យុគសម័យ - លោកសាស្ត្រាចារ្យ Carl Thayer នៃសកលវិទ្យាល័យ New South Wales បាននិយាយអំពីតួនាទីរបស់បក្សកុម្មុយនិស្តវៀតណាមក្នុងរយៈពេល ៩០ ឆ្នាំកន្លងមកក៏ដូចជាការព្រួយបារម្ភដ៏ធំរបស់បក្សនាពេលអនាគតផងដែរ។
លោកសាស្ត្រាចារ្យ Carl Thayer (រូបថត៖ vietnamplus.vn)
ក្នុងឱកាសខួបលើកទី ៩០ នៃការបង្កើតបក្សកុម្មុយនិស្តវៀតណាម (ថ្ងៃទី ៣ ខែកុម្ភៈឆ្នាំ ១៩៣០ / ថ្ងៃទី ៣ ខែកុម្ភៈឆ្នាំ ២០២០) អ្នកយកព័ត៌មានរបស់ទីភ្នាក់ងារសារព័ត៌មានវៀតណាមប្រចាំនៅទីក្រុងស៊ីដនី (Sydney) បានសម្ភាសន៍លោកសាស្រ្តាចារ្យ Carl Thayer នៃសាកលវិទ្យាល័យ New South Wales (អូស្ត្រាលី) អំពីតួនាទីរបស់បក្សកុម្មុយនិស្តវៀតណាមក្នុងរយៈពេល ៩០ ឆ្នាំកន្លងមកក៏ដូចជាការព្រួយបារម្ភសំខាន់ៗរបស់បក្សនាពេលអនាគត។ លោកសាស្ត្រាចារ្យ Carl Thayer បានមានប្រសាសន៍ថាបក្សកុម្មុយនិស្តវៀតណាមបានអះអាងតួនាទីដឹកនាំរបស់ខ្លួនតាមរយៈព្រឹត្តិការណ៍សំខាន់ៗក្នុងការរំដោះប្រទេសជាតិឲ្យផុតពីការត្រួតត្រារបស់បរទេសនិងការបង្កើតប្រទេសវៀតណាមមួយប្រកបដោយឯកភាពនិងឯករាជ្យ។
ទាក់ទងនឹងគោលនយោបាយដែលមានសារៈសំខាន់បំផុតចំពោះការអភិវឌ្ឍន៍សេដ្ឋកិច្ចសង្គមនិងទំនាក់ទំនងអន្តរជាតិរបស់ វៀតណាមក្នុងរយៈពេលប៉ុន្មានឆ្នាំកន្លងមក លោកសាស្ត្រាចារ្យ Carl Thayer បានសង្កត់ធ្ងន់ថាគោលនយោបាយសំខាន់ដែលមានអត្ថន័យរហូតមកដល់បច្ចុប្បន្នគឺ បក្សកុម្មុយនិស្តវៀតណាមបានដឹកនាំក្នុងការផ្លាស់ប្តូរថ្មីកាលពីឆ្នាំ ១៩៨៦ ។ ប្រទេសវៀតណាមបានមានការផ្តួចផ្តើមក្នុងការអភិវឌ្ឍផលិតកម្មឯកជនដោយផ្អែកទៅលើក្រុមគ្រួសារនានា។ គោលនយោបាយនេះបាននាំឱ្យមានការកើនឡើងគួរឱ្យកត់សម្គាល់នៅក្នុងផលិតកម្មស្រូវនិងសម្របសម្រួល "ការពង្រីក" នៃឧស្សាហកម្មធុនស្រាល។ ទន្ទឹមនឹងនេះដែរប្រទេសវៀតណាមបានពង្រីកទំនាក់ទំនងពាណិជ្ជកម្មរបស់ខ្លួននិងលើកទឹកចិត្តការវិនិយោគពីបរទេស ដើម្បីជួយអភិវឌ្ឍសេដ្ឋកិច្ចទីផ្សារសង្គមនិយមរបស់ ខ្លួនផងដែរ។ កំណើនសេដ្ឋកិច្ចរបស់វៀតណាមបានកាត់បន្ថយអត្រានៃភាពក្រីក្រយ៉ាងខ្លាំងនៅពេលដែលប្រទេសវៀតណាមបានក្លាយជាខឿនសេដ្ឋកិច្ចដែលមានប្រាក់ចំណូលមធ្យមកម្រិតទាប។
យោងតាមសាស្រ្តាចារ្យ Carl Thayer ថ្នាក់ដឹកនាំវៀតណាមនឹងផ្តោតការយកចិត្តទុកដាក់យ៉ាងខ្លាំងថែមទៀតដល់ការរៀបចំសម្រាប់មហាសន្និបាតបក្សនៅទូទាំងប្រទេសលើកទី ១៣ នៅដើមឆ្នាំ ២០២១ ដើម្បីធានាឱ្យមានការផ្លាស់ប្តូរនយោបាយយ៉ាងរលូន ក៏ដូចជាការមូលមតិគ្នាលើគោលនយោបាយសេដ្ឋកិច្ចសង្គមដ៏ធំក្នុងរយៈពេល ៥ ឆ្នាំខាងមុខផងដែរ៕
（បកប្រែដោយ ហេងវុធ្ធី）
（ប្រភពព័ត៌មាន: vietnamplus.vn）
មតិពីមិត្តអ្នកអាន