យុគសម័យ - ពីចំពោះមុខផលប៉ះពាល់នៃព្យុះទី ៤ កងទ័ពបានរក្សាកម្លាំងកងទ័ពប្រចាំការ និងជីវពលស្វ័យការពារជាង ២៣២.០០០ នាក់ រួមជាមួយមធ្យោបាយរាប់ពាន់គ្រឿងក្នុងការប្រចាំការ។ អង្គភាពជាច្រើនបានចូលរួមដោយផ្ទាល់ក្នុងការជម្លៀសប្រជាពលរដ្ឋ សង្គ្រោះបន្ទាន់ ជម្នះការបាក់ដី ការជន់លិច និងជួយឧបត្ថម្ភធ្វើឱ្យជីវភាពរស់នៅមានស្ថិរភាពឡើងវិញ នៅតាមតំបន់ដែលរងផលប៉ះពាល់។
 |
| កងទ័ព និងជីវពលជាង ២៣២.០០០ នាក់ ប្រចាំការជួយគាំទ្រប្រជាពលរដ្ឋជម្នះផលវិបាកដោយសារព្យុះភ្លៀង |
យោងតាមការិយាល័យនៃគណៈកម្មាធិការដឹកនាំការពារជនស៊ីវិលជាតិ ដើម្បីម្ចាស់ការឆ្លើយតបនឹងព្យុះ និងទឹកជំនន់ ស្ថាប័ននេះបានចេញតេឡេក្រាមស្នើឱ្យបណ្តាស្ថាប័ន អង្គភាព តាមដានយ៉ាងដិតដល់នូវការវិវឌ្ឍ ផ្តល់ព័ត៌មានទាន់ពេលវេលាដល់ប្រជាពលរដ្ឋដើម្បីម្ចាស់ការបង្ការជៀសវាង រក្សាយ៉ាងម៉ឺងម៉ាត់នូវរបបប្រចាំការ និងត្រៀមកម្លាំង ព្រមទាំងមធ្យោបាយ ដើម្បីជួយគាំទ្រមូលដ្ឋានក្នុងការដោះស្រាយប្រកបដោយប្រសិទ្ធភាពនូវរាល់ស្ថានភាពគ្រោះមហន្តរាយធម្មជាតិ។
អនុវត្តតាមតេឡេក្រាមនេះ កងទ័ពបានរក្សាកម្លាំងកងទ័ពប្រចាំការ និងជីវពលស្វ័យការពារជាង ២៣២.០០០ នាក់ រួមជាមួយមធ្យោបាយរាប់ពាន់គ្រឿងក្នុងការប្រចាំការទប់ទល់នឹងព្យុះទី ៤។
ក្រសួងការពារជាតិបានបញ្ជាឱ្យយោធភូមិភាគទី ១ និងយោធភូមិភាគទី ៣ ចល័តកម្មាភិបាល យុទ្ធជនជាង ៤.៤០០ នាក់ និងមធ្យោបាយគ្រប់ប្រភេទជិត ៦០០ គ្រឿង ដើម្បីជួយគាំទ្របណ្តាមូលដ្ឋានចំណុះខេត្ត Lang Son និងខេត្ត Quang Ninh ក្នុងការជម្លៀសប្រជាពលរដ្ឋចំនួន ១.២១២ គ្រួសារ ទៅកាន់ទីកន្លែងប្រកបដោយសុវត្ថិភាព។
ជួយគាំទ្រការជម្លៀសប្រជាពលរដ្ឋ ជម្នះការបាក់ដី
យោធភូមិភាគទី ១ បានកៀរគរកងទ័ព និងជីវពលស្វ័យការពារជិត ១.៦០០ នាក់ សហការជាមួយអាជ្ញាធរមូលដ្ឋាន ជម្លៀសប្រជាពលរដ្ឋទាំងស្រុងចំនួន ៦៥០ គ្រួសារ រួមជាមួយទ្រព្យសម្បត្តិ ចេញពីតំបន់គ្រោះថ្នាក់ និងជន់លិច។
កងកម្លាំងទាំងឡាយទន្ទឹមនឹងនោះក៏បានជួយគាំទ្រជួសជុលផ្ទះសម្បែងដែលត្រូវរបើកដំបូល ជន់លិចទឹក បោះស្លាកព្រមាន និងចាត់តាំងកម្លាំងយាមកាមនៅតាមតំបន់បាក់ដី ទំនប់បង្ហៀរ ទីកន្លែងដែលមានទឹកហូរខ្លាំង បណ្តាខ្សែផ្លូវដែលត្រូវជន់លិច និងទីតាំងទាំងឡាយដែលមានហានិភ័យអសន្តិសុខ។
យោធភូមិភាគទី ២ បានកៀរគរមនុស្សជាង ៣០០ នាក់ រួមជាមួយអេស្កាវ៉ាទ័រចំនួន ២ គ្រឿង សហការជាមួយអាជ្ញាធរមូលដ្ឋានដោះស្រាយការបាក់ដីនៅលើបណ្តាខ្សែផ្លូវគមនាគមន៍ជនបទ ជួយគាំទ្រការជម្លៀសមនុស្ស និងទ្រព្យសម្បត្តិទៅកាន់ទីកន្លែងប្រកបដោយសុវត្ថិភាព។
យោធភូមិភាគទី ៣ ត្រៀមជាស្រេចក្នុងការដាក់ឱ្យដំណើរការនូវទីបញ្ជាការជួរមុខចំនួន ៤ នៅឯ ៤ ខេត្ត-ក្រុង ដើម្បីឆ្លើយតបនឹងព្យុះទី ៤ ព្រមទាំងសហការជាមួយមូលដ្ឋានជម្លៀសប្រជាពលរដ្ឋចំនួន ៧០ គ្រួសារ ស្មើនឹង ២១៣ នាក់ នៅឯខេត្ត Quang Ninh។
បណ្តាអង្គភាពដែលឈរជើងនៅលើភូមិសាស្ត្រខេត្ត-ក្រុងនានា ក៏បានម្ចាស់ការសហការជាមួយគណៈកម្មាធិការបក្ស និងអាជ្ញាធរមូលដ្ឋានក្នុងការចងទប់ផ្ទះសម្បែង ជម្លៀសប្រជាពលរដ្ឋនៅតាមតំបន់ដែលមានហានិភ័យខ្ពស់នៃការកើតមានការបាក់ដី ជំនន់គំហុក និងការជន់លិចជ្រៅ ព្រមទាំងចូលរួមជម្នះផលវិបាកដោយសារព្យុះភ្លៀង ជួយគាំទ្រប្រជាពលរដ្ឋធ្វើឱ្យជីវភាពរស់នៅមានស្ថិរភាពឡើងវិញផងដែរ។
កម្លាំងរាប់ពាន់នាក់ចូលរួមការងារសង្គ្រោះបន្ទាន់នៅ Lang Son
ដើម្បីជួយគាំទ្រប្រជាពលរដ្ឋឱ្យបានឆាប់រហ័សក្នុងការធ្វើឱ្យជីវភាពរស់នៅមានស្ថិរភាពឡើងវិញ ចាប់ពីថ្ងៃទី ២១-២៣ ខែសីហា បញ្ជាការដ្ឋានយោធាខេត្ត Lang Son បានកៀរគរនាយទាហាន យុទ្ធជននៃកងទ័ពប្រចាំការជាង ២.៣០០ នាក់ ជីវពលស្វ័យការពារជិត ១.១១០ នាក់ និងមនុស្សប្រមាណ ២.៥០០ នាក់ មកពីកងកម្លាំងផ្សេងៗទៀត ចូលរួមការងារសង្គ្រោះបន្ទាន់ ជម្នះផលវិបាកនៃគ្រោះមហន្តរាយធម្មជាតិ នៅតាមតំបន់ដែលរងផលប៉ះពាល់។
បញ្ជាការដ្ឋានការពារព្រំដែនខេត្ត ក៏បានដឹកនាំជាបន្ទាន់ដល់បណ្តាប៉ុស្តិ៍ការពារព្រំដែន កៀរគរកម្លាំងជាអតិបរមា សហការជាមួយគណៈកម្មាធិការបក្ស អាជ្ញាធរ និងកងកម្លាំងសមត្ថកិច្ចនានា ដើម្បីប្រមូលផ្តុំដោះស្រាយផលវិបាកនៃគ្រោះមហន្តរាយធម្មជាតិ។
នាយទាហាន និងយុទ្ធជនការពារព្រំដែនជាង ៣៥០ វេននាក់ បានចុះជាប់មូលដ្ឋានដោយផ្ទាល់ សហការជាមួយកងកម្លាំងនានា និងកៀរគរអេស្កាវ៉ាទ័រជាច្រើនគ្រឿងរបស់សហគ្រាស ដើម្បីប្រមូល សម្អាត និងឈូសឆាយដីថ្ម សម្រួលចរាចរណ៍ខ្សែផ្លូវគមនាគមន៍។
កងកម្លាំងទាំងឡាយក៏បានរៀបចំកាប់សម្អាតដើមឈើរលំ ចងខ្សែ បោះស្លាកព្រមាននៅតាមតំបន់ដែលជន់លិចជ្រៅ និងមានហានិភ័យបាក់ដី ព្រមទាំងជួយគាំទ្រការជម្លៀសជាបន្ទាន់នូវបណ្តាគ្រួសារដែលរងផលប៉ះពាល់ទៅកាន់ទីទួលសុវត្ថិភាពផងដែរ។
ទន្ទឹមនឹងភារកិច្ចសង្គ្រោះបន្ទាន់ បណ្តាប៉ុស្តិ៍ការពារព្រំដែនបន្តដាក់ឱ្យដំណើរការនូវវិធានការឆ្លើយតបនឹងព្យុះភ្លៀង ផ្តល់យោបល់ជូនគណៈកម្មាធិការបក្ស និងអាជ្ញាធរមូលដ្ឋាន បង្កើនការឃោសនា ចលនាប្រជាពលរដ្ឋឱ្យម្ចាស់ការបង្ការ និងជៀសវាងគ្រោះមហន្តរាយធម្មជាតិ៕
 GNI គាំទ្រការសម្លាប់មេរោគ និងការការពារជំងឺសម្រាប់គ្រួសារជាង ១,០០០ បន្ទាប់ពីព្យុះទី ៣ នៅ Tuyen Quang យុគសម័យ - ក្នុងរយៈពេលពីរថ្ងៃពីថ្ងៃទី ២៦-២៧ ខែកញ្ញា អង្គការ Good Neighbors International (GNI) បានផ្តល់ជំនួយការសម្លាប់មេរោគ និងការការពារជំងឺដល់ ១,០៤១ គ្រួសារដែលរងផលប៉ះពាល់ដោយព្យុះលេខ ៣ (Yagi) នៅស្រុក Son Duong ខេត្ត Tuyen Quang ។ តម្លៃសរុបនៃការឧបត្ថម្ភគឺជិត ៣២០ លានដុង ជួយដល់គ្រួសារក្នុងឃុំចំនួន ៦ ដែលរងគ្រោះដោយសារខ្យល់ព្យុះ និងទឹកជំនន់។ |
 កម្មវិធីតន្ត្រី «Bond Live in Vietnam» គាំទ្រប្រជាជនដែលរងផលប៉ះពាល់ដោយសារព្យុះ និងទឹកជំនន់ សមាជិកចំនួន ៤ នាក់នៃក្រុមតន្ត្រីនារី Bond (ចក្រភពអង់គ្លេស) ដ៏ល្បីល្បាញលើពិភពលោក បានមកទីក្រុងហាណូយ ដើម្បីសម្តែងក្នុងកម្មវិធី “Bond Live in Vietnam” ដែលប្រព្រឹត្តទៅនៅម៉ោង ៨ យប់ ថ្ងៃទី ៥ ខែតុលា នៅមជ្ឈមណ្ឌលសន្និសីទជាតិ ដែលរៀបចំដោយកាសែត Nhan Dan (ប្រជាជន) និង IB Group Vietnam។ |
មតិពីមិត្តអ្នកអាន