កម្លាំងចលករខ្លាំងក្លាចំនួន ៤ ដែលជំរុញការផ្លាស់ប្តូររវាងប្រជាជន និងប្រជាជន ចិន - កូរ៉េខាងត្បូង

ដំណឹងរីករាយជាបន្តបន្ទាប់

អត្ថបទដកស្រង់ទិន្នន័យចុងក្រោយបង្អស់បានបង្ហាញថា ក្នុងត្រីមាសទីមួយនៃឆ្នាំនេះ មានភ្ញៀវទេសចរចិនចំនួន ១,៤៥ លាននាក់ បានទៅទស្សនាកូរ៉េខាងត្បូង កើនឡើង ២៩%។ ទន្ទឹមនឹងនោះ មានភ្ញៀវទេសចរកូរ៉េខាងត្បូងជាង ២,៦៦ លាននាក់ បានមកកម្សាន្តនៅប្រទេសចិន ដែលសញ្ញានេះបង្ហាញពីការកើនឡើង ២៤,១% បើធៀបនឹងរយៈពេលដូចគ្នាកាលពីឆ្នាំមុន។

តាមរយៈតួលេខវិជ្ជមានទាំងនេះ អាចសន្និដ្ឋានបានថា៖ ការផ្លាស់ប្តូររវាងប្រជាជន និងប្រជាជន ចិន និងកូរ៉េខាងត្បូង កំពុងឆ្លងកាត់ដំណាក់កាលបង្កើនល្បឿនដែលមានលក្ខណៈរចនាសម្ព័ន្ធ។

កាលពីខែវិច្ឆិកា ឆ្នាំ ២០២៤ ប្រទេសចិនបានដាក់ចេញនូវគោលនយោបាយលើកលែងទិដ្ឋាការ (visa) សម្រាប់ពលរដ្ឋកូរ៉េខាងត្បូង ហើយបន្ទាប់មក កូរ៉េខាងត្បូងបានអនុវត្តគោលនយោបាយចូលប្រទេសដោយមិនចាំបាច់មានទិដ្ឋាការសម្រាប់ក្រុមភ្ញៀវទេសចរចិនក្នុងឆ្នាំ ២០២៥។ ការដាក់ចេញនូវគោលនយោបាយទាំងពីរនេះជាបន្តបន្ទាប់ បានបញ្ចេញនូវតម្រូវការផ្លាស់ប្តូរយ៉ាងច្រើន ដែលត្រូវបានរារាំងជាយូរមកហើយដោយសាររបាំងទិដ្ឋាការ។

នៅពេលដែលរបាំងគោលនយោបាយត្រូវបានដកចេញ កម្លាំងចលករនៃការផ្លាស់ប្តូរទ្វេភាគីដែលត្រូវបានសន្សំទុក ត្រូវបានគេចាត់ទុកថាបានផ្ទុះឡើងយ៉ាងឆាប់រហ័ស។ ការសម្រាកនៅចុងសប្តាហ៍ និងការធ្វើដំណើរដោយខ្លួនឯងកំពុងមានការកើនឡើង។ ភ្ញៀវទេសចរកូរ៉េខាងត្បូងកំពុងមានវ័យកាន់តែក្មេងទៅៗ ហើយគោលដៅទេសចរណ៍ត្រូវបានពង្រីកពីទីក្រុងធំៗ ទៅកាន់ទីក្រុងកំពង់ផែរបស់ចិន ដូចជា Weihai និង Qingdao ក្នុងខេត្ត Shandong ជាដើម។ អាចនិយាយបានថា ចិន និងកូរ៉េខាងត្បូង កំពុងក្លាយជាផ្នែកមួយនៃ "លំហររស់នៅចុងសប្តាហ៍" របស់គ្នាទៅវិញទៅមកកាន់តែខ្លាំងឡើង។

ការធ្វើដំណើរឆ្លងកាត់ទៅវិញទៅមករបស់យុវជន បាននាំមកនូវលទ្ធផលដោយផ្ទាល់ គឺការធ្វើសមាហរណកម្មយ៉ាងឆាប់រហ័សនៃបណ្តាម៉ាកយីហោប្រើប្រាស់។ វិស័យម្ហូបអាហារ និងភេសជ្ជៈបានដើរតួជាអ្នកត្រួសត្រាយផ្លូវនៃនិន្នាការនេះ ដោយស៊ុប Malatang និង Haidilao របស់ចិន បានបង្កើតមូលដ្ឋានអតិថិជនថេរនៅកូរ៉េខាងត្បូង។

ក្រៅពីនេះ ម៉ាកយីហោតែរបស់ចិនក៏កំពុងជ្រៀតចូលទីផ្សារនេះផងដែរ។ "រចនាបថរស់នៅបែបចិន" កំពុងក្លាយជាជម្រើសប្រចាំថ្ងៃរបស់អ្នកប្រើប្រាស់កូរ៉េខាងត្បូងកាន់តែខ្លាំងឡើង។

លំហូរនៃខ្លឹមសារវប្បធម៌ក៏កំពុងត្រូវបានពង្រីកផងដែរ។ ភាពយន្តភាគបែបស៊ើបអង្កេត ជីវិតទីក្រុង និងភាពយន្តបុរាណរបស់ចិន កំពុងវាយលុកទឹកដីកូរ៉េខាងត្បូង។ អ្វីដែលសំខាន់ជាងនេះទៅទៀត និន្នាការនៃ "ការរួមគ្នាបង្កើតថ្មី" (co-creation) កំពុងលេចរូបរាងឡើង នៅពេលដែលស្ថានីយទូរទស្សន៍ KBS បានចុះហត្ថលេខាលើទំនាក់ទំនងដៃគូយុទ្ធសាស្ត្រជាមួយស្ថានីយទូរទស្សន៍ CCTV របស់ចិន ចំណែកឯ SBS សហការជាមួយ iQIYI ហើយអ្នកច្នៃប្រឌិតមកពីប្រទេសទាំងពីរកំពុងធ្វើការរួមគ្នាក្នុងគម្រោងរួមនានា។

បទពិសោធន៍ផ្ទាល់ក៏កំពុងមានភាពស៊ីជម្រៅជាងមុនផងដែរ។ ភ្ញៀវទេសចរកូរ៉េខាងត្បូងកំពុងឈានហួសពីការទស្សនាទេសភាព មករកការស្វែងយល់ពីផ្សារពេលព្រឹក និងតំបន់លំនៅដ្ឋានដ៏សាមញ្ញរបស់ចិន។ បណ្តាបូជនីយដ្ឋានប្រវត្តិសាស្ត្រមួយចំនួននៃរដ្ឋាភិបាលបណ្តោះអាសន្ននៃសាធារណរដ្ឋកូរ៉េនៅទីក្រុងសៀងហៃ និងផ្ទះតាំងបង្ហាញនៃអង្គភាព ៧៣១ នៅទីក្រុង Harbin កំពុងក្លាយជាគោលដៅដ៏មានអត្ថន័យសម្រាប់ភ្ញៀវទេសចរកូរ៉េខាងត្បូង។

ភ្ញៀវទេសចរចិនអញ្ជើញមកដល់ប្រទេសកូរ៉េខាងត្បូងតាមរយៈនាវាទេសចរណ៍ ក្នុងថ្ងៃដំបូងនៃការអនុវត្តគោលនយោបាយលើកលែងទិដ្ឋាការ សម្រាប់ក្រុមភ្ញៀវទេសចរចិន នៅកំពង់ផែ Incheon ប្រទេសកូរ៉េខាងត្បូង នាខែកញ្ញា ឆ្នាំ ២០២៥។

កម្លាំងចលករថ្មីទាំង ៤

នៅពីក្រោយការផ្លាស់ប្តូរទាំងនេះ គឺជាកម្លាំងចលករដែលមានលក្ខណៈរចនាសម្ព័ន្ធចំនួន ៤៖

ទីមួយ ការបន្ធូរបន្ថយគោលនយោបាយបានឆ្លើយតបទៅនឹងតម្រូវការជាក់ស្តែងរបស់ប្រជាជន។ លក្ខខណ្ឌគ្រឹះរវាងចិន និងកូរ៉េខាងត្បូង ដូចជាចម្ងាយភូមិសាស្ត្រជិតស្និទ្ធ ភាពស្រដៀងគ្នានៃវប្បធម៌ និងខ្សែច្រវាក់ផ្គត់ផ្គង់ដែលផ្សារភ្ជាប់គ្នាយ៉ាងស៊ីជម្រៅ គឺតែងតែមានវត្តមានជានិច្ច។ ការអនុវត្តគោលនយោបាយលើកលែងទិដ្ឋាការ បានក្លាយជាកែវភ្នែកដ៏សំខាន់បំផុត ដើម្បីធ្វើឱ្យតម្រូវការនេះមានសកម្មភាពឡើងវិញ។

ទីពីរ ការប្រកួតប្រជែង និងសហប្រតិបត្តិការរវាងបណ្តាវិស័យឧស្សាហកម្មនៃប្រទេសទាំងពីរ បានបង្កើតនូវមូលដ្ឋានគ្រឹះយ៉ាងរឹងមាំ។ ជាក់ស្តែង ម៉ាកយីហោចិនជាច្រើននាពេលបច្ចុប្បន្ន កំពុងឈានទៅកាន់ពិភពលោកផ្អែកលើគុណភាព នវានុវត្តន៍ និងបទពិសោធន៍។ វិស័យសហប្រតិបត្តិការមួយចំនួនដែលប្រទេសទាំងពីរបានជំរុញប្រកបដោយប្រសិទ្ធភាព ដូចជា តែបែបថ្មី, ពាណិជ្ជកម្មអេឡិចត្រូនិក, ហ្គេមអេឡិចត្រូនិក ក៏ដូចជាភាពយន្ត និងទូរទស្សន៍ ត្រូវបានគេចាត់ទុកថាមានលំហសហប្រតិបត្តិការយ៉ាងធំធេង។ ប្រសិនបើគ្មានមូលដ្ឋានគ្រឹះនេះទេ ត្រឹមតែការលើកលែងទិដ្ឋាការតែមួយមុខ ក៏មិនអាចនាំមកនូវលទ្ធផលល្អប្រសើរបែបនេះដែរ។

ទីបី ភាពរស់រវើក និងភាពជឿជាក់លើខ្លួនឯងនៃជំនាន់យុវជននៃប្រទេសទាំងពីរ ដើរតួនាទីជាគន្លឹះ។ យុវជនជំនាន់ ៩០ និង ១០ របស់ចិន គឺមានភាពស៊ាំរួចទៅហើយជាមួយនឹងកម្មវិធីទូរទស្សន៍របស់កូរ៉េខាងត្បូង និង K-pop ចំណែកឯយុវជនកូរ៉េខាងត្បូងវិញ កាន់តែមានការប៉ះពាល់ច្រើនជាមួយ TikTok និងស៊ុប Malatang។ ក្នុងនាមជាអ្នកប្រើប្រាស់អ៊ីនធឺណិតយ៉ាងសកម្ម ពួកគេមិនសូវពឹងផ្អែកលើភាគីកណ្តាលក្នុងការណែនាំអំពីវប្បធម៌របស់គ្នាទៅវិញទៅមកនោះទេ ប៉ុន្តែផ្តល់អាទិភាពដល់បទពិសោធន៍ផ្ទាល់ខ្លួន។

ទីបួន បណ្តាញសារព័ត៌មានកំពុងពង្រីកខ្លួនឥតឈប់ឈរ។ កាលពីមុន ការយល់ដឹងរបស់ជនជាតិកូរ៉េខាងត្បូងអំពីប្រទេសចិន ភាគច្រើនពឹងផ្អែកលើព័ត៌មានសារព័ត៌មាននៅក្នុងស្រុក។ នាពេលបច្ចុប្បន្ន អ្នកកាសែត និង Blogger កូរ៉េខាងត្បូង កំពុងបង្កើតគណនីដោយផ្ទាល់នៅលើបណ្តាញសង្គមរបស់ចិន ដើម្បីចូលរួមក្នុងកិច្ចសន្ទនាតាមពេលវេលាជាក់ស្តែង (Real-time) ជាមួយអ្នកលេងអ៊ីនធឺណិតចិន។ ទន្ទឹមនឹងនោះ វីដេអូខ្លីៗក៏បាននាំយកនូវបញ្ជីទិញទំនិញ និងផលិតផលវប្បធម៌ទៅកាន់អ្នកប្រើប្រាស់កូរ៉េខាងត្បូងដោយផ្ទាល់ ដែលតាមរយៈនោះជួយកាត់បន្ថយបានយ៉ាងច្រើននូវមតិរើសអើងផ្សេងៗ។

អន្តរកម្មដែលកំពុងកើនឡើង កំពុងតែបំបែករបាំងដែលមើលមិនឃើញជាបណ្តើរៗ។ នៅមានសក្ដានុពលដ៏ធំធេងសម្រាប់ប្រទេសទាំងពីរក្នុងការជំរុញសហប្រតិបត្តិការលើវិស័យទេសចរណ៍ ការផ្លាស់ប្តូរវប្បធម៌ និងការផ្សារភ្ជាប់នៃយុវជន។ គន្លឹះដើម្បីរក្សា និងពង្រឹងកម្លាំងចលករនៃការផ្លាស់ប្តូររវាងប្រជាជន ចិន-កូរ៉េខាងត្បូង គឺស្ថិតនៅលើការទទួលស្គាល់ភាពខុសគ្នា និងផ្ដោតលើចំណុចស្រដៀងគ្នា ការផ្លាស់ប្តូរភាពងាយស្រួលនៃគោលនយោបាយឱ្យទៅជាការផ្លាស់ប្តូរជាក់ស្តែង និងការប្រែក្លាយការផ្លាស់ប្តូរឱ្យទៅជាការយល់ដឹងពីវប្បធម៌ និងការផ្សារភ្ជាប់គ្នាទៅវិញទៅមក៕

កិច្ចការបរទេសរវាងប្រជាជន និងប្រជាជន លើកកម្ពស់តួនាទីសំខាន់របស់ខ្លួនក្នុងកិច្ចការបរទេស និងការទូតរបស់វៀតណាម សមាជបក្សលើកទី ១៣ (ខែមករា ឆ្នាំ ២០២១) ជាលើកដំបូងបានកំណត់ថា "ការកសាងការទូតដ៏ទូលំទូលាយ និងទំនើបជាមួយនឹងសសរស្តម្ភចំនួនបី៖ ការទូតបក្ស ការទូតរដ្ឋ និងការទូតរវាងប្រជាជន និងប្រជាជន" ។ លើកកំពស់តួនាទីរបស់ខ្លួនជាសសរស្តម្ភក្នុងវិស័យការទូតវៀតណាម ចាប់តាំងពីមហាសន្និបាតបក្សលើកទី ១៣ រហូតមកដល់បច្ចុប្បន្ន ទំនាក់ទំនងការទូតរវាងប្រជាជននិងប្រជាជនទទួលបានលទ្ធផលវិជ្ជមានជាច្រើន រួមចំណែកសំខាន់ក្នុងការអនុវត្តគោលនយោបាយកិច្ចការបរទេសនៃមហាសន្និបាតបក្សលើកទី ១៣ រួមជាមួយនឹងកិច្ចការបរទេសរបស់បក្ស កិច្ចការការទូតរដ្ឋ បង្កើតចំណុចលេចធ្លោនៃទំនាក់ទំនងការទូតវៀតណាម។

ហាណូយ៖ ការហ្វឹកហ្វឺនចំណេះដឹងអំពីពិធីការទូតសម្រាប់មន្ត្រីដែលធ្វើការក្នុងវិស័យការទូតរវាងប្រជាជន និងប្រជាជន យុគសម័យ - នាថ្ងៃទី ២១ មិនា នៅទីក្រុងហាណូយ សម្ព័ន្ធអង្គការមិត្តភាពហាណូយ (HAUFO) បានរៀបចំសន្និសីទបណ្តុះបណ្តាលស្តីពីចំណេះដឹងអំពីពិធីការទូត។

ឌឹកអាញ់