មជ្ឈមណ្ឌលប្រយុទ្ធប្រឆាំងនិងបង្ការជំងឺឆ្លងរបស់សហរដ្ឋអាមេរិក (CDC) នៅយប់ថ្ងៃសុក្រ (ទី២១ កុម្ភៈ ២០២០) នេះ បានប្រាប់សារព័ត៌មាន USA Today របស់អាមេរិក ថា ស្ត្រីអាមេរិកាំងវ័យ ៨៣ឆ្នាំម្នាក់ ដែលជាអ្នកដំណើរម្នាក់របស់នាវា Westerdam ដែលបានត្រូវគេនិយាយថា ធ្វើតេស្តរកឃើញផ្ទុកមេរោគកូរ៉ូណា (Covid-19) នៅពេលស្ត្រីរូបនេះបានចាកចេញពីប្រទេសកម្ពុជា ទៅដល់ប្រទេសម៉ាឡេស៊ី "គឺតាំងពីដើមមក គ្មានផ្ទុក Covid-19ទេ។ នេះបើតាមការដឹងរបស់យើង"។
សម្តេចតេជោ ហ៊ុន សែន និងភ្ញៀវទេសចររបស់នាវា Westerdam។
មន្ត្រីអ្នកនាំពាក្យ CDC របស់អាមេរិក លោក Richard Quartarone បាននិយាយប្រាប់កាសែត USA Today ដូច្នេះថា "ខ្ញុំបានបញ្ជាក់ថា អ្នកដំណើរទាំងអស់បានត្រូវធ្វើតេស្តគ្រប់គ្នា ហើយពួកគេមានលទ្ធផលអវិជ្ជមាន ពោលគឺគ្មានផ្ទុក Covid-19 ទេ រួមទាំងមនុស្សម្នាក់ដែលពីមុនត្រូវគេធ្វើតេស្តរកឃើញថាមានផ្ទុក ផងដែរ"។
លោកអ្នកនាំពាក្យបន្ថែមទៀតថា ស្ត្រីអាមេរិកាំងដែលកំពុងសម្រាកព្យាបាលនៅក្នុងមន្ទីរពេទ្យនោះ "អាចនឹងមានជំងឺផ្លូវដង្ហើម ប៉ុន្តែ នោះមិនមែនជា Covid-19 ទេ"។
ការបញ្ជាក់របស់អាមេរិកនេះ បានគាំទ្រដល់មន្ទិលសង្ស័យរបស់កម្ពុជា ដែលបានដាក់ទៅលើលទ្ធផលតេស្តដំបូងៗរបស់អាជ្ញាធរម៉ាឡេស៊ី ដែលប្រកាសថា ស្ត្រីអាមេរិកាំងដែលចុះពីនាវា Westerdam មានផ្ទុក Covid-19។ ភ្លាមៗ កម្ពុជាបានស្នើឲ្យម៉ាឡេស៊ីពិនិត្យឡើងវិញទៅលើលទ្ធផលតេស្តរបស់ខ្លួន។
នៅក្រោយការបញ្ជាក់របស់ CDC អាមេរិក ថា គ្មានអ្នកដំណើរណាម្នាក់ពីនាវា Westerdam របស់ក្រុមហ៊ុនអាមេរិក ដែលចូលចតនៅកម្ពុជា មានផ្ទុកមេរោគ Covid-19 ទេ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានមានប្រសាសន៍នៅក្នុងសំណេរលើទំព័រហ្វេសប៊ុក ថា «ពេលនេះ អ្វីៗច្បាស់លាស់ហើយ ដែលកម្ពុជាទទួលបានយុត្តិធម៌មកវិញ។ មិនមានមនុស្សណាម្នាក់ដែលជិះលើនាវាខ្នាតយក្ស Westerdam ឆ្លង Covid-119 នោះទេ»។
សម្ដេចតេជោ បន្ថែមថា ការមិនទទួលខុសត្រូវរបស់ជនបរទេសខ្លះលើការពិនិត្យសុខភាពរបស់ភ្ញៀវទេសចរដែលជិះលើនាវា Westerdam បានធ្វើឱ្យកម្ពុជាក្លាយជាជនរងគ្រោះនៃទង្វើមនុស្សធម៌របស់ខ្លួនអស់រយៈពេលជិតមួយសប្តាហ៍។
សារព័ត៌មានក្នុងស្រុក Fresh News បានរាយការណ៍ ដោយដកស្រង់ប្រសាសន៍នាយករដ្ឋមន្ត្រីកម្ពុជា បានថ្លែងថា «បើខ្ញុំជានាយករដ្ឋមន្ត្រីម៉ាឡេស៊ីវិញ ខ្ញុំនឹងដករដ្ឋមន្ត្រីសុខាភិបាលចោល ដោយសារតែភាពខ្ជីខ្ជា៕»
（សរុបដោយវិច្ឆិកា）
មតិពីមិត្តអ្នកអាន