ក្រៅពីមានតំបន់ទេសចរណ៍ប្រវត្តិសាស្រ្តនិងទីកន្លែងកម្សាន្តធម្មជាតិជាច្រើននោះទឹកដីដ៏ស៊ីវីល័យនៅទិសពាយព្យជាប់ព្រំប្រទល់កម្ពុជា-ថៃខេត្តបន្ទាយមានជ័យ នៅមានរមណីយដ្ឋានទេសចរណ៍ដែលទើបកែច្នៃដោយដៃកូនកសិកររស់នៅទីនោះឈ្មោះថា រមណីយដ្ឋានសួនស្នេហ៍ជនបទ ដែលលាតសន្ធឹងលើទំហំដីដ៏ធំល្វឹងល្វើយជាងបួនហិកតានៅជាប់នឹងជើងភ្នំខ្លាកូនស្ថិតក្នុងភូមិខ្លាកូនសង្កាត់កំពង់ស្វាយ ខណ្ឌ និងក្រុងសិរីសោភ័ណ។
សួនស្នេហ៍ជនបទ ទីកម្សាន្តកំពុងពេញនិយមនៅបន្ទាយមានជ័យ
មិនខុសពីឈ្មោះរបស់វាទេ សួនស្នេហ៍ជនបទមានទេសភាពធម្មជាតិកែច្នៃដ៏ស្រស់ត្រកាល បែបព្រៃភ្នំជនបទលម្អទៅដោយសួនច្បារតូចៗកន្លែងអង្គុយលេងកម្សាន្តមានបង់រោងខ្យូសតម្រៀបជាជួរនិងរូបចម្លាក់សត្វព្រៃនិងសត្វស្រុកជាច្រើនលាក់ខ្លួនតាមគុម្ពផ្កា។ នៅឆ្វេងដៃខាងក្រោយខ្លោងទ្វារចូលក៏មានរូបចម្លាក់បុរសស្រ្តីក្នុងឈុតរៀបការដែលមានប្រឡង់មុខចំហ ទុកឲ្យអ្នកមកទស្សនាដាក់មុខចូល ដើម្បីថតរូបលេងផងដែរ។
ការតុបតែងដ៏ត្រជាក់ភ្នែកដូច្នេះបានប្រែក្លាយអតីតដីខ្ពង់រាបជំរាលភ្នំមួយនេះក្លាយជាទីទាក់ទាញភ្ញៀវជាតិនិងអន្តរជាតិឆ្លងកាត់ខេត្តនោះចូលទៅទស្សនាកម្សាន្តនិងភ្លក្សរសជាតិអាហារស្រែ មាន់ និងត្រីស្រស់ៗពីស្រះធម្មជាតិ ពុំមានលស់ថ្ងៃឡើយ។ រមណីយដ្ឋាននេះលេចរូបរាងដំបូងក្រោមរូបភាពជាកន្លែងកម្សាន្តរបស់គ្រួសារឯកជនមួយនៅឆ្នាំ២០០៦ នៅលើផ្ទៃដីចំនួនមិនដល់១ហិកតា។
លោក ឱក ប៊ុនលី ស្ថាបនិកសួនស្នេហ៍ជនបទបានឲ្យដឹងថា៖ «កាលណោះខ្ញុំបង្កើតឡើងជាសួនកម្សាន្តសម្រាប់គ្រួសារខ្ញុំទេមិនបានគិតដល់ពីការស្វែងរកកម្រៃឡើយ។ពោលគឺ ខ្ញុំបង្កើតវាឡើងសម្រាប់តែផ្លាស់ប្តូរអារម្មណ៍អ៊ូអរនិងក្លិនឆ្អាបរបស់ពួកខ្ញុំនៅផ្សារឲ្យរសាយពេលដែលខ្ញុំបាននាំប្រពន្ធកូនមកដល់លេងទីនេះនៅពេលល្ងាចៗតែប៉ុណ្ណោះ»។
សួនស្នេហ៍ជនបទ ទីកម្សាន្តកំពុងពេញនិយមនៅបន្ទាយមានជ័យ
ស្ថាបនិកវ័យ៤៩ឆ្នាំរូបនេះរំឭកថា៖ «ប៉ុន្តែក្រោយមកដោយមានការចាប់អារម្មណ៍ពីអ្នកនិយមរកទីលម្ហែកាយកាន់តែច្រើននិងមានពេលមួយខ្ញុំបានស្តាប់ឮប្រសាសន៍នាយករដ្ឋមន្ត្រី ហ៊ុន សែន ប្រកាសថាកូនខ្មែរបើមានឱកាសនិងមានលទ្ធភាពគួរតែបង្កើតស្នាដៃអ្វី មួយដើម្បីជាតិ។ ឮដូច្នេះខ្ញុំគិតថាអ្វីដែលខ្ញុំបានចាប់ផ្តើមមុននោះវាក៏ជាការជួយរួមចំណែកអភិវឌ្ឍស្រុកភូមិមួយដែរហើយខ្ញុំក៏បានចំណាយទុនទិញដីធ្វើការពង្រីកសួនកម្សាន្តរហូតបានដល់ទៅទំហំជាង៤ហិកតានិងបានបំពេញតម្រូវការមនុស្សគ្រប់វ័យគ្រប់ជាតិសាសន៍ដែលមកកម្សាន្តនៅសួនរបស់ខ្ញុំ»។
ទាក់ទិននឹងការប្រើឈ្មោះថា «សួនស្នេហ៍ជនបទអាជីវករលក់ត្រីនិងជាម្ចាស់ដីលោក ឱក ប៊ុនលី បានពន្យល់ថា៖ «វាមិនមែនជាកន្លែងសម្រាប់ឲ្យយុវវ័យបង្កាត់ភ្លើងស្នេហ៍នោះទេ។ ខ្ញុំដាក់ឈ្មោះនេះគឺមកពីទីនេះជាទីរសាយអារម្មណ៍របស់ខ្ញុំនិងក្រុមគ្រួសារក្រោយពីលក់ត្រីនឿយហត់ហើយបាននាំគ្នាមកបង្កើតភាពសប្បាយទីនេះជាមួយប្រពន្ធកូនបានជាដាក់ឈ្មោះថាជាសួនស្នេហ៍ជនបទជាប់រហូតពេលនេះ»។
សួនស្នេហ៍ជនបទ ទីកម្សាន្តកំពុងពេញនិយមនៅបន្ទាយមានជ័យ
សួននេះបានទាក់ទាញភ្ញៀវឲ្យចូលកម្សាន្តជាច្រើនមានទាំងភ្ញៀវអន្តរជាតិនោះត្រូវបានលោកឲ្យដឹងថា៖ «ដើមឡើយខ្ញុំក៏មិនរំពឹងថា អ្វីដែលខ្ញុំបង្កើតឡើងអាចទទួលបានភ្ញៀវចូលទៅទស្សនាច្រើនយ៉ាងណានោះដែរក្រៅពីខំកែច្នៃបន្ថែមដើម្បីបង្កើនសោភ័ណភាពនិងពង្រីកតាមតម្រូវចិត្តភ្ញៀវមួយចំនួនដែលតែងណែនាំបន្ថែមនោះ»។
ម្ចាស់រមនីយដ្ឋានកែច្នៃដែលជាអ្នកលក់ត្រីរូបនេះក៏បានបញ្ជាក់ឲ្យដឹងទៀតថា អ្វីដែលភ្ញៀវនិយមចូលមកលេងកម្សាន្តមិនដែលដាច់នោះគឺមកពីរមណីយដ្ឋាន សួនស្នេហ៍ជនបទរបស់លោកមិនបានគិតតម្លៃសម្រាប់កន្លែងអង្គុយណាមួយឡើយក្រៅពីសេវាម្ហូបអាហារនិងភេសជ្ជៈនោះគឺភ្ញៀវអាចសម្រាកលេងរយៈពេលយូរប៉ុនណាក៏បានឲ្យតែនៅក្នុងម៉ោងបើកបម្រើសេវា»។
សួនស្នេហ៍ជនបទ ទីកម្សាន្តកំពុងពេញនិយមនៅបន្ទាយមានជ័យ
ក្រៅតែពីសម្រស់ដ៏ស្រស់ត្រកាល ទេសភាពល្អត្រជាក់ភ្នែក សួននេះមានផ្ដល់សេវាកម្មច្រើនប្រភេទដល់ភ្ញៀវទេសចរដូចជា សេវាកម្មចំណីអាហារ ទីកន្លែងកម្សាន្តសម្រាប់កុមារ ហើយអ្វីដែលជាការចាប់អារម្មណ៍បំផុតនោះ គឺការផ្ដល់សេវាកម្មថត Pre-wedding សម្រាប់គូស្នេហ៍ទៀតផង។
បើតាមក្រសួងទេសចរណ៍ ក្នុងខេត្តបន្ទាយមានជ័យ មានតំបន់ទេសចរណ៍ច្រើនប្រភេទ រួមមាន តំបន់ទេសចរណ៍ធម្មជាតិបែបកែច្នៃ និងតំបន់ទេសចរណ៍បែបប្រវត្តិសាស្ត្រ ក្នុងនោះ ប្រាសាទបន្ទាយឆ្មា បារាយណ៍បុណ្យ និងអាងជើងគ្រុសដែលជាតំបន់មានសក្ដានុពលជាងគេក្នុងខេត្តនេះ៕
（សរុបដោយ ហេង វុធ្ធី）
（ប្រភពព័ត៌មាន: Thmeythmey និង postkhmer.com）
មតិពីមិត្តអ្នកអាន