យុគសម័យ - អញ្ជើញវាយតម្លៃអំពីកិច្ចការត្រៀមរៀបចំរបស់វៀតណាមចំពោះការឈរឈ្មោះជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិនោះ ឯកអគ្គរដ្ឋទូតឥណ្ឌូនេស៊ី លោក Triansyah Djani បានឱ្យដឹងថា: ក្នុងឆ្នាំកន្លងទៅ វៀតណាមបានត្រៀមរៀបចំយ៉ាងល្អណាស់!
ឯកអគ្គរដ្ឋទូតឥណ្ឌូនេស៊ីប្រចាំនៅអង្គការសហប្រជាជាតិ លោក Dian Triansyah Djani (ប្រភព: Getty Images)
តាមផែនការគ្រោងទុក នៅថ្ងៃ៧ មិថុនា ខាងមុខនេះ មហាសន្និបាតអង្គការសហប្រជាជាតិ នឹងមានការបោះឆ្នោតមួយ ដើម្បីជ្រើសរើសប្រទេសចំនួន៥ សម្រាប់អាសនៈជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខក្នុងអាណត្តិពីរឆ្នាំ ២០២០-២០២១ ក្នុងនោះមានអាសនៈមួយ សម្រាប់ក្រុមប្រទេសអាស៊ី-ប៉ាស៊ីហ្វិក។ បច្ចុប្បន្ននេះ វៀតណាម គឺជាបេក្ខភាពតែមួយកត់តំណាងឲ្យក្រុមអាស៊ី-ប៉ាស៊ីហ្វិកផងដែរ។
ជុំវិញបញ្ហានេះ អគ្គរដ្ឋទូតឥណ្ឌូណេស៊ី លោក Dian Triansyah Djani ដែលកំពុងតែបំពេញអាណត្តិជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិស្រាប់នោះ តាមរយៈកិច្ចសម្ភាសជាមួយអ្នកសារព័ត៌មាន បានយល់ឃើញថា វៀតណាមបានមានការត្រៀមខ្លួនទុកជាមុនយ៉ាងល្អក្នុងការប្រជែងអាសនៈនេះ។ លោកថែមជឿជាក់ថា វៀតណាមនឹងមិនមានឧបសគ្គអ្វីនៅក្នុងការបោះឆ្នោតនោះទេ។
កិច្ចប្រជុំមួយនៃអង្គការសហប្រជាជាតិ
លោកអគ្គរដ្ឋទូតរូបនេះ បានបន្តទៀតថា ក្រុមសមាជិកអាស៊ានបានឯកភាពគ្នារួចហើយក្នុងការបោះឆ្នោតគាំទ្រវៀត ណាម ដ្បិតអាស៊ាន ក៏ចង់ឲ្យរដ្ឋសមាជិករបស់ខ្លួន នាំយកសំឡេងអាស៊ានទៅកាន់ឆាកអន្តរជាតិឲ្យកាន់តែទូលាយផងដែរ។ លោក សង្កត់ធ្ងន់ថាទៀតថា បើវៀតណាម ពិតជាជាប់ឆ្នោតមែននោះ វៀតណាម នឹងអាចបំពេញការងារ និងការទទួលខុសត្រូវបានកាន់តែល្អប្រសើរ។
យ៉ាងណាក៏ដោយ លោកអគ្គរដ្ឋទូត ក៏បានក្រើនរម្លឹកដល់វៀតណាមក្នុងការត្រៀមរបៀបវារៈសម្រាប់ក្រោយនៃការជាប់ឆ្នោតផងដែរ។ នីតិវិធី និងបទបញ្ជាផ្ទៃក្នុង គឺសុទ្ធសឹងតែជាចំណុចសំខាន់ និងចាំបាច់ ដែលលោកអគ្គរដ្ឋទូតឥណ្ឌូណេស៊ី ចង់ឲ្យវៀតណាម ត្រៀមខ្លួនដោយប្រុងប្រយ័ត្ន។គួរជម្រាបបន្តិចថា សមាជិកសរុបរបស់ក្រុមប្រឹក្សាសន្តិសុខអង្គការសហប្រជាជាតិ មាន ១៥ ប្រទេស ដែលក្នុងនោះមាន៥ ប្រទេស រួមមាន ចិន បារាំង អង់គ្លេស អាមេរិក និងរុស្ស៊ី ជាសមាជិកអចិន្ត្រៃយ៍ និង១០ប្រទេស ដែលត្រូវបោះឆ្នោតជ្រើសរើសឆ្លាស់គ្នាពីតាមតំបន់ភូមិសាស្ត្រ ជាសមាជិកមិនអចិន្ត្រៃយ៍។ បច្ចុប្បន្ន ឥណ្ឌូណេស៊ី កំពុងតែបំពេញមុខងារជាសមាជិកមិនអចិន្ត្រៃយ៍ សម្រាប់អាណត្តិឆ្នាំ២០១៩-២០២០។
ជាទម្លាប់ ប្រទេសដែលត្រូវបានបោះឆ្នោតជ្រើសរើសសម្រាប់តំណាងក្នុងតំបន់ ជាប្រទេស ដែលមានកេរ្តិ៍ឈ្មោះ និងស្នាដៃច្រើននៅក្នុងឆាកអន្តរជាតិ។ វៀតណាម ធ្លាប់ត្រូវបានជ្រើសរើសឲ្យបំពេញមុខងារនេះពីមុនមកហើយគឺក្នុងឆ្នាំ២០០៨ -២០០៩ ៕
(សរុបព័ត៌មាន ដោយ ស្រីព្រេជ)
មតិពីមិត្តអ្នកអាន