យុគ្គសម័យ - យោងតាមសារព័ត៌មាន Bloomberg បានឲ្យដឹងថា វៀតណាមមានសក្តានុភាពសម្រាប់កំណើនសេដ្ឋកិច្ចដោយមានល្បឿនកម្រិត ៦ ទៅ ៦,៥% ក្នុងទសវត្សរ៍ក្រោយ ជាបន្តទៀតនេះ។ ធនាគារ DBS Bank Ltd ព្យាករណ៍ថានាពេលអនាគតខណៈដែលលំហរ វិនិយោគបរទេសដ៏ខ្លាំងក្លា ហើយកំណើនផលិតភាពអាចកើតមានឡើងក្នុងរយៈពេលប៉ុន្មានឆ្នាំខាងមុខ។
Bloomberg - សេដ្ឋកិច្ចរបស់វៀតណាមអាចនឹងកើនឡើងលើសជាងប្រទេសសិង្ហបុរីនាពេលអនាគត (រូបថត៖ឧទាហរណ៍៖ giaoducthoidai.vn)
សេដ្ឋវិទូជនជាតិសិង្ហបុរី លោក Irvin បានថ្លែងក្នុងបទសម្ភាសមួយកាលពីថ្ងៃម្សិលមិញថា "ប្រសិនបើយើងអាចរក្សាបានល្បឿនកំណើននោះ សេដ្ឋកិច្ចវៀតណាមនឹងមានទម្រង់សេដ្ឋកិច្ចធំជាងសិង្ហបុរីក្នុងរយៈពេល ១០ ឆ្នាំខាងមុខ"។
រដ្ឋាភិបាលវៀតណាមរំពឹងថា ផលិតផលក្នុងស្រុកសរុប (GDP) នឹងកើនឡើងយ៉ាងហោចណាស់ ៦,៨% នៅឆ្នាំនេះ។ កំណើនសេដ្ឋកិច្ចនាពេលអនាគតនឹងជួយជំរុញបន្ថែមទៀត ដោយផ្អែកទៅលើរចនាសម្ព័ន្ធនៃចំននួនប្រជាជន កម្លាំងពលកម្មដែលធ្វើការមានប្រសិទ្ធភាព ហេដ្ឋារចនាសម្ព័ន្ធដែលមានលក្ខណៈល្អប្រសើរ និងនយោបាយមានស្ថិរភាព ដែលអាចលើកទឹកចិត្តដល់ការវិនិយោគបរទេសផងដែរ។ យោងតាមលោក Seah បានឲ្យដឹងថាការវិនិយោគផ្ទាល់ពីបរទេស (FDI) យ៉ាងរឹងមាំពីចិននិងហុងកុងក្នុងរយៈពេល ៤ ខែដើមឆ្នាំនេះ ក៏អាចគូសសញ្ញាសំរាប់ការចាប់ផ្តើម និន្នាការថ្មីផងដែរ។
គួរបញ្ជាក់ថា យោងតាមនាយកដ្ឋានស្ថិតិអាមេរិកបានឱ្យដឹងថា ការនាំចេញពីវៀតណាមទៅកាន់សហរដ្ឋអាមេរិកបានកើនឡើង ៤០,២% ក្នុងរយៈពេល ៣ ខែដើមឆ្នាំ ២០១៩ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។ Bloomberg ព្យាករណ៍ថា ប្រសិនបើសេដ្ឋកិច្ចរបស់ វៀតណាមបន្តរីកចម្រើនដូបបែបនេះ នឹងជាចំណុចដ៏អស្ចារ្យមួយដែលជួយវៀតណាមអាចមានប្រៀបខ្ពស់ជាងប្រទេសអ៊ីតាលី បារាំង អង់គ្លេស និងឥណ្ឌា ដោយមានតួនាទីជាប្រទេសនាំចេញដ៏សំខាន់ទៅកាន់សហរដ្ឋអាមេរិកផងដែរ៕
（ប្រភព៖ giaoducthoidai.vn បកប្រែដោយ ហេង វុធ្ធី）
（ប្រភពព័ត៌មាន: giaoducthoidai.vn）
មតិពីមិត្តអ្នកអាន