ក្នុងមួយឆ្នាំៗ កម្ពុជាបាននាំចេញផលិតផលកសិកម្មបានរាប់លានតោន ប៉ុន្ដែ ក្នុងចំណោមផលិតផលទាំងនោះ ត្រូវបានគេមើលឃើញថា គឺមានភាគច្រើនជាផលិតផលវត្ថុធាតុដើម និងពាក់កណ្ដាលសម្រេច ខណៈដែលផលិតផលសម្រេច សម្រាប់ការនាំចេញ គឺនៅមានតិចតួចនៅឡើយ។ អ្នកជំនាញ បានមើលឃើញថា ក្នុងចំណោមផលិតផលកសិកម្មសំខាន់ៗជាច្រើនមុខ គ្រាប់ស្វាយចន្ទី ជាផលិតផលសក្ដានុពលមួយសម្រាប់ផលិតជាផលិតផលសម្រេចដើម្បីនាំចេញលើទីផ្សារ។
កម្ពុជា មានសមត្ថភាពផលិតគ្រាប់ស្វាយចន្ទី បានប្រមាណ ២០ម៉ឺនតោនក្នុងមួយឆ្នាំ ។ (រូបថត៖ Thmey Thmey.com)
រាជរដ្ឋាភិបាលកម្ពុជា និងភាគីពាក់ព័ន្ធ រួមគ្នាជំរុញការកែច្នៃគ្រាប់ស្វាយចន្ទីនៅកម្ពុជាឲ្យស្របតាមស្តង់ដារគុណភាពសម្រាប់ការនាំចេញទៅកាន់ទីផ្សារអន្តរជាតិ។ នេះបើផ្អែកតាមខ្លឹមសារនៃការចុះកិច្ចសន្យាផលិតកម្មកសិកម្ម ស្តីពីការទិញ-លក់ផលិតផលគ្រាប់ស្វាយចន្ទីកែច្នៃ និងអនុស្សារណៈយោគយល់ រវាងវិស័យសាធារណៈ ឯកជន ដៃគូអភិវឌ្ឍន៍ និងអ្នកផលិត ដែលបានធ្វើឡើងកាលពីថ្ងៃទី ១៧ ខែកក្កដា នៅក្រសួងកសិកម្ម រុក្ខា ប្រមាញ់ និងនេសាទ។
ផលិតផលកសិកម្មកែច្នៃ ពិសេសគ្រាប់ស្វាយចន្ទី ទទួលបានការចាប់អារម្មណ៍យ៉ាងច្រើន ពីអ្នកវិនិយោគក្នុងស្រុក និងបរទេស។ ទោះជាយ៉ាងនេះក្តី កម្ពុជានៅមិនទាន់អាចគ្រប់គ្រងគុណភាព អនាម័យ និងកែច្នៃកសិផលមួយប្រភេទនេះបានច្រើននៅឡើយ។ ដើម្បីជំរុញផលិតកម្ម កម្ពុជាត្រូវការចាំបាច់បច្ចេកទេសកែច្នៃ និងរោងចក្រកែច្នៃខ្នាតធំ ដែលមានគុណភាព និងអនាម័យត្រឹមត្រូវ។
កម្ពុជា មានសមត្ថភាពផលិតគ្រាប់ស្វាយចន្ទី បានប្រមាណ ២០ម៉ឺនតោនក្នុងមួយឆ្នាំ ប៉ុន្តែគ្រាប់ស្វាយចន្ទីស្រស់មួយភាគធំ ត្រូវបាននាំចេញទៅកាន់តែប្រទេសវៀតណាម ដែលជាហេតុធ្វើឲ្យគ្រាប់ស្វាយចន្ទីកម្ពុជាបាត់បង់តម្លៃបន្ថែមយ៉ាងច្រើន រួមទាំងកេរ្តិ៍ឈ្មោះគ្រាប់ស្វាយចន្ទីកម្ពុជាដែលមានរសជាតិឆ្ងាញ់លេខ១ផងនោះ។
តាមរយៈកិច្ចព្រមព្រៀងខាងលើនោះ ក្រុមហ៊ុនឯកជនបានកំណត់ថានឹងកែច្នៃគ្រាប់ស្វាយចន្ទីស្រស់របស់កម្ពុជា ឲ្យបាន៥០ម៉ឺនតោនក្នុងមួយឆ្នាំ ដោយអនុលោមតាមគោលការណ៍ GMP,GHPHACCP និងប្រព័ន្ធសុវត្ថិភាពចំណីអាហារអន្តរជាតិ ISO22000។ លើសពីនេះ ក្រុមហ៊ុននឹងជំរុញ ការនាំចេញផលិតផលស្វាយចន្ទីកែច្នៃឲ្យបាន ១០ម៉ឺនតោនក្នុងមួយឆ្នាំផងដែរ។
លោក គង់ ភាជ ប្រធាននាយកដ្ឋានកសិ-ឧស្សាហកម្មរូបនេះ សង្ឃឹមថា ក្រៅពីគ្រាប់ស្វាយចន្ទី កម្ពុជា នឹងអាចមានលទ្ធភាពកែច្នៃបានកាន់តែច្រើន នូវផលិតផលកសិកម្មជាច្រើនមុនទៀត សម្រាប់ផ្គត់ផ្គង់ក្នុងស្រុក និងការនាំចេញ ដើម្បីឲ្យស្របតាមផែនការរបស់រាជរដ្ឋាភិបាល ដែលបានកំណត់ការនាំចេញផលិតផលកសិកម្មកែច្នៃឲ្យបាន១២ភាគរយ ក្នុងចំណោមកសិផលដែលនាំចេញសរុប នៅត្រឹមឆ្នាំ២០២៥នោះ។ បើតាមប្រធាននាយកដ្ឋានកសិ-ឧស្សាហកម្មផលិតផលកែច្នៃនាំចេញ ដែលមានសក្ដានុពលក្នុងពេលបច្ចុប្បន្ន មាន ដូចជា ផ្លែស្វាយ ស្វាយចន្ទី ដំឡូងមី អង្ករ និងម្រេចជាដើម៕
（បូកសរុបដោយឌីណា）
មតិពីមិត្តអ្នកអាន