យុគសម័យ - នារសៀលថ្ងៃទី ២២ ខែកក្កដាឆ្នាំ ២០២០ សមាគមសហគ្រាសអឺរ៉ុបនៅវៀតណាម (EuroCham) បានប្រកាសការស្ទង់មតិចុងក្រោយរបស់ខ្លួនស្តីពីសន្ទស្សន៍បរិយាកាសអាជីវកម្ម (BCI) នៅក្នុងត្រីមាសទី ២ ឆ្នាំ ២០២០។ តាមនោះ មេដឹកនាំនៃសហគ្រាសអឺរ៉ុបបានវាយតម្លៃវិជ្ជមានបន្ថែមទៀតអំពីបរិយាកាសវិនិយោគនិងពាណិជ្ជកម្មរបស់វៀតណាមក្នុងរយៈពេលប៉ុន្មានខែបន្ទាប់ពីវិបត្តិ Covid-19។
សហគ្រាសអឺរ៉ុបចំនួន ២៥% ទទួលបានអត្ថប្រយោជន៍ពីការពន្យាពន្ធរបស់រដ្ឋាភិបាលវៀតណាម។
ក្នុងអំឡុងពេលនៃជំងឺរាតត្បាត Covid-19 ការរឹតត្បិតការធ្វើដំណើរនិងការរក្សាគម្លាតសង្គមបាននាំឱ្យមានការរំខានដល់ប្រតិបត្តិការអាជីវកម្មធម្មតា។ ក្នុងត្រីមាសទី ១ ឆ្នាំ ២០២០ សន្ទស្សន៍ BCI របស់វៀតណាមដែលអង្កេតដោយ EuroCham បានធ្លាក់ចុះដល់កំរិតទាបបំផុតមិនធ្លាប់មាន ដោយសម្រេចបានកម្រិត ២៧ ភាគរយ។
ទោះយ៉ាងណាក៏ដោយ ដោយមានវិធានការសេដ្ឋកិច្ចនិងសុខភាពសាធារណៈជាបន្តបន្ទាប់ដែលត្រូវបានចាត់ទុកថាមានប្រសិទ្ធភាពបំផុតនៅលើពិភពលោក របស់រដ្ឋាភិបាល វៀតណាមបានបើកដំណើរការវិនិយោគនិងសកម្មភាពអាជីវកម្មឡើងវិញ។
ជាមួយនឹងនិន្នាការនោះ ចិត្តសាស្ត្រវិជ្ជមានរបស់មេដឹកនាំសហគ្រាសអឺរ៉ុបចាប់ផ្តើមងើបឡើងវិញដោយទទួលបានការកើនឡើង ៧ ភាគរយចាប់ពីខែកុម្ភៈដល់ខែមេសា ដែលសម្រេចបានកម្រិត ៣៤ ភាគរយ។ លើសពីនេះទៅទៀត សហគ្រាសអឺរ៉ុបជាង ២៥% បានទទួលអត្ថប្រយោជន៍ពីការពន្យាពន្ធរបស់រដ្ឋាភិបាល ខណៈដែលប្រមាណ ២០% បានទទួលអត្ថប្រយោជន៍ពីការកាត់បន្ថយការជួលដីធ្លីនិងផ្អាកការបង់ថ្លៃធានារ៉ាប់រងសង្គម។
ប្រធាន EuroCham លោក Nicolas Audier បានមានប្រសាសន៍ថា ការសន្ទស្សន៍ BCI លើកនេះ គឺជាសក្ខីភាពមួយដែលបង្ហាញថា វៀតណាមគឺជាប្រទេសមួយក្នុងចំណោមប្រទេសលើពិភពលោកដែលទទួលបានជោគជ័យបំផុតនៅក្នុងការឆ្លើយតបនឹងជំងឺរាតត្បាត Covid-19 ដោយបង្កើនការជឿទុកចិត្តរបស់មេដឹកនាំសហគ្រាសអឺរ៉ុប។
ទោះជាយ៉ាងណាក៏ដោយ ជំងឺរាតត្បាត Covid-19 នៅតែមានភាពស្មុគស្មាញនៅក្នុងប្រទេសដទៃទៀត ខណៈដែលពាណិជ្ជកម្មសកលដែលត្រូវការសម្រាប់កំណើនសេដ្ឋកិច្ចក្នុងស្រុកនឹងបង្កបញ្ហាប្រឈមធ្ងន់ធ្ងរមួយចំនួនសម្រាប់វៀតណាម។ ប្រការនេះ តម្រូវឱ្យវៀតណាមមានដំណោះស្រាយច្នៃប្រឌិតបន្ថែមទៀតដើម្បីដោះស្រាយបញ្ហាបន្ទាន់មួយចំនួនដូចជាការនាំអ្នកជំនាញបរទេសមកធ្វើការនៅសហគ្រាសនិងអង្គការអន្តរជាតិនានា៕（បកប្រែដោយសាមេត）
（ប្រភពព័ត៌មាន: baoquocte.vn）
មតិពីមិត្តអ្នកអាន