យុគសម័យ - សភាអង់គ្លេសបានអនុម័តលើច្បាប់មួយ ដែលអនុញ្ញាតឱ្យអ្នកតាក់តែងច្បាប់មានសិទិ្ធស្រាវជ្រាវដោយលំអិត សូម្បីតែផ្លាស់ប្តូរសំណើររបស់នាយករដ្ឋមន្រ្តី លោកស្រី Theresa May ស្តីពីការដែលសហភាពអឺរ៉ុប (EU) បានយល់ព្រមពន្យារពេលចាកចេញពី EU របស់ទីក្រុងឡុង (ដែលត្រូវបានគេស្គាល់ដល់ជា Brexit) ដល់ថ្ងៃទី៣០ខែមិថុនាខាងមុខ។
នាយករដ្ឋមន្រ្តីអង់គ្លេស លោកស្រី Theresa May (រូបថតៈ The Independent)
ទាក់ទិននឹងបញ្ហានេះ ប្រធានក្រុមចរចានៃសហភាពអឺរ៉ុបអំពីបញ្ហា Brexit លោក Michel Barnier បានអះអាងថា សហភាពអឺរ៉ុបបានគាំទ្រយ៉ាងពេញទំហឹងចំពោះ អៀឡង់ ទោះបីជាមានអ្វីៗកើតឡើងចំពោះ Brexit ក៏ដោយ។
ថ្លែងក្នុងអំឡុងពេលធ្វើទស្សនកិច្ចនៅទីក្រុង Dublin របស់អៀរឡង់ លោក Barnier បាននិយាយថា ក្នុងករណី Brexit "គ្មានកិច្ចព្រមព្រៀង" EU នឹងមិនបើកការចរចាពាណិជ្ជកម្មណាមួយឡើយ ដរាបណាបញ្ហាព្រំដែនអៀរឡង់ត្រូវបានដោះស្រាយរួចរាល់។
ទន្ទឹមជាមួយគ្នានេះ ប្រធានក្រុមចរចា EU ក៏បានសម្តែងក្តីសង្ឃឹមផងដែរថា ការចរចាសម្រាប់ដោះស្រាយវិបត្តិរវាងគណៈបក្សភាគីទាំងពីរនៅអង់គ្លេស នឹងនាំមកនូវលទ្ធផលវិជ្ជមាន។
នៅក្នុងសន្និសីទសារព័ត៌មានមួយជាមួយនាយករដ្ឋមន្ត្រីអៀរឡង់ Leo Varadkar លោក Barnier បានឲ្យដឹងថា "យើងទាំងអស់គ្នាសុទ្ធតែសង្ឃឹមថា ការចរចារទាំងនេះនឹងនាំមកនូវលទ្ធផលវិជ្ជមាន។ ខ្ញុំធ្លាប់បាននិយាយច្រើនដងមុននេះថា យើងអាចមានមហិច្ឆតាកាន់តែច្រើនថែមទៀតអំពីទំនាក់ទំនងអនាគតរបស់យើងជាមួយចក្រភពអង់គ្លេស”៕
(ដោយ ស្រីព្រេជ)
មតិពីមិត្តអ្នកអាន