នាពេលថ្ងៃទី ២១ ខែកក្កដាឆ្នាំ ២០២០ ក្នុងឱកាសចុះសំណេះសំណាលជាមួយកសិករនៅស្រុកព្រៃកប្បាស ខេត្តតាកែវដោយមានវត្តមានឯកអគ្គរដ្ឋទូតអូស្ត្រាលី លោក Pablo Kang លោកនាយករដ្ឋមន្ត្រី ហ៊ុន សែន បានថ្លែងអំណរគុណចំពោះអូស្ត្រាលី តាមរយៈឯកឧត្តមអគ្គរដ្ឋទូត។ ទន្ទឹមនឹងនេះ លោកក៏បានបញ្ជាទិញម៉ាស៊ីនសាបព្រោះស្រូវចំនួន ២ ពាន់គ្រឿងបន្ថែមទៀតពីអូស្ត្រាលីសម្រាប់ចែកជូនដល់កសិករប្រើប្រាស់។
លោកនាយករដ្ឋមន្ត្រី ហ៊ុន សែន ភ្ជួរស្រែនៅពេលលោកចុះពិនិត្យការបង្កបង្កើនផលស្រូវក្នុងស្រុកព្រៃកប្បាស ខេត្តតាកែវកាលពីថ្ងៃទី ២១ ខែកក្កដា
លោកហ៊ុន សែន រំឭកថា ក្នុងឆ្នាំ ២០០៦ លោកបានធ្វើទស្សនកិច្ចទៅប្រទេសអូស្ត្រាលីក្នុងអាណត្តិនាយករដ្ឋមន្ត្រី John Howard។ លោក John Howard បាននាំលោកទៅមើលតំបន់កសិកម្មមួយដោយសារតែអូស្ត្រាលីដឹងថាកម្ពុជា គឺជាប្រទេសកសិកម្ម និងកំពុងស្វែងរកជំនួយផ្នែកកសិកម្ម។ រាល់ការចុះហត្ថលេខារបស់លោកជាមួយអូស្ត្រាលី គឺពាក់ព័ន្ធនឹងរឿងកសិកម្ម។លោក ហ៊ុន សែន បញ្ជាក់ថា៖ «តំបន់នេះអូស្ត្រាលីបានចូលមកក្នុងកម្មវិធីគេហៅថា ចង្វាក់តម្លៃនៃវិស័យកសិកម្មរបស់យើង ដោយមានវិសាលភាពនៅខេត្តតាកែវ កំពត កំពង់ធំ ព្រៃវែង និងកណ្ដាល»។
អូស្ត្រាលីបានជួយកម្ពុជាលើវិស័យកសិកម្មទាំងហេដ្ឋារចនាសម្ព័ន្ធនៃប្រព័ន្ធស្រោចស្រព និងការបណ្ដុះបណ្ដាលបច្ចេកទេស ការផ្ដល់ពូជ និងការនាំទំនិញចូលទៅកាន់ទីផ្សារ។ លោកថ្លែងថា ជំនួយដែលលោកសុំពីបរទេស រួមមានពីអូស្ត្រាលី ចិន កូរ៉េ ជាដើមគឺដើម្បីយកមកកសាងកម្ពុជា។
លោក ហ៊ុន សែន បើកម៉ាស៊ីនច្រូតស្រូវក្នុងខេត្តតាកែវ
រិឯខ្លួនវិញ ឯកអគ្គរដ្ឋទូតអូស្ត្រាលី លោក Pablo Kang បានមានឱ្យដឹងថា អូស្ត្រាលីបានជួយគាំទ្រដល់វិស័យកសិម្មនៅកម្ពុជាតាំងពីទសវត្សរ៍ឆ្នាំ ១៩៩០។ កាលពីសម័យសង្គមរាស្ត្រនិយម អូស្ត្រាលីក៏ធ្លាប់បញ្ជូនអ្នកជំនាញកសិកម្មមកកម្ពុជាផងដែរ។ នៅចុងទសវត្សរ៍ ១៩៩០ អូស្ត្រាលីបានជួយដល់ការបង្កើតវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា។លោកបន្តថា បច្ចុប្បន្ននេះអូស្ត្រាលីកំពុងអនុវត្តកម្មវិធី «ចង្វាក់តម្លៃនៃវិស័យកសិកម្មកម្ពុជា-អូស្ត្រាលី» ហៅកាត់ថា CAVAC ពីឆ្នាំ ២០១០ ដល់ឆ្នាំ ២០២០ មានទឹកប្រាក់ ១០០ លានដុល្លារ។ កម្មវិធីនេះជួយដល់កសិករក្នុងការបង្កើនផលិតភាព និងការប្រកួតប្រជែង។
CAVAC បានកសាងប្រព័ន្ធធារាសាស្ត្រនៅឆ្នាំ ២០១៦ នៅខេត្តព្រៃវែង តាកែវ កណ្ដាល ផ្គត់ផ្គង់ទឹកដល់គ្រួសារចំនួន ១២ ០០០ គ្រួសារ គ្របដណ្ដប់លើផ្ទៃដី ៩ ពាន់ហិកតា។ អូស្ត្រាលីនឹងបន្តធ្វើការជាមួយកម្ពុជាដើម្បីធ្វើឲ្យប្រសើរឡើងដល់វិស័យកសិកម្មកម្ពុជា។
លោកបន្តថា ខណៈពេលដែលវិបត្តិជំងឺកូវីដ ១៩ នេះកំពុងប៉ះពាល់វិស័យទេសចរណ៍ និងកាត់ដេរ វាជារឿងសំខាន់ដែលកម្ពុជាបន្តអភិវឌ្ឍផលិតផលកសិកម្ម ដែលអាចលក់ចេញទៅទីផ្សារអន្តរជាតិ និងបង្កើនចំណូលដល់ប្រទេសជាតិ។
កាលពីម្សិលមិញដែរលោកនាយករដ្ឋមន្ត្រី ហ៊ុន សែន បានបញ្ជាទិញម៉ាស៊ីនសាបព្រោះស្រូវចំនួន ២០០០ គ្រឿងដែលរួមមានខ្នាតធំ ១ ០០០ គ្រឿងនិង ខ្នាតតូច ១ ០០០ គ្រឿង។ ម៉ាស៊ីនទាំង ២ ០០០ គ្រឿងនេះនឹងត្រូវប្រគល់ឲ្យក្រសួងកសិកម្មចែកចាយដល់ពលរដ្ឋនៅតាមកន្លែងដែលត្រូវការប្រើប្រាស់ ហើយអ្នកក្រីក្រគ្មានដីស្រែអាចយកទៅស៊ីឈ្នួលដើម្បីបានប្រាក់ចំណូល៕
（សរុបដោយសាមេត）
មតិពីមិត្តអ្នកអាន