រឹតចំណងមិត្តភាពវៀតណាម - សហភាពអឺរ៉ុប និងវៀតណាម - បែលហ្ស៊ិក

ឯកអគ្គរដ្ឋទូតវៀតណាមប្រចាំនៅប៊ែលហ្សិក និងជាប្រធានប្រតិភូបេសកកម្មវៀតណាមប្រចាំនៅសហភាពអឺរ៉ុប (EU) លោក Vu Anh Quang (រូបថត៖ baotintuc)

នាថ្ងៃទី ៨ ខែកុម្ភៈ ស្ថានទូតវៀតណាមប្រចាំនៅប៊ែលហ្សិក បានរៀបចំពិធីអបអរសាទរឆ្នាំថ្មី - ឆ្នាំជូតទោស័ក ២០២០។ ឯកអគ្គរដ្ឋទូតវៀតណាមប្រចាំនៅប៊ែលហ្សិក និងជាប្រធានប្រតិភូបេសកកម្មវៀតណាមប្រចាំនៅសហភាពអឺរ៉ុប (EU) លោក Vu Anh Quang រួមទាំងអាណិកជនវៀតណាមប្រមាណ ២០០ នាក់ និងមិត្តភក្តិមកពីអង្គការរបស់ EU ក៏ដូចជាព្រះរាជាណាចក្រប៊ែលហ្សិកបានអញ្ជើញចូលរួមពិធីនេះផងដែរ។

លោកឯកអគ្គរដ្ឋទូតលោក Vu Anh Quang បានមានប្រសាសន៍ថា នាបច្ចុប្បន្ន បែលហ្ស៊ិកគឺជាទីផ្សារនាំចេញកសិកម្មធំទី ៧ របស់វៀតណាមនៅសហភាពអឺរ៉ុប។ នាឆ្នាំ ២០១៩ ទំហំនាំចេញទ្វេភាគីសម្រេចបានជាង ៣ ពាន់លានដុល្លារអាមេរិកក្នុងនោះ វៀតណាមមានអតិរេកនាំចេញពាណិជ្ជកម្មទៅកាន់ប៊ែលហ្សិកជិត ២ ពាន់លានដុល្លារអាមេរិក។ វិនិយោគិនប៊ែលហ្សិកបានវិនិយោគទឹកប្រាក់ជាង ១ ពាន់លានដុល្លារអាមេរិកចូលក្នុងប្រទេសវៀតណាម ដែលឈរនៅលំដាប់ទី ២៣ ក្នុងចំណោមប្រទេសនិងតំបន់ចំនួន ១៣១ ដែលវិនិយោគនៅវៀតណាម។

លោកឯកអគ្គរដ្ឋទូត Vu Anh Quang បានវាយតម្លៃថា ទំនាក់ទំនងវៀតណាម - សហភាពអឺរ៉ុប ក៏ដូចជាវៀតណាម - ប៊ែលហ្សិកបានអភិវឌ្ឍយ៉ាងខ្លាំងក្លាក្នុងរយៈពេលកន្លងមក។ នាបច្ចុប្បន្ន វៀតណាមគឺជាប្រទេសមួយក្នុងចំណោមបណ្តាប្រទេសអាស៊ី - ប៉ាស៊ីហ្វិក ដែលមានទំនាក់ទំនងយ៉ាងស៊ីជម្រៅនិងទូលាយជាមួយសហភាពអឺរ៉ុបក្នុងក្របខ័ណ្ឌនៃទំនាក់ទំនងភាពដៃគូសហប្រតិបត្តិការគ្រប់ជ្រុងជ្រោយទាំងក្នុងវិស័យនយោបាយ សេដ្ឋកិច្ច ពាណិជ្ជកម្ម វិនិយោគនិងការពារជាតិ-សន្តិសុខផងដែរ។

ក្នុងអាស៊ាន វៀតណាមគឺជាប្រទេសទី ៣ ដែលបានចុះហត្ថលេខាលើកិច្ចព្រមព្រៀងភាពជាដៃគូនិងកិច្ចសហប្រតិបត្តិការគ្រប់ជ្រុងជ្រោយ និងជាប្រទេសទី ២ ដែលបានចុះហត្ថលេខាលើកិច្ចព្រមព្រៀងពាណិជ្ជកម្មសេរី (EVFTA) និងកិច្ចព្រមព្រៀងគាំពារការវិនិយោគ (EVIPA) ជាមួយសហភាពអឺរ៉ុប ហើយកិច្ចព្រមព្រៀងទាំងពីរនឹង ត្រូវបានសភាអឺរ៉ុប អនុម័តលើកយោបល់ដើម្បីផ្តល់សច្ចាប័ននៅថ្ងៃទី ១២ ខែកុម្ភៈខាងមុខនេះ៕

（បកប្រែដោយ ហេង វុធ្ធី）

（បកប្រែដោយ ហេង វុធ្ធី）