តម្លៃប្រេងឆៅ នៅលើទីផ្សារសកលលោក បានងើបឡើងវិញបន្តិចហើយ បន្ទាប់ពីបានធ្លាក់ចុះ ដោយសារតែការព្រួយបារម្ភពី ការចុះទន់ខ្សោយនូវតម្រូវការប្រេង ក្រោយពេលដែល virus Corona ផ្ទុះឡើងនៅក្នុងប្រទេសចិន ដែលជាប្រទេស ប្រើប្រាស់ប្រេងដ៏ធំមួយលើសកលលោក។ តម្លៃប្រេង មានភាពប្រសើរឡើងវិញ ក៏ដោយសារតែប្រទេសផលិតផលប្រេង កំពុងពិចារណាកាត់បន្ថយផលិតកម្មរបស់ខ្លួន ខណៈអាមេរិកក៏បានបង្ហាញពីសញ្ញាណធ្លាក់ចុះនៃ ស្តុកទុកប្រេងរបស់ខ្លួនផងដែរ។
តម្លៃប្រេងឆៅ នៅលើទីផ្សារសកលងើបឡើងវិញ បន្ទាប់ពីបានធ្លាក់ចុះក្នុង៥ វគ្គជាប់ៗគ្នាដោយសារឥទ្ធិពល virus Corona៕ (រូបថត៖ TTXVN)
អង្គការប្រទេសនាំចេញប្រេង OPEC កំពុងតែពិចារណាលើ ការកាត់បន្ថយការផ្គត់ផ្គង់ប្រេងឆៅ ៣ខែបន្ថែមទៀត រហូតដល់ដំណាច់ខែមិថុនា ឆ្នាំ២០២០នេះ ដើម្បីស្រោចស្រង់តម្លៃប្រេង បើសិនជា មេរោគកូរ៉ូណានេះ ប៉ះពាល់ខ្លាំងដល់ តម្រូវការប្រើប្រាស់ប្រេងឆៅ។
អង្គការប្រទេសនាំចេញប្រេង OPEC និងសម្ព័ន្ធមិត្ត ដែលដឹកនាំដោយប្រទេសរុស្ស៊ី បានសម្រេចកាត់បន្ថយផលិតកម្មប្រេង ៥សែនបារ៉ែលក្នុងមួយថ្ងៃ បន្ថែមលើចំនួន ១លាន ២សែនបារ៉ែល រួចម្តងទៅហើយ ដែលចាប់ផ្តើមពី ខែមករា ដល់ខែមីនា ឆ្នាំ ២០២០នេះ ដើម្បីជួយស្រោចស្រង់ដល់តម្លៃទីផ្សារប្រេង ដែលរងប៉ះពាល់ដោយ ភាពទន់ខ្សោយនៃសេដ្ឋកិច្ចសកល និងការស្តុកទុកប្រេង នៅមានលើសពីតម្រូវការទីផ្សារ។
បើតាមទិន្នន័យរបស់ វិទ្យាស្ថានប្រេងអាមេរិក បានបញ្ជាក់ឲ្យដឹងថា ស្តុកទុកប្រេងរបស់អាមេរិក បានធ្លាក់ចុះ ប្រមាណ ៤លាន ៣សែនបារ៉ែល ដែលផ្ទុយទៅនឹងការរំពឹងទុកថា នឹងមានកំណើនជិត ៥សែនបារ៉ែល ទើបធ្វើឲ្យតម្លៃប្រេង ប្រសើរឡើងវិញ។
តម្លៃប្រេងឆៅនៅលើទីផ្សារអន្តរជាតិ បានកើនឡើងបន្តិចមកវិញ ដូចជា ទីផ្សារ Brent របស់អង់គ្លេស កើនឡើងប្រមាណ ០.៣% ទៅដល់ជាង ៥៩ដុល្លារ ក្នុងមួយបារ៉ែល ខណៈទីផ្សារអាមេរិក West Texas Intermediate កើនឡើងប្រមាណ ០.៦% ទៅដល់ជាង ៥៣ដុល្លារក្នុងមួយបារ៉ែល។ ។
សូមជម្រាបថា ដោយសារតែក្តីកង្វល់ពី ការរាតត្បាតនូវ virus Corona អាចធ្វើឲ្យ តម្រូវការប្រេងធ្លាក់ចុះ ខណៈការផលិតប្រេងឆៅទូទាំងសកល នឹងផ្គត់ផ្គង់លើសពីតម្រូវ ធ្វើឲ្យតម្លៃប្រេងចុះថោក តែយ៉ាងណាក៏ដោយ គិតមកទល់ពេល ក្តីបារម្ភពី បញ្ហាមេរោគកូរ៉ូណានេះ ហាក់ធូរស្បើយបន្តិចហើយ ហើយការផ្គត់ផ្គង់ប្រេង ក៏ថយចុះ ដែលធ្វើឲ្យតម្លៃប្រេងឆៅនៅលើ ទីផ្សារអន្តរជាតិ អាចកើនឡើងវិញ។
យោងតាមប្រភពព័ត៌មានមួយចំនួនឲ្យបានដឹងថា មន្រ្តីអង្គការ OPEC បានចាប់ផ្តើមពិចារណាលើជម្រើសនានាដូចជាការពង្រីកផែនការកាត់បន្ថយផលិតកម្មប្រេងឆៅបច្ចុប្បន្នរហូតដល់យ៉ាងហោចណាស់ខែមិថុនាជាមួយនឹងលទ្ធភាពនៃការកាត់បន្ថយបន្ថែមទៀតប្រសិនបើតម្រូវការប្រេងរបស់ប្រទេសចិនរងផលប៉ះពាល់យ៉ាងខ្លាំងពីការរីករាលដាលនៃ virus Corona។
ឥឡូវនេះ OPEC + ដែលជាក្រុមប្រទេសផលិតរួមទាំងសមាជិក OPEC និងប្រទេសដទៃទៀតដូចជារុស្ស៊ីបានឈានដល់កិច្ចព្រមព្រៀងកាត់បន្ថយការផ្គត់ផ្គង់ប្រេងដើម្បីគាំទ្រដល់តម្លៃនៃ “មាសខ្មៅ”។ នៅខែធ្នូឆ្នាំ ២០១៩ ក្រុមនេះបានយល់ព្រមរក្សាផែនការកាត់បន្ថយផលិតកម្មចំនួន ១,៧ លានបារ៉ែលក្នុងមួយថ្ងៃនៅចុងខែមីនាឆ្នាំ ២០២០៕
（សរុបដោយវិច្ឆិកា）
មតិពីមិត្តអ្នកអាន