យុគសម័យ - នាព្រឹកថ្ងៃទី ២១ ខែតុលានេះវេទិកាសៀងសានលើកទី ៩ ត្រូវបានប្រារព្ធឡើងជាផ្លូវការនៅទីក្រុង ប៉េកាំងប្រទេសចិន។ គណៈប្រតិភូយោធាជាន់ខ្ពស់ដឹកនាំដោយ លោកនាយឧត្តមសេនីយ៍ Ngo Xuan Lich រដ្ឋមន្ត្រីក្រសួងការពារប្រទេសវៀតណាមបានអញ្ជើញចូលរួមក្នុងវេទិកានេះ។
លោកនាយឧត្តមសេនីយ៍ Ngo Xuan Lich រដ្ឋមន្ត្រីក្រសួងការពារប្រទេសវៀតណាមបានអញ្ជើញចូលរួមក្នុងវេទិកានេះ (រូបថត៖ TTXVN)
ថ្លែងនៅក្នុងវេទិកានេះ លោកនាយឧត្តមសេនីយ៍ Ngo Xuan Lich បានមានប្រសាសន៍ថា បរិយាកាសនយោបាយនិងសន្តិសុខក្នុងតំបន់នៅតែបង្កប់កត្តាស្មុគស្មាញនិងមិនអាចទាយទុកជាមុនបានឡើង ដែលងាយបង្កបញ្ហាប្រឈមជាច្រើននិងហានិភ័យសន្តិសុខ។ ទាក់ទងនឹងស្ថានភាពសមុទ្រខាងកើត លោកនាយឧត្តមសេនីយ៍ Ngo Xuan Lich បានសង្កត់ធ្ងន់ថាតំបន់នេះមានហានិភ័យសន្តិសុខជាច្រើនដោយសារផលប៉ះពាល់នៃកត្តាជាច្រើន ដូចជាការប្រកួតប្រជែងក្នុងចំណោមប្រទេសមហាអំណាច ជម្លោះអធិបតេយ្យភាព បញ្ហាសន្តិសុខមិនមែនប្រពៃណីជាដើម។ លោកឧត្តមសេនីយ៍ Ngo Xuan Lich បន្តទៀតថាស្ថានភាពនៅសមុទ្រខាងកើតនៅតែមានភាពស្មុគស្មាញបើមិនដោះស្រាយឱ្យបានល្អទេ វានឹងប៉ះពាល់ដល់សុខសន្តិភាពនិងស្ថិរភាពក្នុងតំបន់ ព្រមទាំងធ្វើឱ្យខូចទំនុកចិត្តរវាងបណ្តាប្រទេសជាមួយគ្នា និងរារាំងដល់កិច្ចសហប្រតិបត្តិការក្នុងតំបន់ផងដែរ។
ទិដ្ឋភាពនៃវេទិកាសៀងសាន (Xianghsan) នៅទីក្រុងបេកាំងឆ្នាំ ២០១៩ (tintucvietnam.vn)
លោកនាយឧត្តមសេនីយ៍ Ngo Xuan Lich បានអះអាងថាវៀតណាមគាំទ្រនិងការពារនូវសន្តិសុខនិងសុវត្ថិភាពក្នុងការធ្វើនាវាចរណ៍និងអាកាសចរដោយសេរីនៅសមុទ្រខាងកើតដែលសមស្របតាមច្បាប់អន្តរជាតិ។ វៀតណាមប្រកាន់យ៉ាងខ្ជាប់ខ្ជួនតាមគោលនយោបាយដោះស្រាយបញ្ហាសមុទ្រខាងកើតដោយសន្តិវិធីនិងឈរលើមូលដ្ឋានច្បាប់អន្តរជាតិ ក្នុងនោះមានអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ ១៩៨២។
លោកនាយឧត្តមសេនីយ៍ Ngo Xuan Lich បានឲ្យដឹងថា នៅឆ្នាំ ២០២០ ប្រទេសវៀតណាមនឹងទទួលតំណែងជាប្រធានអាស៊ាននិងជាសមាជិកមិនអចិន្រ្តៃយ៍នៃក្រុមប្រឹក្សាសន្តិសុខអង្គការសហប្រជាជាតិ ហើយដោយស្មារតីទទួលខុសត្រូវខ្ពស់វៀតណាមស្វាគមន៍និងវាយតម្លៃខ្ពស់ចំពោះការគាំទ្រនិងកិច្ចសហប្រតិបត្តិការជាក់ស្តែងរបស់ប្រទេសទាំងក្នុងនិងក្រៅតំបន់ ដើម្បីបំពេញឲ្យបានល្អនូវបេសកកម្មដ៏សំខាន់របស់ខ្លួននាពេលខាងមុខនេះ៕（ហេង វុធ្ធី）
（ប្រភពព័ត៌មាន: vnews.gov.vn）
មតិពីមិត្តអ្នកអាន