យុគសម័យ - ប្រទេសម៉ាឡេស៊ីបានសម្រេចចិត្ត លុបចោលការបញ្ចាំងខ្សែភាពយន្តគំនូរជីវចល រឿង Everest - The Little Snowman (Abominable)។
រូបភាពនៅក្នុងខ្សែភាពយន្ត Abominable (រូបថតៈ Bloomberg)
ទីភ្នាក់ងារសារព័ត៌មាន Reuters (នៃចក្រភពអង់គ្លេស) នៅថ្ងៃទី ២០ ខែតុលាបានអោយដឹងថា អ្នកចែកចាយខ្សែភាពយន្ត Abominable បានបញ្ជាក់ពីព័ត៌មាននេះហើយ។ ក្នុងពេលជាមួយគ្នានោះ ស្ថាប័នត្រួតពិនិត្យខ្សែភាពយន្តរបស់ប្រទេសម៉ាឡេស៊ី មិនទាន់ឡើងសម្លេងចំពោះព័ត៌មានពោលខាងលើ។
ក្នុងដំណើររឿងមានឈុតខ្លីមួយដ៏ចម្រូងចម្រាស ដោយបង្ហាញរូបផែនទីសមុទ្រខាងកើត ជាមួយនឹង ខ្សែបន្ទាត់ អណ្តាតគោ។
ខ្សែភាពយន្តរឿង “Abominable” គ្រោងនឹងចាក់បញ្ចាំងនៅប្រទេសម៉ាឡេស៊ី ចាប់ពីថ្ងៃទី ៧ ខែវិច្ឆិកាខាងមុខនេះ។ ហើយខ្សែភាពយន្តគំនូរជីវចលនេះជាការសហការផលិតរវាង DreamWorks (អាមេរិក) និងក្រុមហ៊ុនចិន Pearl Studio ដែលមានទីតាំងនៅទីក្រុងសៀងហៃ (ប្រទេសចិន)។
ឈុតនៅក្នុងខ្សែភាពយន្ត Abominable ដែលមានរូបផែនទី “ខ្សែបន្ទាត់អណ្តាតគោ” ខុសច្បាប់ (រូបភាព៖ BI)
មុននោះ វៀតណាមបានលុបចោលការបញ្ចាំងខ្សែភាពយន្តគំនូរជីវចល រឿង Abominable ពីបណ្ដារោងភាពយន្តនានា ដោយសារតែក្នុងសាច់រឿងមានរូបភាពបង្ហាញពីផែនទីសមុទ្រខាងកើត ជាមួយនឹងខ្សែបន្ទាត់អណ្តាតគោ។ រដ្ឋមន្រ្តីក្រសួងការបរទេសហ្វីលីពីនក៏បានអំពាវនាវឱ្យកាត់ឈុតវីដេអូដែលមានរូបភាពផែនទីជាមួយនឹងអ្វីដែលហៅថា “ខ្សែបន្ទាត់អណ្តាតគោ” នៅក្នុងរឿង Abominable នេះតែម្តង។
យោងតាមសេចក្តីសម្រេចរបស់តុលាការអាជ្ញាកណ្តាលទីក្រុងឡាហៃ (ហូល្លង់)ដែលចេញផ្សាយនៅថ្ងៃទី ១២ ខែកក្កដា ឆ្នាំ ២០១៦ ថា ការអះអាងរបស់ចិន អំពី “សិទ្ធិជាប្រវត្តិសាស្ត្រ” ចំពោះតំបន់សមុទ្រស្ថិតក្នុង “ខ្សែបន្ទាត់ប្រាំបួនកណាត់” គឺផ្ទុយនឹងអនុសញ្ញានៃអង្គការសហប្រជាជាតិស្តីពីច្បាប់សមុទ្រឆ្នាំ ១៩៨២ (UNCLOS)។
សាលក្រមរបស់តុលាការអាជ្ញាកណ្តាលបានបញ្ជាក់ថា ចិនគ្មានមូលដ្ឋានប្រវត្តិសាស្ត្រណាមួយឡើយ ចំពោះតំបន់សមុទ្រ នៅសមុទ្រខាងកើតទេ ហើយទីក្រុងប៉េកាំងគ្មានមូលដ្ឋានច្បាប់ណាមួយ សម្រាប់នាំចេញសេចក្តីប្រកាសអំពី “សិទ្ធិជាប្រវត្តិសាស្ត្រ” លើប្រភពធនធានទាំងអស់ នៅក្នុងអ្វីដែលទីក្រុងប៉េកាំងហៅថា “បន្ទាត់ប្រាំបួនកំណាត់” នោះទេ៕
(សរុបដោយស្រីព្រេជ)
មតិពីមិត្តអ្នកអាន