ក្នុងដំណើរឆ្ពោះទៅរកការរឹតចំណងទំនាក់ទំនងជាមួយកម្ពុជា ឯកអគ្គរដ្ឋទូតសអាមេរិកប្រចាំកម្ពុជា លោក Patrick Murphy បានជួបជាមួយរដ្ឋមន្ត្រីក្រសួងការពារជាតិលោក ទៀ បាញ់ កាលពីម្សិលមិញ ដើម្បីស្វែងរកវិធីពង្រីកកិច្ចសហប្រតិបត្តិការយោធា។
លោក Patrick Murphy បានជួបជាមួយរដ្ឋមន្ត្រីក្រសួងការពារជាតិលោក ទៀ បាញ់ ដើម្បីស្វែងរកវិធីពង្រីកកិច្ចសហប្រតិបត្តិការយោធា។ រូបថត សហការី
កិច្ចពិភាក្សាត្រូវបានធ្វើឡើងនៅទីស្តីការគណៈរដ្ឋមន្ត្រី និងមានការចូលរួមពីមន្ត្រីជាន់ខ្ពស់ក្រសួង ក៏ដូចជាអ្នកកាទូតពីស្ថានទូតអាមេរិក។
លោក Patrick Murphy បានសរសេរនៅលើបណ្តាញសង្គម Twitter កាលពីយប់មិញថា លោកបានពិភាក្សាពីវិស័សក្តានុពលជាច្រើននៃកិច្ចសហប្រតិបត្តិការសន្តិសុខ ដែលបានពង្រឹងក៏ដូចជាកិច្ចខិតខំប្រឹងប្រែងជាបន្តដើម្បីការពារអធិបតេយ្យភាពរបស់ប្រទេសកម្ពុជា។
លោក ខៀវ ឆេន នាយកខុទ្ទកាល័យ លោក ទៀ បាញ់ បានប្រាប់កាសែតខ្មែរថាមស៍បន្ទាប់ពីកិច្ចប្រជុំកាលពីម្សិលមិញថា ភាគីទាំងពីរប្តេជ្ញាបន្តកិច្ចសហប្រតិបត្តិការយោធាឡើងវិញបន្ទាប់ពីការគម្រាមកំហែងកូវីត១៩ បានថយចុះ ។
លោកបាននិយាយថា៖ «យើងបានពិភាក្សាអំពីកិច្ចសហប្រតិបត្តិការទ្វេភាគីរវាងកម្ពុជា និងសហរដ្ឋអាមេរិក»។ លោកបន្តថា៖ «បន្ទាប់ពីកូវីត១៩ ធូរស្រាល ក្រសួងការពារជាតិ និងក្រសួងការពារជាតិអាមេរិក នឹងពង្រឹងកិច្ចសហប្រតិបត្តិការយោធាដែលមានស្រាប់»។
នៅពេលសួរថាតើភាគីទាំងពីរបានពិភាក្សាអំពីការបន្តសមយុទ្ធយោធារួមគ្នារវាងប្រទេសទាំងពីរដែរឬទេ លោក ខៀវ ឆេន ថាមិនមានទេ ប៉ុន្តែទោះយ៉ាងណា លោកថាក្រុមការងារមកពីប្រទេសទាំងពីរនឹងធ្វើការលើបញ្ហានេះ។
លោកនិយាយថា៖ «ជំហររបស់យើងគឺដើម្បីពង្រឹងកិច្ចសហប្រតិបត្តិការយោធា ជាពិសេសសកម្មភាពដែលត្រូវបានរំខានចាប់តាំងពីចុងឆ្នាំ ២០១៩ និង ២០២០ នៅពេលដែលយើងកំពុងប្រឈមមុខនឹងជំងឺកូវីត-១៩» ។
អ្នកនាំពាក្យស្ថានទូតអាមេរិកលោក Arend Zwartjes បានថ្លែងតាមអ៊ីមែលកាលពីម្សិលមិញថា ក្នុងជំនួបនោះភាគីទាំងពីរបានពិភាក្សាអំពីកិច្ចសហប្រតិបត្តិការយោធាដោយនិយាយថាវាជា «កិច្ចប្រជុំប្រកបដោយផលផ្លែ»។
លោកនិយាយថា៖ «លោកឯកអគ្គរដ្ឋទូត Patrick Murphy បានជួបពិភាក្សាការងារជាមួយលោកឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិនៅថ្ងៃចន្ទ ។ ពួកគេបានពិភាក្សាពីវិស័យសក្តានុពលជាច្រើននៃកិច្ចសហប្រតិបត្តិការយោធា ហើយលោកឯកអគ្គរដ្ឋទូត Patrick Murphy បានសម្តែងនូវការប្តេជ្ញាចិត្តរបស់សហរដ្ឋអាមេរិកក្នុងការគាំទ្រអធិបតេយ្យភាពរបស់ប្រទេសកម្ពុជា»។
លោក Arend Zwartjes បានបន្ថែមថា៖ «យើងសង្ឃឹមថា យើងអាចស្វែងរកវិធីដើម្បីពង្រីកកិច្ចសហប្រតិបត្តិការរវាងយោធានិងយោធា» ។
នៅឆ្នាំ ២០១៧ សមយុទ្ធយោធារួមគ្នាជាមួយសហរដ្ឋអាមេរិកត្រូវបានលុបចោល ដែលមនុស្សជាច្រើនថា ការលុបចោលនេះដោយសារតែទំនាក់ទំនងការទូតមានភាពតានតឹង។
យ៉ាងណាក៏ដោយ ក្រសួងការពារជាតិបាននិយាយនៅពេលនោះថា ការលុបចោលនៃសមយុទ្ធយោធាអាចឱ្យរដ្ឋាភិបាល ផ្តោតលើយុទ្ធនាការជាតិប្រឆាំងគ្រឿងញៀនរយៈពេល ៦ ខែ និងការបោះឆ្នោតឃុំ-សង្កាត់ឆ្នាំ ២០១៧ ។
លោក ខៀវ ឆេន បាននិយាយថា៖ «ការគាំទ្ររបស់សហរដ្ឋអាមេរិកគឺផ្តោតលើការបណ្តុះបណ្តាលយោធា ជាពិសេសកងកម្លាំងបេសកកម្មរក្សាសន្តិភាពក្រោមឆ័ត្ររបស់អង្គការសហប្រជាជាតិ ដោយបញ្ជូនសិក្ខាកាមរបស់យើងទៅសិក្សានៅសហរដ្ឋអាមេរិក ក៏ដូចជាសមយុទ្ធយោធារួមគ្នា»។
លោកនាយករដ្ឋមន្ត្រី ហ៊ុន សែន កាលពីខែមេសា បានមានប្រសាសន៍ថា រដ្ឋាភិបាលបានស្វាគមន៍ការធ្វើសមយុទ្ធយោធាជាមួយសហរដ្ឋអាមេរិក បន្ទាប់ពីពួកគេត្រូវបានផ្អាកអស់រយៈពេលប្រហែល ៣ ឆ្នាំ។
ការលើកឡើងរបស់លោក ហ៊ុន សែន ត្រូវបានធ្វើឡើងដើម្បីឆ្លើយតបទៅនឹងការរិះគន់មួយចំនួនដែលបានចោទប្រកាន់ថា កម្ពុជាធ្វើសមយុទ្ធយោធាប្រចាំឆ្នាំជាមួយប្រទេសចិន បើទោះជាមានការរីករាលដាលនៃជំងឺកូវីត ១៩ ក៏ដោយ។
លោក ហ៊ុន សែន ថា កម្ពុជាស្វាគមន៍សមយុទ្ធ និងអ្វីក៏ដោយដែលសហរដ្ឋអាមេរិកស្នើសុំ។
លោក ហ៊ុន សែន ក៏បានអំពាវនាវឲ្យសហរដ្ឋអាមេរិកបញ្ឈប់ការយកលេសថាកម្ពុជាបានបដិសេធជំនួយយោធារបស់ខ្លួន ឬបញ្ឈប់សមយុទ្ធយោធាជាមួយខ្លួន។
អ្នកនាំពាក្យស្ថានទូតអាមេរិកកាលពីមុនបាននិយាយថា ការដែលកម្ពុជាអាចនឹងផ្តល់មូលដ្ធានទ័ពដល់ចិននៅក្នុងប្រទេសកម្ពុជា ដែលអាចមានឥទ្ធិពលខ្ពស់ខាងសេដ្ឋកិច្ច និងនយោបាយចិននៅកម្ពុជា ត្រូវបានគេចាត់ទុកថាជាការព្រួយបារម្ភពិត។
ជំនួបរវាងលោក ទៀ បាញ់ និងលោក Patrick Murphy ធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីលោក ទៀ បាញ់ បានធ្វើការរិះគន់ជាសាធារណៈដល់សហរដ្ឋអាមេរិកបន្ទាប់ពីក្រសួងរតនាគាររបស់សហរដ្ឋអាមេរិកកាលពីថ្ងៃទី ១៥ ខែកញ្ញា បានដាក់ទណ្ឌកម្មលើក្រុមហ៊ុន Union Development Group នៅកម្ពុជាដោយលោក ទៀ បាញ់ បានចាត់ទុករឿងនេះថាជា «មហិច្ឆតាភូមិសាស្ត្រនយោបាយ» របស់សហរដ្ឋអាមេរិក៕
（ប្រភពព័ត៌មាន: khmertimeskh.com）
មតិពីមិត្តអ្នកអាន