រដ្ឋមន្ត្រីការពារជាតិចិន លោក Wei Fenghe លើកឡើងថា ការដោះស្រាយបញ្ហាតៃវ៉ាន់ គឺជា ផលប្រយោជន៍ជាតិដ៏ធំធេងរបស់ប្រទេសលោក ហើយព្រមានទៀតថា គ្មានកម្លាំងណាមួយអាចរារាំងការបង្រួបបង្រួមរបស់ចិនបានឡើយ។
រដ្ឋមន្ត្រីការពារជាតិចិន Wei Fenghe ថ្លែងសុន្ទរកថានៅវេទិកាសន្តិសុខ «សៀងសាន ប៉េកាំង លើកទី ៩» នៅចន្ទ ២១ តុលា ២០១៩ ប្រភពរូប៖ Reuters
ក្នុងឱកាសបើកវេទិកាសន្តិសុខអន្តរជាតិមួយនៅឯទីក្រុងប៉េកាំង រដ្ឋមន្រ្តីការពារជាតិចិនលោក Wei Fenghe បានសង្កត់ធ្ងន់ទៀតថា សកម្មភាពប៉ុនប៉ងចង់បំបែករដ្ឋទាំងឡាយ គឺគ្មានថ្ងៃទទួលបានជោគជ័យនោះទេ។ កំឡុងវេទិកានេះកាលពីឆ្នាំមុន លោក Wei ធ្លាប់បានព្រមានថា យោធាចិននឹងចាត់វិធានការទោះក្នុងតម្លៃណាក៏ដោយ ដើម្បីទប់ស្កាត់ការព្យាយាមកាត់ផ្តាច់តៃវ៉ាន់ចេញពីចិន។ ប្រទេសភាគច្រើននៅជុំវិញពិភពលោក ព្រមទាំងចិនផ្ទាល់ គឺចាត់ទុកកោះតៃវ៉ាន់គ្រាន់តែជាខេត្តមួយរបស់ចិនប៉ុណ្ណោះ បើទោះបីជាតៃវ៉ាន់មានរដ្ឋាភិបាលដាច់ដោយឡែកក៏ដោយ។
គួរជម្រាបថា សម្រាប់វេទិកា សៀងសាន (Xianghsan) វិញ គឺជាវេទិកាសន្តិសុខអន្តរជាតិស្រដៀងគ្នា ទៅនឹងវេទិកាសន្តិសុខប្រចាំឆ្នាំ សាងគ្រីឡា (Shangri-La) ដែលរៀបចំឡើងនៅសិង្ហបុរី។ ក្នុងឆ្នាំនេះវេទិកា Xianghsan ត្រូវបានចាប់ផ្តើមបើកក្រោមប្រធានបទ «រក្សាការពារសណ្តាប់ធ្នាប់អន្តរជាតិ និងលើកកម្ពស់សន្តិភាពនៅតំបន់អាស៊ីប៉ាស៊ីហ្វិក» ជាមួយការចូលរួមពីសំណាក់ថ្នាក់ដឹក នាំវិស័យការពារជាតិ និងកិច្ចការបរទេសមកពីបណ្តាប្រទេសជាច្រើន។
សូមបញ្ជាក់ថា ភាពតានតឹងរវាងចិននិងតៃវ៉ាន់ កើនឡើងកម្តៅកាន់តែខ្លាំង នៅមុនពេលបោះឆ្នោតជ្រើសរើសថ្នាក់ដឹកនាំតៃវ៉ាន់ នាដើមឆ្នាំ២០២០ខាងមុខ។ កោះតៃវ៉ាន់បានស្តីបន្ទោសចិនចំពោះការគ្រប់គ្រងផ្តាច់ការ និងសម្រាប់ការគំរាមកំហែងដល់សន្តិភាពក្នុងតំបន់ ខណៈរដ្ឋាភិបាលក្រុងប៉េកាំងឯណោះវិញ បានដាក់សម្ពាធលើកោះតៃវ៉ាន់ ដោយប្រឡេះយកសម្ព័ន្ធមិត្តការទូតដែលនៅសេសសល់របស់ក្រុងតៃប៉ិម្តងមួយៗ។
ក្នុងសារមួយដែលលោកប្រធានរដ្ឋ Xi Jinping បានបញ្ជាក់ជាថ្មីនៅដើមឆ្នាំនេះ ចិនចាត់ទុកកោះតៃវ៉ាន់ជាទឹកដីដ៏សំខាន់របស់ខ្លួន ដែលនឹងវាយយកដាក់ក្រោមការគ្រប់គ្រងរបស់ទីក្រុងប៉េកាំងដោយបង្ខំ ប្រសិនបើចាំបាច់៕
（សរុបព័ត៌មាន ដោយ ស្រីព្រេជ）
មតិពីមិត្តអ្នកអាន