ឯកអគ្គរដ្ឋទូតថ្មីអាមេរិកប្រចាំនៅកម្ពុជារំពឹងធ្វើឲ្យទំនាក់ទំនងប្រទេសទាំងពីរកាន់តែរឹងមាំ

លោក Patrick Murphy នៅថ្ងៃដំបូងនៃការងាររបស់លោកជាឯកអគ្គរដ្ឋទូតអាមេរិកប្រចាំនៅកម្ពុជា។ (ប្រភព៖ Postkhmer)

លោក W. Patrick Murphy ត្រូវបានព្រឹទ្ធសភាសហរដ្ឋអាមេរិកបានអនុម័ត ឱ្យក្លាយជាឯកអគ្គរដ្ឋទូតវិសាមញ្ញ និងពេញសមត្ថភាពរបស់ប្រទេសខ្លួន ប្រចាំនៅកម្ពុជា កាលពីថ្ងៃទី០២ ខែសីហា ឆ្នាំ២០១៩ រួចហើយប្រធានាធិបតីលោក Trump បានបញ្ជូនការតែងតាំងនេះ ទៅព្រឹទ្ធសភា ដែលយោងតាមមាត្រា២ នៃរដ្ឋធម្មនុញ្ញរបស់សហរដ្ឋអាមេរិក មានការទទួលខុសត្រូវក្នុងការផ្តល់ «ប្រឹក្សា និងការយល់ព្រម» លើការតែងតាំងទាំងឡាយ ដោយប្រធានាធិបតី ក្នុងនោះមានឯកអគ្គរដ្ឋទូតផងដែរ។

លោក Murphy ជាអតីតឧបការីរងរដ្ឋមន្រ្តីក្រសួងការបរទេស ទទួលបន្ទុកតំបន់អាស៊ីអាគ្នេយ៍ ហើយជាសមាជិកអាជីពម្នាក់ នៅក្នុងកិច្ចការបរទេសជាន់ខ្ពស់។ កន្លងមកលោក គឺជាអនុប្រធានទូត និងជាភារធារី ប្រចាំនៃប្រទេសថៃ ពីឆ្នាំ២០១៣ ដល់ ឆ្នាំ២០១៦, នៅប្រទេស Lesotho ពីឆ្នាំ២០០៦ ដល់ ឆ្នាំ២០០៨ ហើយបានធ្វើជាតំណាងស្តីទីពិសេស និងជាអ្នកសម្របសម្រួលគោលនយោបាយ សម្រាប់ប្រទេសមីយ៉ាន់ម៉ាពីឆ្នាំ ២០១២ ដល់ឆ្នាំ ២០១៣។

លោក Murphy បានបញ្ចប់ ការសិក្សា ថ្នាក់ បរិញ្ញាបត្រ ពី ការ សាកល វិ ទ្យាល័យ Vermont រួមជាមួយសញ្ញាបត្រអនុបណ្ឌិត ពី សាកលវិទ្យាល័យ John Hopkins និងមហាវិទ្យាល័យយោធា និងបាន បម្រើ ការងារ ក្នុង វិស័យ ការទូត លើស ២៥ឆ្នាំ ហើយ លោក បាន កាន់តំណែង ជាន់ខ្ពស់ ជាច្រើន ផងដែរ ។

លោក Murphy បានថ្លែងនៅពេលមកដល់ព្រលានយន្តហោះអន្តរជាតិភ្នំពេញថា៖ «អស្ចារ្យណាស់ដែលបានត្រឡប់មកកម្ពុជាសាជាថ្មី។ ចាប់ពីពេលខ្ញុំមកដល់ទីនេះភ្លាម ខ្ញុំមានអារម្មណ៍ថាខ្ញុំត្រូវបានស្វាគមន៍យ៉ាងកក់ក្ដៅ ហើយខ្ញុំទន្ទឹងរង់ចាំការពង្រឹងទំនាក់ទំនងអាមេរិក និងកម្ពុជា»។

លោកស្រី Emily Zeeberg អ្នកនាំពាក្យស្ថានទូតអាមេរិកប្រចាំកម្ពុជាបានថ្លែងតាមអ៊ីមែលកាលពីម្សិលមិញថា លោកឯកអគ្គរដ្ឋទូត Murphy បានចាប់ផ្ដើមប្រជុំជាច្រើននៅឯស្ថានទូតសហរដ្ឋអាមេរិកដោយជួបជាមួយបុគ្គលិកជនជាតិខ្មែរ និងអាមេរិកដ៏ល្អៗទាំងអស់។

លោក Patrick Murphy ថ្វាយបង្គំព្រះសង្ឃ។ (ប្រភព៖ FN)

លោកស្រីថ្លែងបន្តថា៖ «អាទិភាពរបស់លោកឯកអគ្គរដ្ឋទូតរួមមានការពង្រឹងទំនាក់ទំនងអាមេរិក-កម្ពុជា និងគាំទ្រដល់ប្រជាជនកម្ពុជា។ លោកឯកអគ្គរដ្ឋទូត Murphy ទន្ទឹងរង់ចាំបង្ហាញសារតាំងរបស់លោកនាពេលឆាប់ៗនេះ ហើយមានការទំនាក់ទំនងជាមួយអាជ្ញាធររដ្ឋាភិបាល សង្គមស៊ីវិល និងអ្នកពាក់ព័ន្ធផ្សេងទៀតនៅកម្ពុជា»។

យោងតាមសារនៅលើបណ្ដាញ Twitter លោក Murphy បានស្បថចូលកាន់តំណែងកាលពីថ្ងៃចន្ទក្រោមអធិបតីភាពលោក David Hale អនុរដ្ឋលេខាធិការផ្នែកកិច្ចការនយោបាយនៃក្រសួងការបរទេសអាមេរិក។

កាលពីថ្ងៃសុក្រសប្ដាហ៍មុនលោកបានបង្ហោះសារស្វាគមន៍ដោយបញ្ជាក់ថា លោកបានធ្វើដំណើរមកកម្ពុជាច្រើនដងរួចមកហើយ។ ក្នុងដំណើរលើកនេះ លោកនឹងប្ដេជ្ញាពង្រឹងទំនាក់ទំនង និងសហប្រតិបត្តិការនៃប្រទេសទាំង ២ លើការអភិវឌ្ឍ ពាណិជ្ជកម្ម សុខភាពសាធារណៈ ការអនុវត្តច្បាប់ ការថែរក្សាវប្បធម៌ និងការផ្លាស់ប្ដូររវាងមនុស្ស និងមនុស្ស។

លោកបានថ្លែងនៅពេលនោះថា៖ «ខ្ញុំប្ដេជ្ញាជួយឲ្យប្រទេសយើងទាំង ២ ពង្រឹងទំនាក់ទំនងលើបញ្ហាទាំងនេះ និងទំនាក់ទំនងផ្សេងទៀត ហើយនិងគាំទ្រដល់កម្ពុជាមួយដែលមាន ឯករាជ្យ វឌ្ឍនភាព និងប្រជាធិបតេយ្យ»។

លោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងកាលពីម្សិលមិញថា លោក Murphy ទើបតែមកដល់ហើយលោកមិនទាន់បង្ហាញសារតាំងនៅឡើយ។

ទោះយ៉ាងណាលោកថ្លែងថា៖ «ក្ដីរំពឹងរបស់យើងគឺថា គាត់ជាអ្នកការទូតប្រកបដោយវិជ្ជាជីវៈ គាត់មានភារកិច្ចពង្រឹងទំនាក់ទំនង និងសហប្រតិបត្តិការល្អរវាងប្រទេសទាំង ២។ ខ្ញុំមិនអាចអត្ថាធិប្បាយច្រើនជាងនេះទេដោយសារតែគាត់មិនទាន់បានបង្ហាញសារតាំងទៅព្រះមហាក្សត្រ»។ លោកបន្តថា ក្រសួងការបរទេសជាអ្នករៀបចំកិច្ចការបង្ហាញសារតាំងនេះ។

លោក សុខ ទូច ប្រធានរាជបណ្ឌិត្យសភាកម្ពុជាបានថ្លែងថា វាលឿនពេកសម្រាប់លោកក្នុងការបញ្ចេញមតិអំពីលោក Murphy ដោយសារលោកមិនទាន់មានសកម្មភាពអ្វីនៅឡើយ។

លោក ឡៅ ម៉ុងហៃ អ្នកវិភាគនយោបាយបានថ្លែងកាលពីម្សិលមិញថា សហរដ្ឋអាមេរិកថ្មីៗនេះបានបញ្ចេញសំឡេងក្នុងការទាមទារឲ្យមានការកែប្រែស្ថានការណ៍នៅកម្ពុជា និងកែប្រែទំនាក់ទំនងរវាងកម្ពុជានឹងចិន។

លោកបានថ្លែងថា៖ «ទោះយ៉ាងណាឯកអគ្គរដ្ឋទូតថ្មីរបស់អាមេរិកដែលជាអ្នកការទូតមានបទពិសោធច្រើន ប្រហែលជាមិនទទួលបានផ្លែផ្កាច្រើនទេ ប្រសិនបើអាមេរិកមិនត្រៀមខ្លួនប្រើការទូតបែបបង្ខិតបង្ខំ ហើយមិនទទួលបានជោគជ័យក្នុងការធ្វើឲ្យចិន បន្ធូរចំណងដ៏តឹងរបស់ខ្លួនមកលើលោកនាយករដ្ឋមន្ត្រី ហ៊ុន សែន»៕

（សរុបដោយវិច្ឆិកា）

（សរុបដោយវិច្ឆិកា）