ជំរុញទំនាក់ទំនងសហប្រតិបត្តិការរវាងវៀតណាមជាមួយកម្ពុជានិងម៉ាឡេស៊ី

កម្មវិធីជួបប្រាស្រ័យមិត្តភាពនិងកិច្ចសហប្រតិបត្តិការរវាងប្រជាជនវៀតណាម-កម្ពុជាលើកទី៥

ការផ្លាស់ប្តូរមិត្តភាពរវាងយុវជននៃកងកម្លាំងប្រដាប់អាវុធវៀតណាម និងកម្ពុជា

នាយករដ្ឋមន្ត្រីវៀតណាម លោក Pham Minh Chinh បានទទួលជួបឯកអគ្គរាជទូតកម្ពុជាប្រចាំនៅវៀតណាម លោកស្រី ជា គឹមថា

ក្នុងជំនួបជាមួយលោកស្រីឯកអគ្គរាជទូត ជា គឹមថា លោកនាយករដ្ឋមន្ត្រី Pham Minh Chinh បានអបអរសាទរចំពោះសមិទ្ធិផលដែលកម្ពុជាសម្រេចបានក្នុងប៉ុន្មានឆ្នាំកន្លងមក ជាពិសេសការទទួលតួនាទីជាប្រធានអាស៊ានឆ្នាំ ២០២២ ប្រកប​ដោយជោគជ័យ។ លោកនាយករដ្ឋមន្ត្រីវៀតណាម ជឿជាក់ថា កម្ពុជានឹងរៀបចំការបោះឆ្នោតជ្រើសតាំងតំណាងរាស្ត្រនីតិកាល​ទី៧ និងការប្រកួតកីឡាអាស៊ីអាគ្នេយ៍លើកទី៣២ (SEA Games 32) ប្រកបដោយជោគជ័យ។ ព្រមទាំងលោកបានបញ្ជាក់ ថា វៀតណាមត្រៀមខ្លួនជាស្រេចក្នុងការជួយគាំទ្រ និងចែករំលែកបទពិសោធន៍សម្រាប់កម្ពុជារៀបចំព្រឹត្តិការណ៍កីឡាដ៏សំខាន់ក្នុងតំបន់នេះប្រកបដោយជោគជ័យ។

លោកស្រីឯកអគ្គរាជទូត ជា គឹមថា បានសម្តែងនូវក្តីសោមនស្សរីករាយចំពោះការអភិវឌ្ឍដ៏ល្អនៃទំនាក់ទំនងនៃប្រទេសទាំងពីរក្នុងរយៈពេលប៉ុន្មានឆ្នាំកន្លងមក ជាពិសេសលទ្ធផលវិជ្ជមាននៃ “ឆ្នាំមិត្តភាពវៀតណាម-កម្ពុជា កម្ពុជា-វៀតណាម ឆ្នាំ២០២២”; លោកស្រីឯកអគ្គរាជទូតបានថ្លែងអំណរគុណចំពោះវៀតណាមដែលបានជួយកម្ពុជាក្នុងការបង្ការ និងគ្រប់គ្រងជំងឺរាតត្បាត Covid-19 និងរៀបចំកិច្ចប្រជុំកំពូលអាស៊ានប្រកបដោយជោគជ័យក្នុងឆ្នាំ ២០២២; លោកស្រីមានបំណងចង់ឲ្យវៀតណាមបន្តគាំទ្រ និងចែករំលែកបទពិសោធន៍សម្រាប់កម្ពុជារៀបចំការប្រកួតកីឡាស៊ីហ្គេមលើកទី៣២ ប្រកបដោយជោគជ័យ។ លោកស្រីបានបញ្ជាក់ថា នឹងខិតខំប្រឹងប្រែងឱ្យអស់ពីសមត្ថភាព ដើម្បីរួមចំណែកលើកកម្ពស់ទំនាក់ទំនងនៃប្រទេសទាំងពីរឱ្យកាន់តែជិតស្និទ្ធ និងមានប្រសិទ្ធភាព រួមចំណែកដល់ការអភិវឌ្ឍ និងវិបុលភាពរួមនៃប្រទេសទាំងពីរ។

លោកនាយករដ្ឋមន្ត្រី Pham Minh Chinh បានស្នើឲ្យភាគីទាំងពីរបន្តខិតខំប្រឹងប្រែងចរចារដើម្បីដោះស្រាយព្រំដែនដីគោកចំនួន ១៦% ទៀត​ ដែលមិនទាន់បានខ័ណ្ឌសីមានៅឡើយ ដើម្បីកសាងព្រំដែនប្រកបដោយសន្តិភាព មិត្តភាព កិច្ចសហប្រតិបត្តិការនិងអភិវឌ្ឍន៍។ លោកនាយករដ្ឋមន្ត្រីវៀតណាម ស្នើឲ្យភាគីកម្ពុជាបន្តយកចិត្តទុកដាក់ និងដោះស្រាយឯកសារផ្លូវច្បាប់ដល់ជនជាតិវៀតណាមនៅកម្ពុជា បង្កើតលក្ខខណ្ឌអំណោយផលសម្រាប់សហគមន៍ជនជាតិវៀតណាមប្រកបអាជីវកម្ម និង​រស់នៅប្រកបដោយស្ថិរភាពនៅកម្ពុជា។

លោកស្រីឯកអគ្គរាជទូត ជា គឹមថា ប្តេជ្ញាជំរុញការអនុវត្តប្រកបដោយប្រសិទ្ធភាពនៃកិច្ចព្រមព្រៀងសហប្រតិបត្តិការកម្រិតខ្ពស់រវាងបក្សទាំងពីរនិង និងរដ្ឋាភិបាលទាំងពីរ។ ពង្រឹងការតភ្ជាប់ខឿនសេដ្ឋកិច្ចទាំងពីរ; បន្តជំរុញការផ្លាស់ប្ដូរពាណិជ្ជកម្មទ្វេភាគី; ជំរុញពាណិជ្ជកម្មតាមព្រំដែន សហប្រតិបត្តិការអភិវឌ្ឍន៍សេដ្ឋកិច្ចនៅតាមតំបន់ព្រំដែន។ ពង្រឹងកិច្ចសហប្រតិបត្តិការលើវិស័យអប់រំ-បណ្តុះបណ្តាល ទេសចរណ៍ និងការជួបប្រាស្រ័យររវាងប្រជាជននិងប្រជាជន។

នាយករដ្ឋមន្ត្រីវៀតណាម លោក Pham Minh Chinh ទទួលជួបឯកអគ្គរដ្ឋទូតម៉ាឡេស៊ីប្រចាំនៅវៀតណាមលោក Data Tan Yang Thai

នៅក្នុងជំនួបជាមួយលោកឯកអគ្គរដ្ឋទូត Dato' Tan Yang Thai លោកនាយករដ្ឋមន្ត្រី Pham Minh Chinh វាយតំលៃខ្ពស់ចំពោះសមិទ្ធិផលក្នុងទំនាក់ទំនងរវាងប្រទេសទាំងពីរនាពេលកន្លងមក។ លោកនាយករដ្ឋមន្ត្រី Pham Minh Chinh បានស្នើ ឲ្យលោកឯកអគ្គរដ្ឋទូត Dato'Tan Yang Thai យកចិត្តទុកដាក់ និងជំរុញការផ្លាស់ប្តូរគណៈប្រតិភូជាន់ខ្ពស់និងគ្រប់លំដាប់ថ្នាក់; អនុវត្តដោយប្រសិទ្ធភាពនូវយន្តការសហប្រតិបត្តិការទ្វេភាគី; សម្របសម្រួលក្នុងការរៀបចំសកម្មភាពជាក់ស្តែងដើម្បីអបអរសាទរខួបលើកទី ៥០ នៃការបង្កើតទំនាក់ទំនងការទូតរវាងវៀតណាម និងម៉ាឡេស៊ី (១៩៧៣ -២០២៣); ជំរុញកិច្ចសហប្រតិបត្តិការលើវិស័យការពារជាតិ និងសន្តិសុខ វប្បធម៌ កីឡា ទេសចរណ៍ និងការជួបប្រាស្រ័យរវាងប្រជាជននិងប្រជាជន។

លោកឯកអគ្គរដ្ឋទូត Dato'Tan Yang Thai សន្យានឹងខិតខំប្រឹងប្រែង រួមចំណែកលើកកម្ពស់ទំនាក់ទំនងកិច្ចសហប្រតិបត្តិការរវាងប្រទេសទាំងពីរ ជាពិសេសលើវិស័យដែលប្រទេសទាំងពីរមានសក្តានុពល និងឧត្ដមភាព ដូចជាវិស័យកសិកម្ម ការអប់រំ-បណ្តុះបណ្តាល ការធ្វើបរិវត្ដកម្មឌីជីថល វិទ្យាសាស្ត្រ-បច្ចេកវិទ្យា...។ លោកឯកអគ្គរដ្ឋទូតបានឯកភាពពង្រឹងកិច្ចសហប្រតិបត្តិការនៅសមុទ្រ និងសម្របសម្រួលយ៉ាងជិតស្និទ្ធ ដើម្បីដោះស្រាយបញ្ហាប្រជានេសាទ-ទូកនេសាទ។

អំពីបញ្ហាក្នុងតំបន់ លោកឯកអគ្គរដ្ឋទូត Dato' Tan Yang Thai បានយល់ព្រមជាមួយមតិយោបល់របស់នាយករដ្ឋមន្ត្រី Pham Minh Chinh អំពីការបន្តពង្រឹងចំណងសាមគ្គីភាព និងតួនាទីមជ្ឈភាពរបស់អាស៊ាន។ រក្សាទស្សនៈរួមរបស់អាស៊ានលើបញ្ហាសមុទ្រខាងកើត ខិតខំកសាងសមុទ្រខាងកើតទៅជាសមុទ្រប្រកបដោយសន្តិភាព និងកិច្ចសហប្រតិបត្តិការ និងកសាងក្រមប្រតិបត្តិនៅសមុទ្រខាងកើត (COC) ប្រកបដោយប្រសិទ្ធភាព ស្របតាមច្បាប់អន្ដរជាតិ ជាពិសេសអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ ១៩៨២ (UNCLOS)៕

យោងតាមកាសែតកងទ័ពប្រជាជន