តម្លៃមាសនៅប៉ុន្មានថ្ងៃចុងក្រោយនេះ បានហាក់កើនខ្ពស់គួរកត់សម្គាល់ រហូតដល់ទៅប្រមាណ ២.២៣០ ដុល្លារអាមេរិកគិតនៅថ្ងៃទី ២២ ខែកក្កដាឆ្នាំ២០២០នេះ នេះបើតាមមាសលក់ចេញពីហាងប្ដូរប្រាក់ប្រាក់ និងលក់គ្រឿងអលង្ការលីហួរ។ ការកើនឡើងតម្លៃមាសនៅក្នុងទីផ្សារកម្ពុជានេះ គឺដើរស្របទៅតាមតម្លៃទីផ្សារមាសពិភពលោក រួមទាំងប្រទេសជិតខាងរបស់កម្ពុជា ដូចជាថៃ និងវៀតណាមក៏បង្ហាញពីតម្លៃមាសហក់ឡើងថ្លៃដូចគ្នាដែរ។
តម្លៃមាសនៅកម្ពុជាហក់ឡើងថ្លៃក្រឺតៗដល់ប្រមាណ ២.២៣០ ដុល្លារក្នុងមួយតម្លឹង! (រូបភាព FX Empire)
នៅក្នុងសេចក្តីបញ្ជាក់ដែលធនាគារបានចេញផ្សាយនោះបានឲ្យដឹងទៀតថា ទុកនៅប្រទេសស្វីសចំនួន ១២,៤តោន គឺជាកេរ្តិ៍មរតកតាំងពីមុនសម័យសង្គ្រាមមកម្ល៉េះ ខណៈមាសចំនួន១៤,១តោនទៀតដែលបានទុកនៅធនាគារកណ្តាលអង់គ្លេសនោះគឺសម្រាប់វិនិយោគ។ ធនាគារជាតិបញ្ជាក់ទៀតថា សព្វថ្ងៃនេះ មាសនិងរូបិយប័ណ្ណបរទេស ឬហៅថា ជាទុនបម្រុងអន្តរជាតិរបស់កម្ពុជាដែលគិតជាដុល្លារអាមេរិកមានចំនួន ១៩,៥ប៊ីលាន គិតត្រឹមចុងខែមិថុនា ឆ្នាំ២០២០នេះ។
អមដោយលិខិតបញ្ជាក់របស់ធនាគារជាតិនៃកម្ពុជា សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសថា កម្ពុជាមានមាសសុទ្ធរហូតដល់ទៅ ៣៦.៥តោន មិនមែន ៣០តោនដូចការប្រកាសរបស់សម្តេចនាពេលកន្លងទៅនោះទេ។
បើតាមសម្តេចតេជោ ហ៊ុន សែន ការបញ្ជាក់ពីរឿងចំនួនមាសនេះ ដើម្បីឆ្លើយតបទៅនឹងការលើករបស់មនុស្សមួយចំនួនតូច ដែលបានវាយប្រហាររាជរដ្ឋាភិបាលថា យកមាសនេះទៅលក់ដោះស្រាយបញ្ហាជាតិបង្កដោយជំងឺកូវីដ១៩។
តាមរយៈទំព័រ Facebook នៅព្រឹកថ្ងៃទី២៣ ខែកក្កដា ឆ្នាំ២០២០នេះ សម្តេចតេជោ ហ៊ុន សែន បានបញ្ជាក់ដូច្នេះ «ដើម្បីច្បាស់ពីមាស សូមមើលការពន្យល់របស់ធានាគារជាតិកម្ពុជានោះ បងប្អូនប្រាកដជាយល់ និងអបអរសាទរជាមួយទុនបម្រុងរបស់ជាតិយើងដែលកើនឡើងជាលំដាប់។ ប្រហែលមួយឆ្នាំមុនខ្ញុំធ្លាប់ប្រកាសថា មាសរបស់យើងមាន ៣០តោនតែតាមតួលេខថ្មីនេះ មាសរបស់យើងមានដល់៣៦.៥តោន។ នេះមិនមែនជាមាយាទស្រីកញ្ជើធ្លុះក្នុងការគ្រប់គ្រងសេដ្ឋកិច្ចជាតិនោះទេ»។
យោងតាមសេចក្តីបំភ្លឺរបស់ធនាគារជាតិនៃកម្ពុជា បានឱ្យដឹងថា មាសដែលជាកេរ្តិ៍មរតកតាំងពីមុនសម័យសង្គ្រាមនេះ ចំនួន ១២.៤តោន កំពុងរក្សាទុកនៅប្រទេសស្វីស, ១៤.១តោន កំពុងវិនិយោគនៅធនាគារកណ្តាលអង់គ្លេស ហើយមាស ១០តោន ត្រូវបានរក្សាទុកនៅកម្ពុជា។
ក្នុងសេចក្តីបំភ្លឺរបស់ធានាគារជាតិ ក៏បានឱ្យដឹងផងដែរថា បច្ចុប្បន្នកម្ពុជា ក៏មានទុនបម្រុងអន្តរជាតិប្រមាណជា ១៩.៥ប៊ីលានដុល្លារផងដែរ គិតត្រឹមចុងខែមិថុនា ឆ្នាំ២០២០។
សម្តេចតេជោ ហុន ស៊ែន៖ កម្ពុជាមានមាស ៣៦.៥តោន, រាជរដ្ឋាភិបាលកម្ពុជា មិនមែនមានមាយាទកញ្ជើធ្លុះនោះទេ!
សម្តេចតេជោ ហ៊ុន សែន ធ្លាប់បានថ្លែងថា រាជរដ្ឋាភិបាលរបស់សម្តេចមិនមែនជារាជរដ្ឋាភិបាលកញ្ជើធ្លុះនោះឡើយ ហើយតែងតែខិតខំសន្សំប្រាក់ ដើម្បីបំពេញការចំណាយរបស់ជាតិ។ សម្តេចតេជោ ក៏ធ្លាប់បានបញ្ជាក់ដែរថា បច្ចុប្បន្នទោះបីយាយីពីជំងឺកូវីដ១៩យ៉ាងណាក្តី ក៏រាជរដ្ឋាភិបាលនៅមានចំណូលពីពន្ធដារ និងគយ សម្រាប់ការចំណាយចរន្តផងដែរ។
សម្តេចតេជោ ហ៊ុន សែន ក៏ធ្លាប់បានបញ្ជាក់ផងដែរថា ទោះបីរាជរដ្ឋាភិបាលអត់ចំណូលពេញមួយឆ្នាំ ក៏រាជរដ្ឋាភិបាលនៅតែមានប្រាក់សម្រាប់បើកបៀវត្សរ៍ជូនមន្ត្រីរាជការ និងកងកម្លាំងប្រដាប់អាវុធផងដែរ។
សូមបញ្ជាក់ផងដែរថា ក្នុងកំលុងពេលកម្ពុជារងការរាតត្បាតពីជំងឺកូវីដ១៩នេះ រាជរដ្ឋាភិបាលកម្ពុជា បាននឹងកំពុងបញ្ចេញថវិកាជាតិយ៉ាងច្រើនសន្ធឹកសន្ធាប់សម្រាប់ជួសជុលការខូចខាតសេដ្ឋកិច្ច, ឧបត្ថម្ភដល់កម្មករ និយោជិតក្នុងវិស័យកាត់ដេរ និងទេសចរណ៍ប្រមាណ ១៧ម៉ឺននាក់ ម្នាក់ៗ ៤០ដុល្លារក្នុងមួយខែ ព្រមទាំងឧបត្ថម្ភដល់ប្រជាពលរដ្ឋក្រីក្រកម្រិត១ និង២ ប្រមាណ ៦១ម៉ឺនគ្រួសារ ស្មើនឹងថវិកាប្រមាណ ២៨លានដុល្លារអាមេរិកក្នុងមួយខែ។
តាមរយៈសកម្មភាពនេះ ស្តែងឱ្យឃើញថា រាជរដ្ឋាភិបាលកម្ពុជា ដឹកនាំដោយសម្តេចតេជោ ហ៊ុន សែន មានទុនបម្រុង និងថវិកាជាតិគ្រប់គ្រាន់សម្រាប់ដោះស្រាយវិបត្តិរបស់ជាតិក្នុងកំលុងពេលនេះ៕
（សរុបដោយវិច្ឆិកា）
មតិពីមិត្តអ្នកអាន