យុគសម័យ - នៅទីបំផុត នាថ្ងៃទី២៩ខែតុលា ព្រះនាងម្ចាស់ Ayako បានរៀបអាពាហ៍ពិពាហ៍ជាមួយលោក Kei Moriya ជាជនសាមញ្ញម្នាក់។ ហើយក្នុងថ្ងៃនេះ នៅឯទីសក្ការៈ Meiji Shrine ក្នុងទីក្រុងតូក្យូដែលនេះមានន័យថា ព្រះនាងបានសម្រេចចិត្តបោះបង់ចោលតំណែងជាព្រះនាង និងចាកចេញពីគ្រួសាររាជវង្សជប៉ុនទៅរស់ជាជនសាមញ្ញ ជាមួយបុរសដែលខ្លួនស្រឡាញ់។
ព្រះនាង Ayako មានព្រះជន្ម ២៨វស្សា ជាបុត្រីទី ៣ នៃបងប្អូនជីដូនមួយរបស់ព្រះចៅអធិរាជជប៉ុន Akihito គឺព្រះអង្គម្ចាស់ Takamado។ (រូបថតៈ AP)
ព្រះនាងបានសម្រេចចិត្តរៀបការជាមួយលោក Kei Moriya មានអាយុ ៣២ឆ្នាំ និងជាបុគ្គលិកក្រុមហ៊ុនដឹកជញ្ជូន Nippon Yusen។ (រូបថតៈ AP)
ថ្លែងនៅក្នុងសន្និសីទសារព័ត៌មាន បន្ទាប់ពីពិធីរៀបអាពាហ៍ពិពាហ៍ ព្រះនាងបានលើកឡើងយ៉ាងដូច្នេះថា “នាងខ្ញុំពិតជា រីករាយណាស់ដែលរៀបការជាមួយមនុស្សដែលខ្ញុំស្រឡាញ់ និងបានឃើញមនុស្សជាច្រើនចូលរួម និងអបអរសាទរដល់ពួកយើង”។ (រូបថតៈ AP)
សែរាជវង្សជប៉ុនត្រូវបានផ្ដល់សេរីភាព ឱ្យរៀបការជាមួយមនុស្សដែលខ្លួនជ្រើសរើស។ ក៏ប៉ុន្តែបើតាមទំនៀមទម្លាប់រាជវង្សជប៉ុន ព្រះនាង Ayako ត្រូវបោះបង់ចោលតំណែងជាព្រះនាង ដោយសារតែរៀបការជាមួយជនសាមញ្ញ ហើយដែលនេះ គឺជាការអនុវត្តលើស្ត្រីនៅក្នុងសែរាជវង្សជប៉ុន។ ម្យ៉ាងវិញទៀត ក្រោយចុះហត្ថលេខាលើលិខិតរៀបអាពាហ៍ពិពាហ៍ ព្រះនាងនឹងត្រូវប្ដូរឈ្មោះទៅជា Ayako Moriya វិញ។
គួរបញ្ជាក់ថា ព្រះចៅអធិរាជជប៉ុន Akihito គឺធ្លាប់ជាព្រះអង្គម្ចាស់រាជទាយាទជប៉ុនដំបូងគេបំផុត ដែលបានរៀបការជាមួយជនសាមញ្ញ នោះគឺម្ចាស់ក្សត្រីបច្ចុប្បន្ន Michiko ហើយទ្រង់ទាំងពីរបានស្គាល់គ្នា នៅពេលចូលរួមទស្សនាការប្រកួតកីឡាវាយ tennis៕
（រូបថតៈ AP., CNN, Reuters សរុបព័ត៌មានដោយស្រី ពេជ្រ）
មតិពីមិត្តអ្នកអាន