បន្ទាប់ពីសម្តេចតេជោ ហ៊ុន សែន នាយករដ្ឋមន្ត្រី បានសម្រេចផ្តល់នូវប្រាក់បៀវត្សរបស់សម្តេច ជូនដល់គណៈកម្មការជាតិប្រយុទ្ធប្រឆាំង នឹងជំងឺកូវីដ–១៩រួចមក មានមន្ត្រីជាន់ខ្ពស់របស់រាជរដ្ឋាភិបាល និងស្ថាប័នរដ្ឋនានា នៅទូទាំងប្រទេស បានប្រកាសបន្តបរិច្ចាគប្រាក់បៀវត្សរបស់ខ្លួនជាបន្តបន្ទាប់ ដើម្បីទប់ ស្កាត់នូវជម្ងឺ កូវីដ-១៩ ខណៈដែលជម្ងឺនេះ បានកំពុងបន្តឆ្លងនៅប្រទេសកម្ពុជា។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា
យោងតាមលិខិតរបស់សម្តេចតេជោ សម្តេចឧបនាយករដ្ឋមន្ត្រី រដ្ឋមន្ត្រី រដ្ឋលេខាធិការ អនុរដ្ឋលេខាធិការ ឧត្តមសេនីយ៍ និងថ្នាក់ដឹកនាំខេត្តនានា ផ្ញើជូនទៅកាន់ក្រសួងសេដ្ឋកិច្ច និង ហិរញ្ញវត្ថុ និងគណៈកម្មការជាតិប្រយុទ្ធប្រឆាំង នឹងជំងឺកូវីដ–១៩ បានលើកឡើងថា ដើម្បីចូលរួម ទប់ស្កាត់ក្នុងការរីករាលដាល នៃការឆ្លងនូវជម្ងឺ Covid-19 បានសម្រេចផ្តល់នូវប្រាក់ខែរបស់ខ្លួន ដោយមន្ត្រីខ្លះ៥ខែ ៦ខែ និងរហូតដល់៧ខែ។
លិខិតដែលបានចេញដាច់ដោយឡែកពីគ្នា ជាបន្តបន្ទាប់ បានលើកឡើងថា ដោយសារស្ថានភាពនៃការវិវត្តន៍របស់ជម្ងឺ Covid-19នៅព្រះរាជាណាចក្រកម្ពុជា នៅតែមិនទាន់បង្ហាញសញ្ញានៃការថមថយណាមួយនោះទេ ពួកគេសូមសម្តែងនូវសមានចិត្តតាមរយៈការស្ម័គ្រ ចិត្តជូនទៅគណៈកម្មាធិការជាតិប្រយុទ្ធប្រឆាំង នឹងជម្ងឺ Covid-19 នូវប្រាក់បៀវត្សរបស់ពួកគេ ដោយចាប់តាំងពីរខែមេសា នេះតទៅ ដោយប្រាក់បៀវត្សទាំងនោះ ត្រូវបញ្ជូនទៅកាន់គណនី របស់គណៈកម្មាធិការជាតិប្រយុទ្ធប្រឆាំង នឹងជម្ងឺ Covid-19 តាមរយៈក្រសួងសេដ្ឋកិច្ច និងហិរញ្ញវត្ថុរបស់កម្ពុជា។
សូមបញ្ជាក់ថា រហូតដល់ព្រឹកថ្ងៃទី៣ ខែមេសា ឆ្នាំ២០២០នេះ ក្រសួងសុខាភិបាលកម្ពុជាបន្តរកឃើញករណីឆ្លងវីរុសCovid-19 ចំនួន៤ករណីថ្មីបន្ថែមទៀត និងជាសះស្បើយ១ ករណីដោយរហូតដល់ពេលនេះ ចំនួនអ្នកឆ្លងវីរុសCovid-19 នៅកម្ពុជាចំនួន១១៤នាក់ ក្នុងនោះបានជាសះស្បើយ៣៥នាក់ និងកំពុងសម្រាកព្យាបាលនៅមន្ទីរពេទ្យចំនួន៧៩នាក់ ។យ៉ាងណាក៏ដោយរហូតមកដល់ពេលនេះ ពុំទាន់មានករណីអ្នកស្លាប់នៅប្រទេសកម្ពុជា ដោយ សារមេរោគ Covid-19នោះឡើយ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា
សម្តេច បានសរសេរថា សូមបងប្អូនប្រជាពលរដ្ឋអនុវត្តន៍តាមការណែនាំរបស់ក្រសួងសុខាភិបាលអោយបានត្រឹមត្រូវ ដើម្បីចូលរួមទប់ស្កាត់ការរីករាលដាលនៃជំងឺឆ្លងកូវីឌ–១៩ ដែលមិនទាន់មានសញ្ញាថមថយនៅឡើយ។
ទន្ទឹមនឹងនេះដែរ សូមក្រុមការងារគណបក្សប្រជាជនកម្ពុជា រាប់ទាំងសមាជិកព្រឹទ្ធសភា សមាជិករដ្ឋសភា និងមន្ត្រីនៃសមាជិករាជរដ្ឋាភិបាល អាជ្ញាធរ ក្រុមការងារយុវជន និងសមត្ថកិច្ចពាក់ព័ន្ធទាំងអស់បន្តចុះជួយអប់រំផ្សព្វផ្សាយវិធីបង្ការទប់ស្កាត់ជំងឺកូវីឌ–១៩ ជាប្រចាំនៅតាមមូលដ្ឋានដោយនាំទៅជាមួយនូវម៉ាស ឬក្រមា, ទឹកអាកុល, ចឹលសម្លាប់មេរោគ (Hand Sanitizer) អង្ករ, មី, ត្រីខ ចែកជូនប្រជាពលរដ្ឋក្រីក្រ ទាំងនៅក្នុងរាជធានីភ្នំពេញ និងនៅតាមមូលដ្ឋានទូទាំងប្រទេស។
កុំចាំហៅពួកគាត់អោយមកចូលរួមប្រជុំ តែសូមទៅកាន់ទីកន្លែងដែលពួកគាត់រស់នៅតែម្តង ជាពិសេសក្នុងស្ថានភាពដែលយើងទាំងអស់គ្នាកំពុងតែប្រយុទ្ធប្រឆាំងនឹងជំងឺឆ្លងកូវីឌ–១៩ នៅពេលនេះ។ អរគុណមន្ត្រីនៃរាជរដ្ឋាភិបាល សមាជិកសភា និងសមាជិកព្រឹទ្ធសភា ដែលបានលះបង់ប្រាក់បៀវត្សរ៍ចូលរួមក្នុងយុទ្ធនាការប្រយុទ្ធប្រឆាំងជំងឺកូវីឌ–១៩។
ដើម្បីសុវត្ថិភាពសុខភាពផ្ទាល់ខ្លួន និងសម្រាប់គ្រួសារ សូមបងប្អូនប្រជាពលរដ្ឋសហការជាមួយមន្ទីរសុខាភិបាល។ ក្នុងករណីមានការសង្ស័យ ហើយត្រូវការពិភាក្សាប្រឹក្សាយោបល់ សូមខលមកលេខ ១១៥ ជាបន្ទាន់៕
（សរុបដោយ ហេង វុធ្ធ）
មតិពីមិត្តអ្នកអាន