Dien Bien - គោលដៅយុទ្ធសាស្ត្រសម្រាប់ការវិនិយោគ

រូបភាពប្លង់គម្រោងខ្សែកាបវិលនៅ Dien Bien។

Dien Bien ស្ថិតនៅភាគពាយព្យនៃប្រទេសវៀតណាម គឺជាមូលដ្ឋានដែលមានសក្តានុពលលេចធ្លោជាច្រើនលើវិស័យទេសចរណ៍ប្រវត្តិសាស្ត្រ អត្តសញ្ញាណវប្បធម៌ ក៏ដូចជាសក្តានុពលអភិវឌ្ឍន៍សេដ្ឋកិច្ចលើច្រើនប្រភេទ។ ក្នុងរយៈពេលប៉ុន្មានឆ្នាំចុងក្រោយនេះ ខេត្តកំពុងផ្លាស់ប្តូរមុខមាត់យ៉ាងខ្លាំងក្លា ជាមួយនឹងគម្រោងហេដ្ឋារចនាសម្ព័ន្ធសំខាន់ៗជាច្រើនត្រូវបានអនុវត្ត។ នេះត្រូវបានចាត់ទុកថាជា “កម្លាំងរុញច្រាន” យុទ្ធសាស្ត្រ ដែលជួយពង្រីកលំហអភិវឌ្ឍន៍ ជំរុញពាណិជ្ជកម្ម ឡូជីស្ទីក (logistics) ទេសចរណ៍ និងលើកកម្ពស់សមត្ថភាពប្រកួតប្រជែងរបស់មូលដ្ឋាន។

ក្នុងរយៈពេលប៉ុន្មានឆ្នាំចុងក្រោយនេះ Dien Bien កំពុងផ្លាស់ប្តូរយ៉ាងខ្លាំងក្លា ជាមួយនឹងគម្រោងហេដ្ឋារចនាសម្ព័ន្ធសំខាន់ៗជាច្រើនត្រូវបានអនុវត្តដូចជា៖ គម្រោងមណ្ឌលកម្សាន្តខ្សែកាបវិល ផ្សារភ្ជាប់នឹងទេសចរណ៍ វប្បធម៌ និងប្រវត្តិសាស្ត្រ Dien Bien Phu (ឃុំ Muong Phang) គម្រោងតំបន់ទីក្រុងថ្មី ទេសចរណ៍សម្រាកលំហែកាយ និងសេវាកម្មកីឡា (ឃុំ Thanh Nua)។ ប្រព័ន្ធចរាចរណ៍តភ្ជាប់កាន់តែមានភាពស៊ីសង្វាក់គ្នា ជាមួយនឹងបណ្តាខ្សែផ្លូវជាតិសំខាន់ៗ កំពង់ផែអាកាស Dien Bien ត្រូវបានលើកកម្រិត និងជាពិសេសគឺគម្រោងផ្លូវល្បឿនលឿន Son La - Dien Bien - ច្រកទ្វារព្រំដែន Tay Trang កំពុងត្រូវបានជំរុញការវិនិយោគ។

លោក Nguyen Huu Tri Nghia អគ្គនាយកក្រុមហ៊ុនវិនិយោគ Mat Troi Tay Bac (សម្ព័ន្ធក្រុមហ៊ុន Sun Group) បានឱ្យដឹងថា៖ “ជាមួយនឹងការចូលរួមយ៉ាងខ្លាំងក្លារបស់ថ្នាក់ដឹកនាំខេត្ត ក៏ដូចជាអាជ្ញាធរគ្រប់ជាន់ថ្នាក់ បានបង្កើតនូវយន្តការបើកចំហរយ៉ាងខ្លាំងសម្រាប់អ្នកវិនិយោគមកសិក្សាស្រាវជ្រាវ ក៏ដូចជាវិនិយោគគម្រោងនៅ Dien Bien បង្កើតនូវយន្តការ 'ច្រកបៃតង' ដើម្បីជំរុញសកម្មភាពវិនិយោគ និងនីតិវិធីវិនិយោគនៅក្នុងខេត្ត។ នេះគឺជាកត្តាដ៏សំខាន់បំផុត ដើម្បីឱ្យយើងខ្ញុំ ក៏ដូចជាអ្នកវិនិយោគផ្សេងទៀត មានភាពកក់ក្តៅក្នុងការសិក្សាស្រាវជ្រាវ និងអនុវត្តបណ្តាគម្រោងថ្មីៗនៅក្នុងខេត្ត Dien Bien”។

ទន្ទឹមនឹងការអភិវឌ្ឍហេដ្ឋារចនាសម្ព័ន្ធ ខេត្ត Dien Bien បានកំណត់ការអភិវឌ្ឍវិស័យទេសចរណ៍ឱ្យក្លាយជាវិស័យសេដ្ឋកិច្ចមុខព្រួញ ជាមួយនឹងសសរស្តម្ភចំនួនបីគឺ៖ ទេសចរណ៍ប្រវត្តិសាស្ត្រ-ជំនឿសាសនា ទេសចរណ៍អត្តសញ្ញាណវប្បធម៌ជនជាតិ ផ្សារភ្ជាប់នឹងការស្វែងយល់ពីធម្មជាតិ និងទេសចរណ៍សម្រាកលំហែកាយ កម្សាន្ត និងថែទាំសុខភាព។ ជាពិសេស កម្រងកេរដំណែលជាតិពិសេសសមរភូមិ Dien Bien Phu ជាមួយនឹងបណ្តាទីតាំងល្បីៗដូចជា ទួល A1, រូង De Castries, បញ្ជាការដ្ឋាន Muong Phang និងវិមានជ័យជំនះ Dien Bien Phu រួមជាមួយអត្តសញ្ញាណវប្បធម៌ដ៏ពិសេសរបស់បងប្អូនជនជាតិនានា បានបង្កើតជាប្រៀបខ្លាំងដោយឡែកសម្រាប់មូលដ្ឋានក្នុងការអភិវឌ្ឍទេសចរណ៍ប្រវត្តិសាស្ត្រ វប្បធម៌ និងសម្រាកលំហែកាយ។ គម្រោងទេសចរណ៍ខ្នាតធំជាច្រើនកំពុងត្រូវបានអនុវត្ត ដែលសន្យថានឹងបង្កើតមុខមាត់ថ្មីសម្រាប់វិស័យទេសចរណ៍មូលដ្ឋាន។

នាពេលថ្មីៗនេះ ខេត្តក៏កំពុងកែលម្អបរិយាកាសវិនិយោគយ៉ាងខ្លាំងក្លា ដើម្បីបង្កលក្ខណៈងាយស្រួលសម្រាប់សហគ្រាស។

លោក Le Van Luong ប្រធានគណៈកម្មាធិការប្រជាជនខេត្ត Dien Bien បានសង្កត់ធ្ងន់ថា៖ ខេត្ត Dien Bien កំពុងមានភាពសកម្ម និងម្ចាស់ការយ៉ាងខ្លាំងក្នុងការជំរុញការកែទម្រង់រដ្ឋបាល កែលម្អបរិយាកាសវិនិយោគអាជីវកម្ម បង្កលក្ខណៈល្អបំផុតសម្រាប់អ្នកវិនិយោគ ជាមួយនឹងការប្តេជ្ញាចិត្តអនុវត្តយន្តការ “ច្រកបៃតង” កាត់បន្ថយពេលវេលាដោះស្រាយនីតិវិធីរដ្ឋបាលក្នុងវិស័យវិនិយោគបានជាង ៧០% ដាក់ចេញនូវយន្តការគោលនយោបាយពិសេសលើបណ្តាវិស័យ៖ កសិ-រុក្ខកម្ម ឧស្សាហកម្មសំណង់ ទេសចរណ៍ សេវាកម្ម គាំទ្រការវិនិយោគ និងយកចិត្តទុកដាក់លើការងាររំដោះផ្ទៃដី ដើម្បីឱ្យបណ្តាគម្រោងសុទ្ធតែត្រូវបានអនុវត្តក្នុងពេលឆាប់បំផុត។ បាវចនារួមគឺ៖ “Dien Bien ធ្វើសកម្មភាព សហគ្រាសឈានមុខ ខេត្តមានបាន ប្រជាជនមានសុភមង្គល”។

ពីទឹកដីប្រវត្តិសាស្ត្រដ៏អង់អាចក្លាហាន Dien Bien នាថ្ងៃនេះ កំពុងនាំមកនូវសេចក្តីប្រាថ្នានៃការអភិវឌ្ឍ នវានុវត្តន៍ និងនិរន្តរភាព។ ជាមួយនឹងសក្តានុពលជាច្រើន ទីតាំងយុទ្ធសាស្ត្រ រួមនឹងការប្តេជ្ញាចិត្តផ្លាស់ប្តូរថ្មីយ៉ាងខ្លាំងក្លារបស់គណៈកម្មាធិការបក្ស អាជ្ញាធរ និងប្រជាជនបណ្តាជនជាតិក្នុងខេត្ត Dien Bien កំពុងបោះជំហានបញ្ជាក់ពីឋានៈរបស់ខ្លួនជាគោលដៅដ៏ទាក់ទាញសម្រាប់អ្នកវិនិយោគ សហគ្រាស និងភ្ញៀវទេសចរក្នុងយុគសម័យអភិវឌ្ឍន៍ថ្មី៕

ពង្រឹងការតភ្ជាប់ និងណែនាំអង្គការក្រៅរដ្ឋាភិបាលបន្ថែមទៀតដែលមានសមត្ថភាព និងជំនាញគ្រប់គ្រាន់ដល់ទីក្រុង Dien Bien ដើម្បីរួមចំណែកជួយដល់ការអភិវឌ្ឍន៍សេដ្ឋក យុគសម័យ - នាថ្ងៃទី ៦ ខែវិច្ឆិកា គណៈប្រតិភូការងារនៃគណៈកម្មាធិការកិច្ចការបរទេសអង្គការមិនមែនរដ្ឋាភិបាលដឹកនាំដោយលោក Tran Phu Cuong ប្រធានគណៈកម្មាធិការសម្របសម្រួលជំនួយប្រជាជននៃសម្ព័ន្ធអង្គការមិត្តភាពវៀតណាម បានជួបពិភាក្សាការងារជាមួយគណៈកម្មាធិការប្រជាជនខេត្ត Dien Bien ដើម្បីវាយតម្លៃសកម្មភាពរបស់អង្គការក្រៅរដ្ឋាភិបាលបរទេសក្នុងមូលដ្ឋាន។

ប្រភពនៃការលើកទឹកចិត្ត និងការបំផុសគំនិតសម្រាប់ប្រជាជាតិរងការជិះជាន់ ជ័យជម្នះ Dien Bien Phu ជាជ័យជំនះរបស់ប្រជាជាតិដែលរងការជិះជាន់ទាំងអស់លើពិភពលោក។

ឌឹកអាញ់