ក្រសួងពាណិជ្ជកម្មកម្ពុជា រៀបចំកិច្ចប្រជុំគណៈកម្មការរៀបចំតាក់តែងសេចក្ដីព្រាងច្បាប់ លិខិត​បទដ្ឋានគតិយុត្ត និងកម្មវិធីគោល​នយោបាយវិស័យពាណិជ្ជកម្ម

ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម

ឯកឧត្តម ប៉ាន សូរស័ក្ដិ បានវាយតម្លៃខ្ពស់ចំពោះការខិតខំប្រឹងប្រែងរបស់គណៈ​កម្មការ​ទាំងមូល ក្នុងការងាររៀបចំតាក់តែងសេចក្ដីព្រាងច្បាប់ លិខិតបទដ្ឋានគតិយុត្ត ដែល​បានសម្រេចលទ្ធផលបានផ្លែផ្កាជាបណ្ដើរៗ ដូចជាច្បាប់ស្ដីពីពាណិជ្ជកម្មតាមប្រព័ន្ធអេឡិច​ត្រូនិក និងច្បាប់ស្ដីពីកិច្ចការពារអ្នកប្រើប្រាស់ ដែលបានប្រកាសដាក់ឱ្យប្រើប្រាស់នៅថ្ងៃទី០២ ខែវិច្ឆិកា ឆ្នាំ២០១៩ កន្លងទៅ។ ឯកឧត្តមបាន ណែនាំឱ្យអនុគណៈកម្មការទទួល​បន្ទុកច្បាប់​ទាំងពីរ ត្រូវជំរុញរៀបចំលិខិតបទដ្ឋានគតិយុត្ត ដូចជា អនុក្រឹត្យ ឬប្រកាសនានា ដើម្បីអនុវត្តន៍​ច្បាប់ទាំងនោះឱ្យប្រកបដោយប្រសិទ្ធភាពខ្ពស់។ ឯកឧត្តមរដ្ឋមន្ត្រីបានលើកឡើងថា ក្រសួង​ពាណិជ្ជកម្ម ក៏មានកាតព្វកិច្ចរៀបចំតាក់តែងសេចក្ដីព្រាងច្បាប់ វិសោធនកម្មច្បាប់ និងលិខិត​បទដ្ឋានគតិយុត្តដទៃផ្សេងទៀត ដើម្បីអភិវឌ្ឍន៍ប្រព័ន្ធច្បាប់ក្រោមវិស័យពាណិជ្ជកម្មរបស់​យើងឱ្យកើនឡើង និងមានភាពទំនើបមួយជំហានទៀត។

សូមបញ្ជាក់ថា ​គណៈកម្មការរៀបចំតាក់តែងសេចក្ដីព្រាងច្បាប់ លិខិតបទដ្ឋានគតិយុត្ត និងត្រួតពិនិត្យការអនុវត្តច្បាប់ លិខិតបទដ្ឋានគតិយុត្ត និងកម្មវិធីគោលនយោបាយវិស័យ​ពាណិជ្ជកម្ម មានអនុគណៈកម្មការ ចំនួន១០ ទទួលបន្ទុករៀបចំតាក់តែងសេចក្ដីព្រាងច្បាប់ លិខិតបទដ្ឋានគតិយុត្ត ដែលរួមមាន៖ ១. បទប្បញ្ញត្តិសម្រាប់អនុវត្តច្បាប់ស្ដីពីពាណិជ្ជកម្ម​តាមប្រព័ន្ធអេឡិចត្រូនិក។ ២. បទប្បញ្ញត្តិសម្រាប់អនុវត្តន៍ច្បាប់ស្ដីពីកិច្ចការពារអ្នកប្រើ​ប្រាស់។ ៣. សេចក្ដីព្រាងច្បាប់ស្ដីពីការប្រកួតប្រជែង។ ៤. អនុគណៈកម្មការរៀបចំសេចក្ដី​ព្រាងច្បាប់ស្ដីពីម្ហូបអាហារ។ ៥. សេចក្ដីព្រាងច្បាប់ស្ដីពីកិច្ចសន្យាពាណិជ្ជកម្ម។ ៦. ការវាយ​តម្លៃ​​លើផលប៉ះពាល់នៃលិខិតបទដ្ឋានគតិយុត្ត។ ៧. សេចក្ដីព្រាងវិសោធនកម្មច្បាប់ស្ដីពី​ប្រតិបត្តិការដែលមានកិច្ចធានា និងច្បាប់ស្ដីពីក្ស័យធន។ ៨. សេចក្ដីព្រាងវិសោធនកម្មច្បាប់​ស្ដីពីវិធានពាណិជ្ជកម្ម និងបញ្ជីពាណិជ្ជកម្ម និងច្បាប់ស្ដីពីសហគ្រាសពាណិជ្ជកម្ម។ ៩. សេចក្ដី​ព្រាងវិសោធនកម្មច្បាប់ស្ដីពីកម្មសិទ្ធិបញ្ញា និង ១០ សេចក្ដីព្រាងច្បាប់ស្ដីពីភ្នាក់ងារ​ពាណិជ្ជ​កម្ម៕

（ប្រភពព័ត៌មាន: information.gov.kh）