្នាំ ២០២៥។

ពួកយើងបានធ្វើជាម្ចាស់ផ្ទះរៀបចំប្រកបដោយជោគជ័យនូវមហាសន្និបាតលើកទី XXII នៃក្រុមប្រឹក្សាសន្តិភាពពិភពលោកក្នុងឆ្នាំ ២០២២ និងពីរលើកជាប់ៗគ្នាបានឈានមុខគេលើពិភពលោកអំពីចំនួនហត្ថលេខាគាំទ្រយុទ្ធនាការរំសាយអាវុធនុយក្លេអ៊ែរ ដោយអះអាងនូវការទទួលខុសត្រូវ និងសំឡេងរបស់ប្រជាជនវៀតណាមចំពោះសន្តិភាព និងសន្តិសុខរបស់មនុស្សជាតិ។

នៅក្នុងបរិបទដែលជំនួយឧបត្ថម្ភអន្តរជាតិជាសកលមានការរួញតូច ប្រភពជំនួយមិនមែនរដ្ឋាភិបាលបរទេសនៅតែត្រូវបានរក្សាឱ្យមានស្ថិរភាពជារៀងរាល់ឆ្នាំ រួមចំណែកសាងសង់ផ្ទះរាប់ពាន់ខ្នងជូនដល់ជនក្រីក្រក្នុងកម្មវិធីលុបបំបាត់ផ្ទះបណ្តោះអាសន្ន និងផ្ទះទ្រុឌទ្រោម កៀរគរថវិការាប់រយពាន់លានដុងដើម្បីឆ្លើយតបនឹងជំងឺរាតត្បាតកូវីដ-១៩ និងជំនះពុះពារលើផលវិបាកដោយសារគ្រោះមហន្តរាយធម្មជាតិ ព្រមទាំងរាប់ពាន់ពាន់លានដុងសម្រាប់បណ្តាកម្មវិធីជំនះពុះពារលើផលវិបាកដោយសារសង្គ្រាម ជួយសង្គ្រោះជនពិការ ជួយឧបត្ថម្ភសុខាភិបាល អប់រំ ឆ្លើយតបនឹងការប្រែប្រួលអាកាសធាតុ បង្កើតមុខរបរចិញ្ចឹមជីវិតប្រកបដោយចីរភាព...

អគ្គលេខាបក្ស ប្រធានរដ្ឋ To Lam ជួបសំណេះសំណាលជាមួយថ្នាក់ដឹកនាំបក្សកុម្មុយនីស្ត បណ្តាអង្គការស្លាបឆ្វេង និងមិត្តភក្តិអាមេរិកនៅ New York ខែកញ្ញា ឆ្នាំ ២០២៤ ក្នុងកម្មវិធីដែលសហការរៀបចំដោយគណៈទាក់ទងបរទេសមជ្ឈិម សហភាពបណ្តាអង្គការមិត្តភាពវៀតណាម និងគណៈបេសកកម្មវៀតណាមអមអង្គការសហប្រជាជាតិ។

គុណភាពនៃការងារស្រាវជ្រាវ ធ្វើសេនាធិការ និងព័ត៌មានកិច្ចការបរទេសត្រូវបានកែលម្អយ៉ាងច្បាស់ក្រឡែត ដោយបានរួមចំណែកជាក់ស្តែងទៅក្នុងដំណើរការធ្វើសេចក្តីសម្រេចចិត្តចំពោះបញ្ហាកិច្ចការបរទេសសំខាន់ៗជាច្រើន។

ក្នុងដំណាក់កាល ២០១៩ - ២០២៦ សហភាពបណ្តាអង្គការមិត្តភាពវៀតណាមមានកិត្តិយសទទួលបានគ្រឿងឥស្សរិយយស Ho Chi Minh និងគ្រឿងឥស្សរិយយសពលកម្មថ្នាក់លេខមួយ ចំពោះការខិតខំប្រឹងប្រែង និងលទ្ធផលវិជ្ជមាននានាក្នុងការងារកិច្ចការបរទេសប្រជាជន។

រាល់លទ្ធផលទាំងអស់នោះ ទោះបីជាគួរជាទីមោទនៈក៏ដោយ ក៏នៅតែមិនទាន់ជាគោលដៅចុងក្រោយបង្អស់នៅឡើយទេ។ ដោយសម្លឹងមើលត្រង់ទៅកាន់ការអនុវត្តជាក់ស្តែង សកម្មភាពរបស់សហភាពបណ្តាអង្គការមិត្តភាពវៀតណាមនៅតែមានកម្រិតកំណត់ជាក់លាក់មួយចំនួន៖ ការយល់ដឹងអំពីតួនាទីនៃកិច្ចការបរទេសប្រជាជននៅកន្លែងមួយចំនួននៅមិនទាន់បានពេញលេញនៅឡើយ សកម្មភាពមួយចំនួននៅមានលក្ខណៈទម្រង់ មិនទាន់បង្កើតបាននូវគុណតម្លៃជាក់ស្តែង បណ្តាញដៃគូនៅតាមតំបន់សំខាន់ៗ ក្នុងមជ្ឈដ្ឋានដែលមានឥទ្ធិពល នៅមិនទាន់សមស្របទៅនឹងតម្រូវការ ការងារស្រាវជ្រាវ ធ្វើសេនាធិការ ពេលខ្លះនៅមានលក្ខណៈដោះស្រាយការងារចំពោះមុខ មិនទាន់តាមទាន់នូវបម្រែបម្រួលយ៉ាងឆាប់រហ័ស និងស្មុគស្មាញនៃសភាពការណ៍ពិភពលោក។ ការកំណត់អត្តសញ្ញាណយ៉ាងច្បាស់នូវកម្រិតកំណត់ទាំងនេះ គឺជាមូលដ្ឋានដើម្បីឱ្យមហាសន្និបាតលើកទី VII កំណត់នូវទិសដៅ គោលដៅថ្មីៗ និងដំណោះស្រាយជាមូលដ្ឋានគ្រឹះសម្រាប់អាណត្តិថ្មី។

តំណាងបណ្តាអង្គការមិនមែនរដ្ឋាភិបាលបរទេសទទួលប័ណ្ណសរសើររបស់សហភាពបណ្តាអង្គការមិត្តភាពវៀតណាមនៅក្នុងពិធីកត់សម្គាល់ការរួមចំណែកឆ្នាំ ២០២៤។

ផ្លូវឆ្ពោះទៅមុខ

ចេញពីមេរៀនពិសោធន៍នៃអាណត្តិកន្លងមក និងចំពោះមុខតម្រូវការនៃដំណាក់កាលអភិវឌ្ឍន៍ថ្មីរបស់ប្រទេសជាតិ មហាសន្និបាតលើកទី VII អាណត្តិ ២០២៦ - ២០៣១ បានកំណត់គោលដៅ xuyên suốt សម្រាប់អាណត្តិទាំងមូលគឺ «កសាងសហភាពបណ្តាអង្គការមិត្តភាពវៀតណាមចាប់ពីថ្នាក់មជ្ឈិមដល់មូលដ្ឋានឱ្យរឹងមាំលើគ្រប់ជ្រុងជ្រោយ ជាមួយជួរកម្មាភិបាលដែលមានជំហរនយោបាយរឹងមាំ ស្ទាត់ជំនាញភាសាបរទេស ប៉ិនប្រសប់ខាងវិជ្ជាជីវៈ អភិវឌ្ឍបណ្តាញដៃគូអន្តរជាតិឱ្យទូលំទូលាយ និងមានឥទ្ធិពលយ៉ាងស៊ីជម្រៅ។ អះអាងយ៉ាងរឹងមាំ និងពង្រីកជាអតិបរមានូវតួនាទីស្នូលក្នុងសសរស្តម្ភកិច្ចការបរទេសប្រជាជន សម្របសម្រួលយ៉ាងជិតស្និទ្ធ និងប្រកបដោយប្រសិទ្ធភាពជាមួយកិច្ចការបរទេសបក្ស និងការទូតរដ្ឋ រួមចំណែកអនុវត្តប្រកបដោយជោគជ័យនូវភារកិច្ច “គន្លឹះ សំខាន់ និងជាប្រចាំ” ពង្រីកតួនាទីត្រួសត្រាយផ្លូវក្នុងការបង្កើត និងរក្សាឱ្យបាននូវបរិយាកាសសន្តិភាព ស្ថិរភាព ការពារមាតុភូមិយ៉ាងរឹងមាំតាំងពីដំបូង តាំងពីចម្ងាយ រួមចំណែកនាំប្រទេសជាតិឈានចូលដំណាក់កាលអភិវឌ្ឍន៍ថ្មី»។

ទន្ទឹមនឹងភារកិច្ចស្នូលគឺ «កសាងមូលដ្ឋានគ្រឹះសង្គមប្រកបដោយភាពវិជ្ជមាន និងអំណោយផល» សម្រាប់ទំនាក់ទំនងរវាងវៀតណាមជាមួយបណ្តាប្រទេស កិច្ចការបរទេសប្រជាជនចាំបាច់ត្រូវម្ចាស់ការបង្កើតនូវធនធានអភិវឌ្ឍន៍ បង្កើតរូបភាព និងកិត្យានុភាពជាតិ បង្កើតលំហកិច្ចសន្ទនាដើម្បីការពារផលប្រយោជន៍ប្រទេសជាតិតាំងពីដំបូង តាំងពីចម្ងាយ យកប្រសិទ្ធភាពជាក់ស្តែង យកផលប្រយោជន៍របស់ជាតិ - ប្រជាជន និងរបស់ប្រជាជនធ្វើជាបន្ទាត់រង្វាស់សម្រាប់គ្រប់សកម្មភាព។

ពិធីចុះហត្ថលេខាលើកំណត់ហេតុនៃការយោគយល់គ្នាស្តីពីកិច្ចសហប្រតិបត្តិការរវាងមន្ទីរពេទ្យមិត្តភាព និងមជ្ឈមណ្ឌលជំងឺមហារីក Napalkov ក្នុងក្របខ័ណ្ឌវេទិកាប្រជាជនវៀតណាម - រុស្ស៊ី លើកទីមួយ ខែកញ្ញា ឆ្នាំ ២០២៥។

ដើម្បីធ្វើឱ្យទិសដៅទាំងនោះលេចចេញជារូបរាងជាក់ស្តែង បាវចនាធ្វើសកម្មភាពនៃអាណត្តិទាំងមូលត្រូវបានកំណត់យ៉ាងច្បាស់គឺ «ម្ចាស់ការបន្ស៊ាំ ឈានទៅមុខបង្កើតថ្មីប្រកបដោយភាពច្នៃប្រឌិត ជាក់ស្តែង និងមានប្រសិទ្ធភាព» រួមជាមួយបណ្តាក្រុមភារកិច្ច ដំណោះស្រាយស្នូល ចាប់ពីការលើកកម្ពស់ការយល់ដឹងអំពីឋានៈ តួនាទីនៃកិច្ចការបរទេសប្រជាជន រហូតដល់ការពង្រីក ធ្វើពិពិធកម្មទំនាក់ទំនងកិច្ចការបរទេស ម្ចាស់ការពង្រីកបណ្តាញដៃគូឆ្ពោះទៅកាន់ក្រុមមុខសញ្ញាថ្មីៗដែលមានឥទ្ធិពល - មជ្ឈដ្ឋានបញ្ញវន្ត សមាជិកសភា រដ្ឋបាលមូលដ្ឋាន សហគ្រាស អង្គការសង្គម បណ្តាញអ្នកប្រាជ្ញ ប្រព័ន្ធផ្សព្វផ្សាយ និងបណ្តាមជ្ឈមណ្ឌលស្រាវជ្រាវ ជំរុញការចលនា លើកកម្ពស់ប្រសិទ្ធភាពនៃការតភ្ជាប់ធនធានអន្តរជាតិ ផ្លាស់ប្តូរថ្មីការងារព័ត៌មានកិច្ចការបរទេស លើកកម្ពស់កម្រិតការងារស្រាវជ្រាវ ធ្វើសេនាធិការ។

បន្តវេននូវមូលដ្ឋានគ្រឹះដែលត្រូវបានបណ្តាជំនាន់មុនៗពូនជ្រំ ផ្លាស់ប្តូរថ្មីឥតឈប់ឈរនូវការគិត វិធីសាស្ត្រចូលទៅកាន់ បរិមាត និងរបៀបរបបធ្វើសកម្មភាព លើកកម្ពស់កម្រិតគុណតម្លៃ នោះគឺជាមាគ៌ាដើម្បីឱ្យការងារកិច្ចការបរទេសប្រជាជននៃសហភាពបណ្តាអង្គការមិត្តភាពវៀតណាមអះអាងនូវឋានៈតួនាទីសមស្របទៅនឹងតម្រូវការអភិវឌ្ឍន៍ថ្មីរបស់ប្រទេសជាតិ៕

សេចក្តីសម្រេចចិត្តលេខ ៥៧៖ បើកឡើងនូវដំណាក់កាលអភិវឌ្ឍន៍ថ្មីមួយនៃប្រទេសជាតិ ឈានហួសពីវិសាលភាពវិទ្យាសាស្ត្រនិងបច្ចេកវិទ្យា យុគសម័យ - សេចក្តីសម្រេចចិត្តលេខ 57-NQ/TW បានបើកឡើងនូវដំណាក់កាលអភិវឌ្ឍន៍ថ្មីមួយនៃប្រទេសជាតិ អ្វីដែលមានអត្ថន័យយុទ្ធសាស្ត្របំផុតមិនត្រឹមតែជាបណ្តាលទ្ធផលជាក់ស្តែងសម្រេចបាននោះទេ គឺវាស្ថិតនៅលើការដែលសេចក្តីសម្រេចចិត្តបានបង្កើតឡើងនូវគំរូអភិវឌ្ឍន៍ថ្មីមួយ ដែលក្នុងនោះវិទ្យាសាស្ត្រ បច្ចេកវិទ្យា ការច្នៃប្រឌិតផ្លាស់ប្តូរថ្មី និងការផ្លាស់ប្តូរឌីជីថលត្រូវបានកំណត់ថាជាកម្លាំងចលករចម្បងនៃកំណើន សំដៅជំនួសជាបណ្តើរៗនូវគំរូអភិវឌ្ឍន៍ដែលពឹងផ្អែកខ្លាំងលើដើមទុន ធនធានធម្មជាតិ និងកម្លាំងពលកម្មមានតម្លៃថ្លៃឈ្នួលទាប។

ធ្វើឱ្យប្រព័ន្ធច្បាប់បានពេញលេញ ដោះស្រាយ “ចំណុចស្ទះ” បង្កើតកម្លាំងចលករអភិវឌ្ឍន៍ប្រទេសជាតិ យុគសម័យ - នាព្រឹកថ្ងៃទី ៣ ខែសីហា ឆ្នាំ ២០២៦ សម័យប្រជុំវិសាមញ្ញលើកទី ១ នៃរដ្ឋសភានីតិកាលទី ១៦ បានបើកបវេសនកាលជាផ្លូវការ ដើម្បីពិនិត្យ និងសម្រេចលើបណ្តាព្រាងច្បាប់ និងសេចក្តីសម្រេចចិត្តយ៉ាងសំខាន់ៗជាច្រើន ដែលឆ្លើយតបទៅនឹងតម្រូវការធ្វើឱ្យប្រព័ន្ធច្បាប់បានពេញលេញ ដោះស្រាយ “ចំណុចស្ទះ” ព្រមទាំងបង្កើតកម្លាំងចលករសម្រាប់ការអភិវឌ្ឍប្រទេសជាតិ។

ម៉ាញដាត