ការបង្កើតកម្លាំងចលករថ្មីសម្រាប់ទំនាក់ទំនងវៀតណាម-ឥណ្ឌា

តបតាមការអញ្ជើញរបស់នាយករដ្ឋមន្ត្រីឥណ្ឌា លោក Narendra Modi អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តវៀតណាម និងជាប្រធានរដ្ឋនៃសាធារណរដ្ឋសង្គមនិយមវៀតណាម លោក To Lam ព្រមទាំងគណៈប្រតិភូជាន់ខ្ពស់វៀតណាម នឹងអញ្ជើញទៅបំពេញទស្សនកិច្ចផ្លូវរដ្ឋនៅសាធារណរដ្ឋឥណ្ឌា ចាប់ពីថ្ងៃទី ៥ ដល់ថ្ងៃទី ៧ ខែឧសភា ឆ្នាំ ២០២៦។

ការកំណត់ក្របខ័ណ្ឌកិច្ចសហប្រតិបត្តិការសម្រាប់ដំណាក់កាលបន្ទាប់

យោងតាមអនុរដ្ឋមន្ត្រីក្រសួងការបរទេស លោក Nguyen Manh Cuong ដំណើរទស្សនកិច្ចនេះ គឺជាព្រឹត្តិការណ៍កិច្ចការបរទេសដ៏សំខាន់ និងមានអត្ថន័យពិសេស។ “នេះគឺជាលើកដំបូងដែលសមមិត្តអគ្គលេខាបក្ស និងជាប្រធានរដ្ឋ អញ្ជើញទៅបំពេញទស្សនកិច្ចនៅប្រទេសឥណ្ឌាក្នុងឋានៈថ្មី ដែលប្រព្រឹត្តទៅចំឱកាសដែលប្រទេសទាំងពីរប្រារព្ធខួបលើកទី ១០ នៃការបង្កើតទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយ (២០១៦ - ២០២៦)”។

ដំណើរទស្សនកិច្ចនេះ បានបង្ហាញពីការផ្តល់តម្លៃរបស់វៀតណាមចំពោះទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយវៀតណាម-ឥណ្ឌា ក៏ដូចជាចំពោះតំបន់អាស៊ីខាងត្បូងនិយាយជារួម។

នេះក៏ជាឱកាសដ៏មានអត្ថន័យបំផុត ដើម្បីឱ្យប្រទេសទាំងពីរពង្រឹង និងបង្កើនទំនាក់ទំនងលើគ្រប់វិស័យ ព្រមទាំងរួមគ្នាពិនិត្យឡើងវិញនូវការអនុវត្តក្របខ័ណ្ឌដៃគូយុទ្ធសាស្ត្រគ្រប់ជ្រុងជ្រោយក្នុងរយៈពេល ១០ ឆ្នាំកន្លងមក ពីនោះបង្កើតនូវកម្លាំងចលករថ្មី និងកំណត់ក្របខ័ណ្ឌកិច្ចសហប្រតិបត្តិការសម្រាប់ទំនាក់ទំនងទ្វេភាគីរវាងវៀតណាម និងឥណ្ឌា ឱ្យឈានឡើងដល់កម្រិតកម្ពស់ថ្មីក្នុងដំណាក់កាលបន្ទាប់។

ទន្ទឹមនឹងនោះ ដំណើរទស្សនកិច្ចក៏បានរួមចំណែកលើកកម្ពស់ទិសដៅ និងគោលដៅរបស់វៀតណាម និងឥណ្ឌា ក្នុងការចែករំលែករួមនូវចក្ខុវិស័យ និងផលប្រយោជន៍យុទ្ធសាស្ត្រ ដើម្បីឱ្យប្រទេសនីមួយៗគឺជាអាទិភាពជាក់ស្តែងនៅក្នុងគោលនយោបាយការបរទេសរបស់គ្នាទៅវិញទៅមក ព្រមទាំងរួមគ្នាផ្លាស់ប្តូរទស្សនៈលើបញ្ហានានាដែលជាការចាប់អារម្មណ៍រួម និងបង្កើនការគាំទ្រគ្នាទៅវិញទៅមកនៅតាមវេទិកាតំបន់ និងអន្តរជាតិ។

អាចនិយាយបានថា ដំណើរទស្សនកិច្ចផ្លូវរដ្ឋនៅប្រទេសឥណ្ឌាលើកនេះ របស់លោកអគ្គលេខាបក្ស និងជាប្រធានរដ្ឋ ក៏ជាសក្ខីភាពយ៉ាងច្បាស់លាស់នៃមាគ៌ាកិច្ចការបរទេសរបស់បក្ស និងរដ្ឋយើងក្នុងសករាជថ្មី ដែលមហាសន្និបាតបក្សលើកទី ១៤ បានដាក់ចេញ។ នោះគឺឯករាជ្យ ម្ចាស់ការ ភាពខ្លួនទីពឹងខ្លួន សន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ ពហុភាគីភាវូបនីយកម្ម ជម្រុញការធ្វើចម្រុះកម្មទំនាក់ទំនងកិច្ចការបរទេស និងជាសមាជិកដែលមានការទទួលខុសត្រូវចំពោះសហគមន៍អន្តរជាតិ។

តាមរយៈដំណើរទស្សនកិច្ចនេះ យើងក៏បន្តបញ្ជាក់ថា វៀតណាមគឺជាមិត្ត ជាដៃគូដែលគួរឱ្យជឿទុកចិត្ត ជាសមាជិកសកម្ម និងមានការទទួលខុសត្រូវនៃសហគមន៍អន្តរជាតិ; ចូលរួមដោយម្ចាស់ការ និងប្រកបដោយការទទួលខុសត្រូវក្នុងការដោះស្រាយបញ្ហារួមរបស់តំបន់ និងអន្តរជាតិ។

អនុរដ្ឋមន្ត្រីក្រសួងការបរទេស លោក Nguyen Manh Cuong ឆ្លើយតបកិច្ចសម្ភាសន៍ជាមួយអ្នកសារព័ត៌មាន។

ឥណ្ឌាស្ថិតក្នុងចំណោមដៃគូពាណិជ្ជកម្មធំបំផុតទាំង ១០ របស់វៀតណាម

ក្នុងការចែករំលែកអំពីសមិទ្ធផលលេចធ្លោក្នុងទំនាក់ទំនងវៀតណាម-ឥណ្ឌានាពេលកន្លងមក និងការរំពឹងទុកចំពោះដំណើរទស្សនកិច្ចលើកនេះរបស់អគ្គលេខាបក្ស និងជាប្រធានរដ្ឋ លោក To Lam អនុរដ្ឋមន្ត្រីក្រសួងការបរទេស លោក Nguyen Manh Cuong បានសង្កត់ធ្ងន់ថា ឥណ្ឌាគឺជាដៃគូមិត្តភាពប្រពៃណីក្នុងតំបន់អាស៊ីខាងត្បូង ដែលយើងផ្តល់តម្លៃយ៉ាងខ្លាំង និងមានបំណងចង់នាំទំនាក់ទំនងឱ្យឈានឡើងដល់កម្រិតកម្ពស់ថ្មី។ ក្នុងរយៈពេលកន្លងមក ទំនាក់ទំនងវៀតណាម-ឥណ្ឌាបានអភិវឌ្ឍប្រកបដោយស្ថិរភាព សុក្រិតភាព និងកាន់តែស៊ីជម្រៅ ជាពិសេសការបង្កើតទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយវៀតណាម-ឥណ្ឌាចាប់តាំងពីឆ្នាំ ២០១៦ មក បានបង្កើតឱ្យមានការផ្លាស់ប្តូរជាគុណភាព។

នាពេលបច្ចុប្បន្ន ប្រទេសទាំងពីរមានយន្តការសហប្រតិបត្តិការទ្វេភាគីជាង ២០ លើវិស័យនានា និងបានចុះហត្ថលេខាលើឯកសារសហប្រតិបត្តិការសំខាន់ៗជាច្រើនដែលតម្រង់ទិសដៅសម្រាប់ទំនាក់ទំនង។ ទំនុកចិត្តនយោបាយត្រូវបានពង្រឹងតាមរយៈសកម្មភាពផ្លាស់ប្តូរគណៈប្រតិភូគ្រប់កម្រិត រួមទាំងកម្រិតខ្ពស់ដែលប្រព្រឹត្តទៅជាប្រចាំ កិច្ចសហប្រតិបត្តិការការពារជាតិ-សន្តិសុខមានសភាពស៊ីជម្រៅ ជាមួយនឹងសកម្មភាពបណ្តុះបណ្តាល និងហ្វឹកហ្វឺនរួមគ្នា ដែលបង្ហាញពីកម្រិតនៃទំនុកចិត្តយ៉ាងជ្រាលជ្រៅរវាងប្រទេសទាំងពីរ។

កិច្ចសហប្រតិបត្តិការសេដ្ឋកិច្ច-ពាណិជ្ជកម្មមានកំណើនយ៉ាងវិជ្ជមាន ដោយទំហំពាណិជ្ជកម្មទ្វេភាគីសម្រេចបានប្រហែល ១៥-១៦ ពាន់លានដុល្លារអាមេរិក/ឆ្នាំ ក្នុងដំណាក់កាលថ្មីៗនេះ។ ឥណ្ឌានាពេលបច្ចុប្បន្នស្ថិតក្នុងចំណោមដៃគូពាណិជ្ជកម្មធំបំផុតទាំង ១០ របស់វៀតណាម។ ការវិនិយោគរវាងភាគីទាំងពីរបានបន្តពង្រីកខ្លួនជាមួយនឹងគម្រោងជិត ៥០០ ព្រមទាំងនៅមានសក្តានុពលជាច្រើនទៀត ដើម្បីឱ្យប្រទេសទាំងពីរមានជំហានសហប្រតិបត្តិការបំបែកភាពទាល់ច្រក។

ជាពិសេស វៀតណាម និងឥណ្ឌាកំពុងពង្រីកកិច្ចសហប្រតិបត្តិការយ៉ាងខ្លាំងក្លាទៅកាន់វិស័យថ្មីៗដូចជា វិទ្យាសាស្ត្រ-បច្ចេកវិទ្យា នវានុវត្តន៍ ការបំប្លែងឌីជីថល បញ្ញាសិប្បនិម្មិត (AI) ថាមពលស្អាត និងទិន្នន័យផ្កាយរណប។ ទន្ទឹមនឹងនោះ ការផ្លាស់ប្តូរវប្បធម៌ និងការប្រាស្រ័យទាក់ទងគ្នារវាងប្រជាជន និងប្រជាជននៃប្រទេសទាំងពីរក៏កំពុងមានជំហានអភិវឌ្ឍន៍យ៉ាងខ្លាំងក្លាផងដែរ។

ក្នុងក្របខ័ណ្ឌពហុភាគី វៀតណាម និងឥណ្ឌាចែករំលែកនូវចក្ខុវិស័យរួមស្តីពីការកសាងសណ្តាប់ធ្នាប់ផ្អែកលើច្បាប់អន្តរជាតិ ពង្រឹងស្ថាប័នពហុភាគី សន្តិភាព ស្ថិរភាព និងការអភិវឌ្ឍប្រកបដោយចីរភាព។ ប្រទេសទាំងពីរក៏បានសម្របសម្រួលយ៉ាងជិតស្និទ្ធ និងគាំទ្រគ្នាទៅវិញទៅមកជាប្រចាំនៅតាមបណ្តាអង្គការ និងវេទិកាពហុភាគីក្នុងតំបន់ និងអន្តរជាតិ។

អនុរដ្ឋមន្ត្រីក្រសួងការបរទេសបានឱ្យដឹងថា ក្នុងដំណើរទស្សនកិច្ចលើកនេះ តាមការរំពឹងទុក អគ្គលេខាបក្ស និងជាប្រធានរដ្ឋ លោក To Lam នឹងមានកម្មវិធីយ៉ាងសម្បូរបែបនៅរដ្ឋធានី New Delhi និងនៅមជ្ឈមណ្ឌលសេដ្ឋកិច្ច ហិរញ្ញវត្ថុ វិទ្យាសាស្ត្របច្ចេកវិទ្យាដែលអភិវឌ្ឍបំផុតគឺទីក្រុង Mumbai។

អគ្គលេខាបក្ស និងជាប្រធានរដ្ឋ លោក To Lam នឹងរួមជាមួយថ្នាក់ដឹកនាំជាន់ខ្ពស់ឥណ្ឌា ផ្លាស់ប្តូរ និងពិភាក្សាអំពីទិសដៅយុទ្ធសាស្ត្រជំរុញកិច្ចសហប្រតិបត្តិការ បង្កើតការបំបែកភាពទាល់ច្រកលើវិស័យដែលមានសក្តានុពលដូចជា វិទ្យាសាស្ត្រ-បច្ចេកវិទ្យា នវានុវត្តន៍ ការបំប្លែងឌីជីថល សុខាភិបាល ថាមពលស្អាត ហេដ្ឋារចនាសម្ព័ន្ធ ជំរុញការប្រាស្រ័យទាក់ទងរវាងប្រជាជន វប្បធម៌ និងសាសនា...

ក្រៅពីសកម្មភាពកិច្ចពិភាក្សា និងជំនួបកម្រិតខ្ពស់រវាងថ្នាក់ដឹកនាំនៃប្រទេសទាំងពីរ សកម្មភាពដ៏រស់រវើក និងជាក់ស្តែងជាច្រើននឹងត្រូវបានរៀបចំឡើង ដូចជាវេទិកាស្តីពីហិរញ្ញវត្ថុ ការជំរុញវិទ្យាសាស្ត្របច្ចេកវិទ្យា និងនវានុវត្តន៍... "យើងរំពឹងថា នេះគឺជាឱកាសពិតប្រាកដសម្រាប់ប្រទេសទាំងពីរក្នុងការពង្រីកលំហកិច្ចសហប្រតិបត្តិការ ពង្រីកទីផ្សារពាណិជ្ជកម្ម វិនិយោគ ពង្រឹងខ្សែចង្វាក់ផ្គត់ផ្គង់ និងកិច្ចសហប្រតិបត្តិការវិទ្យាសាស្ត្រ-បច្ចេកវិទ្យា សំដៅទាក់ទាញធនធានសម្រាប់ការអភិវឌ្ឍ" លោកអនុរដ្ឋមន្ត្រី Nguyen Manh Cuong បានសង្កត់ធ្ងន់។

យោងតាមលោកអនុរដ្ឋមន្ត្រី អាចបញ្ជាក់បានថា ដំណើរទស្សនកិច្ចផ្លូវរដ្ឋនៅប្រទេសឥណ្ឌាលើកនេះរបស់លោកអគ្គលេខាបក្ស និងជាប្រធានរដ្ឋ To Lam បានបង្ហាញពីការប្តេជ្ញាចិត្តរួមក្នុងការលើកកម្ពស់ទំនាក់ទំនងមិត្តភាពប្រពៃណីវៀតណាម-ឥណ្ឌា ដែលមានប្រវត្តិសាស្ត្រយូរអង្វែង និងជម្រៅយុទ្ធសាស្ត្រ។ យើងជឿជាក់ថា ដំណើរទស្សនកិច្ចនេះនឹងក្លាយជាសញ្ញាដៅនយោបាយដ៏សំខាន់ កំណត់នូវក្របខ័ណ្ឌនៅកម្រិតកម្ពស់ខ្ពស់ជាងសម្រាប់ទំនាក់ទំនងរវាងវៀតណាម-ឥណ្ឌា ពីនោះនាំមកនូវប្រសិទ្ធភាពជាក់ស្តែងសម្រាប់ប្រជាជន សហគ្រាស រួមចំណែកដល់ការសម្រេចបាននូវគោលដៅអភិវឌ្ឍន៍ប្រកបដោយចីរភាពនៃប្រទេសនីមួយៗ និងរួមចំណែកដល់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍក្នុងតំបន់៕

នាវាលេខ២០ នៃកងទ័ពជើងទឹកវៀតណាមមកដល់ប្រទេសឥណ្ឌា ចូលរួមការហាត់សម MILAN ឆ្នាំ២០២៤ (ឥណ្ឌា)៖ បដិសណ្ឋារកិច្ចនៅ Visakhapatnam នាព្រឹកថ្ងៃទី ១៨ ខែកុម្ភៈ នាវាលេខ ២០ ក្រុមនាវាលេខ១៣២ កងពលតូចលេខ១៧២ តំបន់លេខ៣ កងទ័ពជើងទឹក និងក្រុមបេសកកម្មនៃកងទ័ពជើងទឹកប្រជាជនវៀតណាម បានចូលចតនៅកំពង់ផែក្រុង Visakhapatnam របស់ឥណ្ឌា ដើម្បីត្រៀមចូលរួមការហាត់សមកងទ័ពជើងទឹកពហុភាគី MILAN ឆ្នាំ២០២៤។

សហគ្រាស​ឥណ្ឌា​វាយតម្លៃថា វៀតណាមជាទីផ្សារមាន​សក្តានុពលមួយសម្រាប់ការអភិវឌ្ឍនៅ​អាស៊ាន បណ្តាសហគ្រាសឥណ្ឌាបានជ្រើសរើសវៀតណាម ឥណ្ឌូនេស៊ី ម៉ាឡេស៊ី និងសិង្ហបុរីដើម្បីពង្រីកការវិនិយោគរបស់ខ្លួន ពីព្រោះប្រទេសទាំងនេះគឺជាទីផ្សារដែលមានសក្តានុពលអភិវឌ្ឍន៍បំផុត ហើយបានព្យាករណ៍ថាប្រាក់ចំណូលរបស់អាជីវកម្មទាំងនេះនៅអាស៊ាននឹងកើនឡើងក្នុងរយៈពេល ១២ខែខាងមុខជាពុំខាន។

ឌឹកអាញ់