យោងតាមតួលេខពីក្រសួងពាណិជ្ជកម្មបានឱ្យដឹងថា ការនាំចេញរបស់កម្ពុជាតាមរយៈតំបន់សេដ្ឋកិច្ចពិសេសដែលមានមូលដ្ឋាននៅខេត្តស្វាយរៀង បានកើនឡើងដល់ជាង ១២៤,៨៧ លានដុល្លារក្នុងខែសីហា ដែលកើនឡើងជាង ៥៧ លានដុល្លារក្នុងខែកក្កដា។
តំបន់សេដ្ឋកិច្ចពិសេស តាយ សេង ក្នុងក្រុងបាវិត ខេត្តស្វាយរៀង។ សហការី
ផលិតផលដែលត្រូវបាននាំចេញភាគច្រើនគឺសម្លៀកបំពាក់ ស្បែកជើង កង់និងគ្រឿងបន្លាស់ ហើយភាគច្រើនត្រូវបានបញ្ជូនទៅទីផ្សារសហរដ្ឋអាមេរិក និងអឺរ៉ុប។
តួលេខបង្ហាញថាតម្លៃនាំចេញរួមគ្នាក្នុងតំបន់សេដ្ឋកិច្ចពិសេសចំនួន ៤ ក្នុងខេត្តបានកើនដល់ប្រមាណ ៦៨០ លានដុល្លារក្នុងរយៈពេល ៨ ខែដំបូង។
ខេត្ត ស្វាយរៀង ជាបណ្តាញច្រកសេដ្ឋកិច្ចដ៏សំខាន់មួយរបស់ប្រទេសដែលមានច្រកទ្វារព្រំដែនថ្មីសម្រាប់ការដឹកជញ្ជូនទំនិញ ដែលរំពឹងថានឹងបើកដំណើរការក្នុងពេលឆាប់ៗនេះ ដើម្បីសម្រួលដល់វិស័យពាណិជ្ជកម្ម និងទេសចរណ៍ ខណៈការសិក្សាលើគម្រោងផ្លូវល្បឿនលឿនភ្នំពេញ – បាវិតកំពុងដំណើរការ។ បន្ទាប់ពីក្រុមហ៊ុន China Railway International Group Co Ltd បានដាក់លទ្ធផលនៃការសិក្សាបច្ចេកទេសទៅរដ្ឋាភិបាល។
ក្រសួងកំពុងរង់ចាំលទ្ធផលនៃរបាយការណ៍សិក្សាហិរញ្ញវត្ថុពីក្រុមហ៊ុននៅពាក់កណ្តាលខែតុលា ដើម្បីយកជាមូលដ្ឋានសម្រាប់ការសម្រេចចិត្តរបស់ខ្លួន។
ក្រសួងសាធារណការ និងដឹកជញ្ជូន និងក្រសួងដឹកជញ្ជូនវៀតណាម ក៏បានចុះហត្ថលេខាលើអនុស្សរណៈនៃការយោគយល់គ្នាស្តីពីការជំរុញ និងសិក្សាផ្លូវល្បឿនលឿនភ្នំពេញ – បាវិត និងផ្លូវល្បឿនលឿនហូជីមិញ – ម៉ុកបៃផងដែរ។
លោក គី សេរីវឌ្ឍន៍ ប្រធានមជ្ឈមណ្ឌលសិក្សាចិន នៃរាជបណ្ឌិត្យសភាកម្ពុជា បានអោយដឹងថា ខេត្តនេះផ្តល់សក្តានុពលពាណិជ្ជកម្មជាមួយប្រទេសវៀតណាម និងទីផ្សារអន្តរជាតិផ្សេងទៀត ហើយនឹងក្លាយជាកន្លែងទាក់ទាញសម្រាប់ផលិតកម្ម។
លោកបន្តថា៖ «យើងមានច្រកទ្វារអន្តរជាតិបាវិតជាច្រកទេសចរណ៍ដែលហិរញ្ញវត្ថុហូរចូលពីប្រទេសវៀតណាមចូលមកក្នុងប្រទេសកម្ពុជាតាមច្រកនេះ»។
MWPT ក៏គ្រោងនឹងបើកច្រកព្រំដែនអន្តរជាតិថ្មីមួយឈ្មោះថាព្រៃវ៉រ ក្នុងខេត្តស្វាយរៀងេះ ដើម្បីកាត់បន្ថយការកកស្ទះកុងតឺន័រនៅក្នុងក្រុងបាវិត។
យោងតាមតួលេខពី MWPT ច្រកទ្វារព្រំដែនអន្តរជាតិបាវិតតាមទម្លាប់មានចន្លោះពី ២៥០ ទៅ ៣០០ កុងតឺន័រឆ្លងកាត់ក្នុងមួយថ្ងៃ ប៉ុន្តែកំឡុងពេលមានជំងឺរាតត្បាតកូវីដ-១៩ មានតែ ៧០ កុងតឺន័រឆ្លងកាត់ក្នុងមួយថ្ងៃប៉ុណ្ណោះ។
លោកថា ដោយមានច្រកព្រំដែនមួយផ្សេងទៀត ព្រៃវ៉រ នឹងជំរុញការដឹកជញ្ជូនទំនិញចេញ និងចូលប្រទេសកម្ពុជានិងវៀតណាម និងទីផ្សារអន្តរជាតិ។
លោកបន្ថែមថា៖ «ដូច្នេះ រាល់ការផលិតផលិតផលនៅក្នុងខេត្តដូចជាសម្លៀកបំពាក់ ស្បែកជើង កង់និងគ្រឿងបន្លាស់ ត្រូវបានបញ្ជូនទៅកាន់ទីផ្សារអន្តរជាតិ តាមរយៈកំពង់ផែទឹកជ្រៅរបស់វៀតណាម និងជាឱកាសសម្រាប់ប្រជាជននៅក្នុងខេត្ត ព្រោះវានិងបង្កើតការងារជាច្រើន»។
ការនាំចេញរបស់កម្ពុជាទៅកាន់ទីផ្សារអន្តរជាតិបានរងផលប៉ះពាល់ដោយជំងឺរាតត្បាតកូវីដ-១៩ ។
តួលេខពីអង្គការពាណិជ្ជកម្មក្រៅប្រទេសជប៉ុន (JETRO) បានបញ្ជាក់ថា ចាប់ពីខែមករា ដល់ខែកក្កដា ការនាំចេញរបស់កម្ពុជាទៅជប៉ុនមានតម្លៃ ៩១៤ លានដុល្លារ ធ្លាក់ចុះ ៣ ភាគរយ។ ទោះជាយ៉ាងណា ការនាំចេញទៅអាមេរិកក្នុងអំឡុងពេលនេះនៅតែបន្តកើនឡើង។
ពាណិជ្ជកម្មទ្វេភាគីរវាងកម្ពុជា និងសហរដ្ឋអាមេរិកបានកើនឡើង ១៧ ភាគរយក្នុងរយៈពេល ៧ ខែដំបូងនៃឆ្នាំនេះ ចំនួន ៣.៥៧០ លានដុល្លារ នេះបើយោងតាមការិយាល័យស្ថិតិរបស់សហរដ្ឋអាមេរិក។
របាយការណ៍បានបង្ហាញថា ចាប់ពីខែមករា ដល់ខែកក្កដា ការដឹកជញ្ជូនរបស់កម្ពុជាទៅកាន់ប្រទេសដែលមានសេដ្ឋកិច្ចធំជាងគេលើពិភពលោកបានកើនឡើងដល់ ៣.៤០០ លានដុល្លារ កើនឡើងចំនួន ២៤ ភាគរយ។
លោកនិយាយថា មូលហេតុដែលការនាំចេញទៅកាន់ទីផ្សារអន្តរជាតិមួយចំនួនបានធ្លាក់ចុះ គឺដោយសារតែក្រុមហ៊ុនអាកាសចរណ៍បិទជើងហោះហើរ និងដឹកជញ្ជូនកំឡុងពេលមានជំងឺរាតត្បាតកូវីដ-១៩ ។
លោកបន្តថា៖ «វាមិនរងផលប៉ះពាល់ដោយភាពតានតឹងរវាងអាមេរិក និងចិនទេ ហើយកំពុងផ្តល់នូវការផ្លាស់ប្តូរវិជ្ជមានសម្រាប់ប្រទេសនេះ ដូចជាការផ្លាស់ប្តូររោងចក្រពីប្រទេសចិនមកប្រទេសកម្ពុជា»៕
（ប្រភពព័ត៌មាន: khmertimeskh.com）
មតិពីមិត្តអ្នកអាន