យុគ្គសម័យ - ការតម្លើងពន្ធខ្ពស់លើទំនិញរបស់ចិនបានធ្វើឱ្យសហគ្រាសជាច្រើនដែលកំពុងប្រតិបត្តិការនៅខឿនសេដ្ឋកិច្ចធំបំផុតទីពីរនៅលើពិភពលោកនេះត្រូវផ្លាស់ប្តូរទម្រង់ផលិតកម្មរបស់ខ្លួនទៅកាន់ប្រទេសវៀតណាមនិងបណ្តាប្រទេសផ្សេងៗទៀតនៅតំបន់អាស៊ី។
ប្រធានាធិបតីអាមេរិកលោក Donald Trump (រូបថត៖ baotintuc.vn)
ក្នុងបទឆ្លើយជាមួយមួយទូរទស្សន៍ Fox News កាលពីសប្តាហ៍មុន ប្រធានាធិបតីអាមេរិកលោក Donald Trump បានអះអាងថាកំរិតពន្ធខ្ពស់ដែលទីក្រុងវ៉ាស៊ីនតោនបានដាក់លើទំនិញនាំចូលពីប្រទេសចិនកំពុងធ្វើឱ្យក្រុមហ៊ុនជាច្រើនផ្លាស់ទីតាំងរោងចក្ររបស់ខ្លួនចេញពីប្រទេសចិន ដើម្បីទៅកាន់ប្រទេសវៀតណាមនិង បណ្តាប្រទេសដទៃទៀតនៅអាស៊ី ។ លោកក៏បានសង្កត់ធ្ងន់ថា រាល់កិច្ចព្រមព្រៀងពាណិជ្ជកម្មរវាងទីក្រុងវ៉ាស៊ីនតោននិងទីក្រុងប៉េកាំងមិនអាចក្លាយជាកិច្ចព្រមព្រៀងតាមបែប ៥០-៥០ នោះឡើយទេ។ ទន្ទឹមនឹងនេះដែរ ប្រព័ន្ធផ្សព្វផ្សាយរដ្ឋចិនបានរិះគន់លើសហរដ្ឋអាមេរិកចំពោះការចោទប្រកាន់ពីបទលួចកម្មសិទ្ធិបញ្ញាដោយហៅថាជា "ឧបករណ៍នយោបាយ" របស់ទីក្រុងវ៉ាស៊ីនតោនដោយប៉ុនប៉ងរារាំងការអភិវឌ្ឍសេដ្ឋកិច្ចរបស់ប្រទេសមហាអំណាចអាស៊ីនេះ។ សហរដ្ឋអាមេរិកបានលើកឡើងការចោទប្រកាន់ ពីបទ "លួចបច្ចេកវិទ្យា" របស់ប្រទេសចិន ក្នុងបរិបទដែលភាពតានតឹងពាណិជ្ជកម្មរវាងប្រទេសមហាយក្សទាំងពីរនេះនៅលើពិភពលោកកាន់តែកើនឡើងដោយមិនឈប់ឈរ។
សម្ព័ន្ធក្រុមហ៊ុនបច្ចេកវិទ្យា HuaWei
ជាក់ស្តែង នៅពាក់កណ្តាលខែឧសភាកន្លងទៅ លោក Donald Trump បានចុះហត្ថលេខាលើក្រិត្យប្រតិបត្តិមួយ ដើម្បីហាមឃាត់បណ្តាក្រុមហ៊ុនបច្ចេកវិទ្យាក្នុងស្រុកដោយមិនឱ្យទិញឬប្រើប្រាស់ឧបករណ៍បរិក្ខាបរទេស «ដែលអាចធ្វើ ឱ្យប៉ះពាល់ដល់សន្តិសុខជាតិរបស់អាមេរិក ឬសន្តិសុខនិងសុវត្ថិភាពរបស់ប្រជាជនអាមេរិកផងដែរ"។ ក្រសួងពាណិជ្ជកម្មអាមេរិកបានបញ្ចូលបន្ថែមសម្ព័ន្ធក្រុមហ៊ុនបច្ចេកវិទ្យាទូរគមនាគមន៍របស់ចិន Huawei និងសាខានៃសម្ព័ន្ធក្រុមហ៊ុននេះចំនួន ៧០ ទៅក្នុង«បញ្ជី Entity » ដើម្បីហាមឃាត់ក្រុមហ៊ុនមហាយក្សនេះប្រមូលទិញគ្រឿងបន្លាស់និងឧបករណ៍បច្ចេកវិទ្យាពីក្រុមហ៊ុនអាមេរិក ដោយគ្មានការយល់ព្រមពីរដ្ឋាភិបាលសហរដ្ឋអាមេរិកផងដែរ។រហូតមកដល់ពេលនេះសម្ព័ន្ធក្រុមហ៊ុន Huawei បានបញ្ជាក់ថាមិនបានរំលោភបំពានលើអ្វីៗដែលអាមេរិកបានចោទប្រាកាន់នៅឡើយទេ។ Huawei បានប្រកាសថារាល់"ការរឹតបន្តឹងមិនសមហេតុផល" របស់សហរដ្ឋអាមេរិកបានរំលោភលើសិទ្ធិរបស់សម្ព័ន្ធក្រុមហ៊ុននេះ៕
（យោងតាម baotintuc.vn បកប្រែដោយ ហេង វុធ្ធី）
មតិពីមិត្តអ្នកអាន