យុគសម័យ - ក្នុងឱកាសនៃដំណើរទស្សនកិច្ចជាផ្លូវការនៅព្រះរាជាណាចក្រកម្ពុជា តបតាមការអញ្ជើញរបស់ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា នាព្រឹកថ្ងៃទី២៦ខែកុម្ភៈ អគ្គលេខាបក្ស ប្រធានរដ្ឋវៀតណាម លោក Nguyen Phu Trong បានអញ្ជើញជួបពិភាក្សាជាមួយប្រធានរដ្ឋសភាកម្ពុជា សម្តេច ហេង សំរិន។
នៅក្នុងជំនួបនេះ អគ្គលេខាបក្ស ប្រធានរដ្ឋវៀតណាម លោក Nguyen Phu Trong បានថ្លែងប្រាប់ សម្តេច ហេង សំរិន ប្រធានរដ្ឋសភាកម្ពុជាថា ប្រជាជន និងរាជរដ្ឋាភិបាលកម្ពុជា គឺជាផ្នែកមួយ ដែលជួយឲ្យវៀតណាមរីកចម្រើនដូចសព្វថ្ងៃនេះ។
ក្នុងការផ្តល់បទសម្ភាសន៍ជាមួយឲ្យអ្នកសារព័ត៌មាន លោក កែវ ពិសិដ្ឋ នាយកខុទ្ទកាល័យសម្តេច ហេង សំរិន បានឲ្យដឹងថា៖ នៅក្នុងជំនួបនោះ សម្តេច ហេង សំរិន បានប្រាប់ដល់អគ្គលេខាបក្ស ប្រធានរដ្ឋវៀតណាម អំពីប្រទេសកម្ពុជា ដែលទើបរៀបចំការប្រារព្ធខួបលើកទី៤០ឆ្នាំ នៃការរំដោះប្រទេស ចេញពីរបបប្រល័យពូជសាសន៍ ប៉ុល ពត។ ក្នុងន័យនេះ សម្តេច ហេង សំរិន បានថ្លែងអំណរគុណយ៉ាងខ្លាំងផងដែរ ចំពោះប្រទេសវៀតណាម ដែលបានគាំទ្រ និងលះបង់កម្លាំងកាយចិត្ត ដើម្បីជួយរំដោះប្រទេសកម្ពុជា កាលពីគ្រានោះ។
លោក កែវ ពិសិដ្ឋ បានថ្លែងទៀតថា ក្នុងនាមប្រជាជនកម្ពុជា សម្តេច ហេង សំរិន បានសម្តែងការថ្លែងអំណរគុណផងដែរ ចំពោះរដ្ឋាភិបាល និងប្រជាជនវៀតណាម ដែលបានជួយឧបត្ថម្ភគាំទ្រ ប្រជាជនកម្ពុជា នូវគ្រប់ដំណាក់កាល នៃការតស៊ូរំដោះជាតិ ដែលបានរួមចំណែកជួយស្តារ និងកសាងប្រទេសជាតិ កម្ពុជាមានការរីកចម្រើ រហូតមកដល់បច្ចុប្បន្ន។ ទន្ទឹមនឹងនេះ សម្តេចក៏បានថ្លែងអំណរគុណ ចំពោះរដ្ឋ និងប្រជាជនវៀតណាម ដែលបានផ្តល់ជំនួយជាទឹកប្រាក់ ២៥លានដុល្លារអាមេរិក ដើម្បីសាងសង់អគារធ្វើការ របស់រដ្ឋសភា១ខ្នង នៅពេលខាងមុខ។
ខាងក្រោមនេះគឺជារូបភាពនៃជំនួបរវាងអគ្គលេខាបក្ស ប្រធានរដ្ឋវៀតណាម លោក Nguyen Phu Trong និងប្រធានរដ្ឋសភាកម្ពុជា សម្តេច ហេង សំរិន៖
（ប្រភពព័ត៌មាន: យោងតាម freshnewsasia.com）
មតិពីមិត្តអ្នកអាន