នាថ្ងៃទី២៤ ខែ ឧសភាឆ្នាំ ២០២០ នេះ កាកបាទក្រហមកម្ពុជា សមាជិកព្រឹទ្ធសភានិងអាជ្ញាធរដែនដីបានប្រគល់អំណោយមនុស្សធម៌ដល់ប្រជាពលរដ្ឋខ្វះខាតស្បៀងចំនួនជាង៣០០គ្រួសារដែលជួបការលំបាកដោយសារដោយផលប៉ះពាល់នៃជំងឺរាតត្បាត COVID-19 នៅក្នុងមូលដ្ឋានមួយចំនួនក្នុងក្រុងប៉ោយប៉ែត, ស្រុកអូរជ្រៅ និងស្រុកម៉ាឡៃ ខេត្តបន្ទាយមានជ័យ។
លោក លី សារី អភិបាលរងខេត្តបន្ទាយមានជ័យបានប្រគល់អំណោយមនុស្សធម៌ដល់ពលរដ្ឋ។
អំណោយមនុស្សធម៌នេះ ត្រូវបានក្រុមការងារចុះទៅចែកតាមគោលដៅរៀងៗខ្លួន លោក លី សារី អភិបាលរងខេត្តបន្ទាយមានជ័យ រួមនឹងរដ្ឋបាលក្រុងប៉ោយ ប៉ែតបាននាំយកស្បៀងអាហារ ទៅចែកជូនដល់ប្រជាពលរដ្ឋខ្វះខាតស្បៀងចំនួន ២៧០ គ្រួសារ ក្នុងសង្កាត់ប៉ោយប៉ែត ក្រុងប៉ោយប៉ែត។
នៅរសៀលថ្ងៃនេះដែរ ឯកឧត្តម យូ ឡាណា អគ្គលេខាធិការរងទី២កាកបាទក្រហម កម្ពុជា តំណាងដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម កម្ពុជា បាននាំយកអំណោយមនុស្សធម៌របស់គណៈកម្មាធិការកណ្តាលកាកបាទក្រហមកម្ពុជា និងរបស់សាខាកាកបាទក្រហមកម្ពុជាខេត្តបន្ទាយមានជ័យ ជូនគ្រួសាររងគ្រោះដោយសារ ខ្យល់កន្ត្រាក់ ៧គ្រួសារ អគ្គិភ័យ ២គ្រួសារ និងលង់ទឹកស្លាប់ ១នាក់ សរុបចំនួន ១០គ្រួសារ ដែលគ្រួសារមួយៗទទួលបាន អង្ករ ៣០គីឡូក្រាម មី ១កេស ត្រីខ ១០កំប៉ុង ឃីត១ កៅស៊ូតង់ ១ផ្ទាំង និង ថវិកា ១០ម៉ឺនរៀល។
ដោយឡែកនៅព្រឹកថ្ងៃនេះដែរឯកឧត្តម ឈើយ ចាន់ណា លេខាធិការគណៈកម្មការ ទី៧ ព្រឹទ្ធសភា និងជាសមាជិកក្រុមសមាជិកព្រឹទ្ធសភាប្រចាំភូមិភាគទី៤ បានអញ្ជើញជួប សំណេះសំណាល និងសួរសុខទុក្ខចែកអំណោយស្បៀងអាហារដល់បងប្អូនប្រជាពលរដ្ឋ មានជីវភាពខ្វះខាតចំនួន ២៥គ្រួសារ នៅឃុំអូរស្រឡៅ ស្រុកម៉ាឡៃ ផងដែរ៕
（បកប្រែដោយសាមេត）
មតិពីមិត្តអ្នកអាន