យុគសម័យ - នារសៀលថ្ងៃទី ១៣ ខែកុម្ភៈ នៅទីស្នាក់ការរដ្ឋាភិបាលលោកនាយករដ្ឋមន្រ្តី Nguyen Xuan Phuc បានទទួលជួបលោកឯកអគ្គរដ្ឋទូត និងជាប្រធានគណៈប្រតិភូសហភាពអឺរ៉ុបប្រចាំនៅវៀតណាម Pier Giorgio Aliberti ។
លោកនាយករដ្ឋមន្រ្តី Nguyen Xuan Phuc ទទួលជួប លោកឯកអគ្គរដ្ឋទូត Pier Giorgio Aliberti។ (រូបថត៖ Vanphongchinhphu)
លោកនាយករដ្ឋមន្រ្តី Nguyen Xuan Phuc បានសម្តែងការសប្បាយរីករាយដែលសភាអឺរ៉ុប (EP) បានផ្តល់សច្ចាប័នលើកិច្ចព្រមព្រៀងពាណិជ្ជកម្មសេរីរវាងវៀតណាមនិងសហភាពអ៊ឺរ៉ុប (EVFTA) និងកិច្ចព្រមព្រៀងគាំរពារការវិនិយោគវៀតណាម - សហភាពអឺរ៉ុប (EVIPA) ដោយសម្លេងគាំទ្រខ្ពស់ ។ នេះជាព្រឹត្តិការណ៍សំខាន់ក្នុងឱកាសរំលឹកខួបលើកទី ៣០ នៃការបង្កើតទំនាក់ទំនងការទូតរវាងវៀតណាមនិង EU ។ តាងនាមរដ្ឋាភិបាលវៀតណាម លោកនាយករដ្ឋមន្រ្តីបានថ្លែងអំណរគុណដល់លោកឯកអគ្គរដ្ឋទូត Pier Giorgio Aliberti ដោយការខិតខំប្រឹងប្រែងក្នុងជម្រុញ EP ផ្តល់សច្ចាប័នលើព្រមព្រៀងទាំងពីរនេះ។ តាមរយៈលោកឯកអគ្គរដ្ឋទូត Pier Giorgio Aliberti លោកនាយករដ្ឋមន្រ្តីបានផ្ញើការថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំ និងបណ្តាសមាជិកសភាសហភាពអឺរ៉ុបដែលបានខិតខំប្រឹងប្រែង និងគាំទ្រ ដើម្បី EVFTA និង EVIPA ត្រូបានការផ្តល់សច្ចាប័ន ហើយឆ្លើយតបនឹងក្តីរំពឹងរបស់សហគមន៍សហគ្រាសនិងប្រជាជននៃភាគីទាំងពីរ។ លោកនាយករដ្ឋមន្រ្តីបានអះអាងថា រដ្ឋាភិបាល បណ្តាក្រសួង និងស្ថាប័នរបស់វៀតណាមនឹងខិតខំប្រឹងប្រែងអស់ពីសមត្ថភាព ដើម្បីបំពេញការប្តេជ្ញាចិត្តទាំងឡាយជាមួយ EU ដោយបញ្ជាក់ថាកិច្ចព្រមព្រៀងទាំងពីរនេះនឹងផ្តល់ផលប្រយោជន៍ដល់ប្រជាជននៃភាគីទាំងពីរ។
ទិដ្ឋភាពនៃជំនួបនេះ។ (រូបថត៖ Vanphongchinhphu)
ដោយឯកភាពនឹងយោបល់របស់លោកនាយករដ្ឋមន្រ្តី លោកឯកអគ្គរដ្ឋទូត Pier Giorgio Aliberti មានប្រសាសថា លទ្ធផលនេះគឺជាការខិតខំប្រឹងប្រែងរួមគ្នារបស់ភាគីទាំងពីរ។ លោកបានថ្លែងអំណរគុណចំពោះរដ្ឋាភិបាល រដ្ឋសភានិងស្ថាប័នយុត្តិធម៌របស់វៀតណាមដែលបានខិតខំធ្វើឱ្យដំណើរការនេះទទួលបានជោគជ័យ។ យោងតាមលោកឯកអគ្គរដ្ឋទូត Pier Giorgio Aliberti អោយដឹងថា ចំនួនសម្លេងគាំទ្រខ្ពស់បានបង្ហាញពីការវាយតម្លៃជាវិជ្ជមានរបស់សហភាពអឺរ៉ុបចំពោះវៀតណាម បង្ហាញទំនុកចិត្តរបស់សហគមន៍អ៊ឺរ៉ុបចំពោះដំណើរការកែទម្រង់របស់វៀតណាម។ សហគមន៍អ៊ឺរ៉ុបត្រៀមខ្លួនរួមដំណើរជាមួយវៀតណាមក្នុងដំណើរ ការនេះ។ លោកឯកអគ្គរដ្ឋទូត Pier Giorgio Aliberti ជឿជាក់ថាវៀតណាមនឹងចាប់យកឱកាសនេះ។ សហភាពអឺរ៉ុបប្តេជ្ញាចិត្តថានឹងធ្វើការយ៉ាងជិតស្និទ្ធជាមួយវៀតណាមដើម្បីអនុវត្តកិច្ចព្រមព្រៀងទាំងពីរប្រកបដោយជោគជ័យ៕
（បកប្រែដោយឌីណា）
（ប្រភពព័ត៌មាន: thoidai.com.vn）
មតិពីមិត្តអ្នកអាន