យុគសម័យ - នារសៀលថ្ងៃទី ៧ ខែធ្នូ នៅទីស្នាក់ការគណៈកម្មាធិការមជ្ឈិមបក្សអគ្គលេខាបក្ស ប្រធានរដ្ឋវៀតណាម លោក Nguyen Phu Trong បានអញ្ជើញទទួលជួបជាមួយគណៈប្រតិភូជាន់ខ្ពស់នៃរាជរដ្ឋាភិបាលកម្ពុជាដឹកនាំដោយសម្តេចតេជោហ៊ុនសែននាយករដ្ឋមន្ត្រី ដែលកំពុងបំពេញទស្សនកិច្ចជាផ្លូវការនៅវៀតណាម។
អគ្គលេខាបក្ស ប្រធានរដ្ឋវៀតណាមលោក Nguyen Phu Trong អញ្ជើញទទួលជួបជាមួយនាយករដ្ឋមន្ត្រីកម្ពុជា សម្តេច តេជោ ហ៊ុនសែន (រូបថតៈ TTXVN)
ក្នុងជំនួបនេះ អគ្គលេខាបក្ស ប្រធានរដ្ឋវៀតណាម លោក Nguyen Phu Trong បានមានប្រសាសន៍ថា ប្រទេសយើងទាំងពីរវៀតណាម កម្ពុជា ធ្លាប់មានប្រពៃណីរួមរស់ជាគ្នា និងជាប្រទេសជិតខាង ធ្លាប់ប្រកៀកស្មាគ្នា តស៊ូប្រយុទ្ធជាមួយគ្នា ដូច្នេះយើងត្រូវតែខិតខំថែរក្សាពូនជ្រំ នូវទំនាក់ទំនងកិច្ច សហប្រតិបត្តិការល្អជាមួយគ្នាបន្តទៀត ជាពិសេសគឺធ្វើយ៉ាងណាឱ្យមានទំនុកចិត្តគ្នា ទៅវិញទៅមក។
អគ្គលេខាបក្ស ប្រធានរដ្ឋវៀតណាម លោក Nguyen Phu Trong ក៏បានផ្តាំផ្ញើនូវការសួរសុខទុក្ខដល់ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក៏ដូចជាសម្តេចព្រះមហាក្សត្រី នរោត្ដម មុនិនាថ សីហនុ ហើយបានបញ្ជាក់ថា វៀតណាមរីករាយ នឹងចាំទទួលព្រះរាជទស្សនកិច្ចរបស់ព្រះអង្គនៅប្រទេសវៀតណាម នាពេលខាងមុខនេះ។
ចំណែកសម្តេចតេជោហ៊ុនសែន បានជម្រាបជូនអគ្គលេខាបក្ស ប្រធានរដ្ឋវៀតណាម លោក Nguyen Phu Trong អំពីលទ្ធផលនៃជំនួបរវាងសម្តេចតេជោជាមួយ នាយករដ្ឋមន្ត្រីវៀតណាមលោក Nguyen Xuan Phuc។
រូបថតៈ TTXVN
សម្តេចនាយករដ្ឋមន្រ្តីហ៊ុនសែនបានសម្តែងសេចក្តីរីករាយចំពោះការអភិវឌ្ឍទំនាក់ទំនងរវាងភាគីទាំងពីរ រដ្ឋទាំងពីរនិងប្រជាជននៃប្រទេសទាំងពីរវៀតណាមនិងកម្ពុជាក្នុងរយៈពេល ៤០ ឆ្នាំកន្លងមកនេះ ដែលនាំមកនូវផលប្រយោជន៍ជាក់ស្តែងដល់ប្រជាជននៃប្រទេសនិមួយៗ ដើម្បីសន្តិភាព ស្ថិរភាព កិច្ចសហប្រតិបត្តិការនិងការអភិវឌ្ឍន៍នៅក្នុងតំបន់និងពិភពលោក។
សម្តេចក៏បានថ្លែងអំណរគុណយ៉ាងជ្រាលជ្រៅចំពោះការជួយឧបត្ថម្ភនិងជំនួយដ៏ថ្លៃថ្លា ទាន់ពេលវេលាប្រកបដោយប្រសិទ្ធភាពដែលប្រ ទេសវៀតណាមបានផ្តល់សម្រាប់កម្ពុជាក្នុងបុព្វហេតុនៃការរំដោះប្រទេសជាតិ ជួយសង្រ្គោះប្រទេសកម្ពុជានិងប្រជាជនកម្ពុជារួចផុតពីរបបប្រល័យពូជសាសន៍មុននេះក៏ដូចជានៅក្នុងការសាងសង់និងការអភិវឌ្ឍន៍នៃប្រទេសកម្ពុជានាពេលបច្ចុប្បន្ននេះ។
ជាមួយគ្នានេះ អគ្គលេខាបក្ស ប្រធានរដ្ឋវៀតណាមលោក Nguyen Phu Trong ក៏បានអបអរសាទរជាថ្មីម្តងទៀត ចំពោះជោគជ័យ ដែលគណបក្សប្រជាជនកម្ពុជា សម្រេចបានក្នុងការបោះ ឆ្នោត ដែលសម្តេចតេជោ ហ៊ុន សែន ត្រូវបានជ្រើសតាំងសារជាថ្មី ជានាយករដ្ឋមន្ត្រី សម្រាប់អាណត្តិទី៦នេះផងដែរ៕
（សរុបព័ត៌មាន ដោយ ស្រីព្រេជ）
មតិពីមិត្តអ្នកអាន