យុគសម័យ - យោងតាមច្បាប់វិសោធនកម្មរបស់កូរ៉េខាងត្បូង ចាប់ពី ថ្ងៃ ១៦ ខែកក្កដានេះ ជនបរទេសកំពុងរស់នៅក្នុងប្រទេសកូរ៉េខាងត្បូង រួមមានពលករអន្តរជាតិនិងនិសិ្សតកម្ពុជាត្រូវបង់ការធានារ៉ាប់រងសុខភាពខ្ពស់ជាង៧ដង ជាងពេលបច្ចុប្បន្ន បើពេលវេលាស្នាក់នៅក្នុងប្រទេសនេះលើសពី៦ខែ។
ប្រសិនបើស្នាក់នៅលើសពី៦ខែជនបរទេសនឹងត្រូវចូលរួមប្រព័ន្ធធានារ៉ាប់រងសុខភាពរដ្ឋរបស់ប្រទេសកូរ៉េខាងត្បូង។
បច្ចុប្បន្ននេះជនបរទេសភាគច្រើននៅក្នុងប្រទេសកូរ៉េខាងត្បូងកំពុងប្រើប្រាស់កញ្ចប់ធានារ៉ាប់រងសុខភាពឯកជន ដែលមានតម្លៃចាប់ពី១០០០០០ទៅ ១១០០០០ won (ប្រហែល៨៣ទៅ៩២ដុល្លារ) ក្នុងមួយឆ្នាំ។ ប៉ុន្តែយោងតាមច្បាប់ធានារ៉ាប់រងសុខភាពជាតិដែលបានកែប្រែថ្មីរបស់ប្រទេសកូរ៉េខាងត្បូង ដែលមានសុពលភាពពីថ្ងៃទី ១៦ ខែកក្កដាទៅ ជនបរទេសទាំងអស់រួមទាំងនិស្សិតអន្តរជាតិនឹងត្រូវផ្លាស់ប្តូរពីកញ្ចប់ធានារ៉ាប់រងសុខភាពឯកជនទៅកញ្ចប់ធានារ៉ាប់រងសុខភាពរដ្ ឋបើពេលវេលាស្នាក់នៅក្នុងប្រទេសនេះលើសពី៦ខែ។
តម្លៃរបស់ធានារ៉ាប់រងសុខភាពរដ្ឋមានប្រហែល៦៨៧០០០won ក្នុងមួយឆ្នាំ(ប្រហែល៥៦៨ដុលារ)។ ច្បាប់នេះនឹងជះឥទ្ធិពលយ៉ាងធ្ងន់ធ្ងរទៅលើពលករនិងនិស្សិតកម្ពុជាដែលកំពុងរស់នៅធ្វើការនិងសិក្សារយៈពេលវែងនៅក្នុងប្រទេសកូរ៉េខាងត្បូង។
ច្បាប់នេះត្រូវបានប្រកាសអោយប្រើដើម្បីបង្ការជនបរទេសពីការរំលោភបំពានលើប្រព័ន្ធធានារ៉ាប់រងរដ្ឋដោយបង់ប្រាក់ធានារ៉ាប់រងតិចតួចនិងប្រើប្រាស់សេវាព្យាបាលថ្លៃៗ។ សាកលវិទ្យាល័យអំពាវនាវឱ្យមានការលើកលែងចំពោះសិស្សហើយបានទទួលហត្ថលេខាចំនួន ៣០០០០។
"នោះនឹងជាបន្ទុកធំមួយសម្រាប់និស្សិតអន្ដរជាតិ" មន្ត្រីសាកលវិទ្យាល័យបានបន្ថែមថាទោះបីជាប្រព័ន្ធធានារ៉ាប់រងរដ្ឋផ្តល់អត្ថប្រយោជន៍ច្រើនជាងឯកជនក៏ដោយ សិស្សភាគច្រើននៅអាយុ២០ឆ្នាំមិនចាំបាច់សម្រាប់ការថែទាំសុខភាពក្នុងតម្លៃថ្លៃពេកទេ។
ក្រសួងអប់រំរបស់ប្រទេសកូរ៉េខាងត្បូងបានអោយដឹងថា នឹងស្នើសុំឱ្យក្រសួងសុខាភិបាលលើកលែងនិស្សិតបរទេសពីការចុះឈ្មោះចូលនៅក្នុងប្រព័ន្ធធានារ៉ាប់រងសុខភាពថ្នាក់ជាតិ។
នៅខាងក្រសួងសុខាភិបាលបានអោយដឹងថាពួកគេនឹងពិចារណារឿងនេះប្រសិនបើមានសំណើជាផ្លូវការពីក្រសួងអប់រំ៕
（ប្រែសម្រូលដោយសមុទ្រ）
មតិពីមិត្តអ្នកអាន