យុគសម័យ - ក្នុងរយៈពេល ៨ ខែកន្លងមកនេះ ប្រទេសវៀតណាមបានទាក់ទាញការវិនិយោគផ្ទាល់ពីបរទេស (FDI) ជិត ២០ ពាន់លានដុល្លារពោលគឺធ្លាក់ចុះ ១៣% បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។
យោងតាមរបាយការណ៍ស្តីពីការទាក់ទាញវិនិយោគផ្ទាល់ពីបរទេសដោយក្រសួងផែនការនិងវិនិយោគ គិតត្រឹមថ្ងៃទី ២០ ខែសីហាឆ្នាំ ២០២០ ដើមទុនដែលបានចុះបញ្ជីថ្មី តម្រែតម្រង់ឲ្យសមដើមទុន ការរួមចំណែកដើមទុន ការទិញភាគហ៊ុនលើទូទាំងប្រទេសសម្រេចបានជិត ២០ ពាន់លានដុល្លារអាមេរិក ធ្លាក់ចុះជាង ១៣% បើធៀបនឹងរយៈពេលដូចគ្នាកាលពីឆ្នាំមុន។ ដើមទុនវិនិយោគដែលបានវិនិយោគជិត ១១,៤ ពាន់លានដុល្លារអាមេរិក។
ការវិនិយោគផ្ទាល់ពីបរទេសជិត ៨ ពាន់លានដុល្លារ ដែលបានហូរចូលប្រទេសវៀតណាមក្នុងរយៈពេល ៨ ខែកន្លងមកនេះ។ (រូបថត៖ ឧទាហរណ៍)
គួរកត់សម្គាល់ថា គម្រោងចំនួន ១.៧៩៧ ត្រូវបានផ្តល់លិខិតបញ្ជាក់នូវការវិនិយោគថ្មីដែលមានដើមទុនចុះបញ្ជីសរុបចំនួន ៩,៧៣ ពាន់លានដុល្លារពោលគឺថយចុះ ២៥ % នៃចំនួនគម្រោង ប៉ុន្តែកើនឡើង ៦,៦% នៃតម្លៃក្នុងរយៈពេលដូចគ្នាកាលពីឆ្នាំមុន។គម្រោងចំនួន ៧១៨ ដែលបានចុះបញ្ជីដើម្បីតម្រែតម្រង់ដើមទុនវិនិយោគឈានដល់ជិត ៤,៩៣ ពាន់លានដុល្លារអាមេរិក កើនឡើងជាង ២២% នៃតំលៃក្នុងរយៈពេលដូចគ្នានៃឆ្នាំ ២០១៩។
លើសពីនេះក្នុងរយៈពេល ៨ ខែកន្លងមក ប្រទេសវៀតណាមមានការួមចំណែកដើមទុន ទិញភាគហ៊ុនចំនួន ៤,៨០៤ ដង ដោយគិតជាទឹកប្រាក់សរុបចំនួន ៤,៩៣ ពាន់លានដុល្លារពោលគឺធ្លាក់ចុះប្រមាណពាក់កណ្តាល បើប្រៀបធៀបនឹងរយៈពេលដូចគ្នាក្នុងឆ្នាំ ២០១៩ ។
ឧស្សាហកម្មឈានមុខគេក្នុងការទាក់ទាញវិនិយោគផ្ទាល់ពីបរទេសក្នុងរយៈពេល ៨ ខែ កន្លេងមកគឺឧស្សាហកម្មកែច្នៃនិងផលិតកម្មដោយមានទុនវិនិយោគសរុបជាង ៩,៣ ពាន់លានដុល្លារ ស្មើនឹង ៤៧,៧% នៃដើមទុនវិនិយោគដែលបានចុះបញ្ជីសរុប។ ក្រោយនេះគឺការផលិតការ ចែកចាយអគ្គិសនីអចលនទ្រព្យ លក់ដុំនិងរាយ ...
ក្នុងចំណោម ១០៦ ប្រទេសនិងដែនដីដែលមានសកម្មភាពវិនិយោគចូលនៅវៀតណាម ប្រទេសសិង្ហបុរីឈរលំដាប់ទី ១ ដោយមានដើមទុនវិនិយោគសរុបជាង ៦,៥ ពាន់លានដុល្លារដែលស្មើនឹងជិត ៣៤% នៃការវិនិយោគ FDI សរុប។ ប្រទេសកូរ៉េខាងត្បូងឈរនៅលំដាប់ទី ២ ដោយមានដើមទុនវិនិយោគសរុបចំនួន ២,៩៧ ពាន់លានដុល្លារអាមេរិក ដែលស្មើនឹងជាង ១៥% ។ ប្រទេសចិនឈរនៅលំដាប់ទី ៣ ដោយមានដើមទុនវិនិយោគសរុបដែលបានចុះបញ្ជីជិត ១,៨ ពាន់លានដុល្លារ ស្មើនឹងប្រមាណ ៩% ./.（បកប្រែដោយឌីណា）
មតិពីមិត្តអ្នកអាន