ទឹកធ្លាក់វាលពួច គឺជាផ្នែកមួយនៃឧទ្យានជាតិព្រះមុនីវង្សបូកគោ ស្ថិតក្នុងស្រុកទឹកឈូ ខេត្តកំពត។ ដើម្បីឡើងទៅកាន់ទីស្ថានធម្មជាតិនេះ យើងត្រូវធ្វើដំណើរចេញពីទីរួមខេត្តកំពត ប្រមាណ ៨គីឡូម៉ែត្រ តាមផ្លូវជាតិលេខ៣ ឆ្ពោះទៅកាន់វត្តវាលពួច ដែលស្ថិតនៅក្បែរជើងភ្នំបូកគោ។
ទឹកធ្លាក់វាលពួច
ធ្វើដំណើរដោយថ្មើជើង ចេញពីវត្តវាលពួច កាត់ព្រៃប្រមាណ ៣០នាទី អ្នកទេសចរនឹងប្រទះទឹកធ្លាក់មួយកន្លែង ដែលស្ថិតនៅខាងស្ដាំដៃ រំលេចដោយទឹកពណ៌ថ្លាខៀវ គួរជាទីគាប់ភ្នែក។ សម្រស់ទឹកនៅដំណាក់នេះ បានអង្រួនអារម្មណ៍អ្នកទេសចរគ្រប់គ្នា ឲ្យចុះងូតលេងកម្សាន្តយ៉ាងសប្បាយរីករាយ ជាមួយទឹកដ៏ត្រជាក់ ដែលមានប្រភពចេញពីកំពូលភ្នំបូកគោ។
ស្ថិតនៅក្នុងភូមិទ្វីខាងជើង ឃុំអណ្ដូងខ្មែរ ស្រុកកំពត ខេត្ដកំពត ចូលតាមច្រកវត្ដព្រះពុទ្ធជយមង្គលារាម ហៅវាលពួច ដោយឆ្លងកាត់ផ្នូរខ្មោចចោរ ចម្ងាយប្រមាណជាង ១ គីឡូម៉ែត្រពីរង្វង់មូលរលកក្នុងក្រុងកំពត ទឹកធ្លាក់វាលពួច ទីប្រជុំទឹកធ្លាក់ធម្មជាតិច្រើនកន្លែងលាក់ខ្លួនដ៏ស្ងប់ស្ងាត់ស្វាគមន៍ភ្ញៀវនិយមផ្សងព្រេងពិតៗ។
ទឹកធ្លាក់វាលពួច
ពីច្រកចូលប្រមាណ ១ គីឡូម៉ែត្រ លោកអ្នកនឹងទៅដល់អារាមវាលពួចដែលសម្បូររូបចម្លាក់សត្វនៃឆ្នាំទាំង ១២ រូបលោកយាយសំពៅ៥ និងរូបលោកតាឥសី ព្រមទាំងព្រះវិហារថ្មីសន្លាងសង់ពីដែក និងស័ង្កសី។ ដោយធ្វើដំណើរឆ្ពោះទៅកាន់ភ្នំប្រមាណ ១ គីឡូម៉ែត្រទៀត ផ្ទះប្រជាពលរដ្ឋមួយខ្នងឈរនៅកណ្ដាលផ្លូវឡើងទៅទីឋានទឹកធ្លាក់ដ៏កណ្ដោចកណ្ដែងជាអាហារដ្ឋានលក់ម្ហូបសាច់ចិញ្ចឹមក្បែរផ្ទះតាមការកុម្ម៉ង់។
ទឹកធ្លាក់វាលពួច
គ្រងឈុតខោអាវវែងក្រាស់ៗ និងស្បែកជើងកវែងត្រឹមកំភួនជើង លោក នុន វ័យជាង៤០ឆ្នាំ ជាមគ្គុទេសក៍ព្រៃក្រៅផ្លូវការ តែងតែនាំភ្ញៀវទេសចរ ជាពិសស ភ្ញៀវបរទេសធ្វើដំណើរឡើងភ្នំញឹកញាប់ ដោយសារតែភ្ញៀវទាំងអស់ត្រូវឆ្លងកាត់ផ្ទះរបស់លោក ដែលពួកគេមិនអាចរកទីឋានទឹកធ្លាក់ឃើញឡើយ។ លើដំណើរផ្លូវថ្នើរជើងឡោមព័ទ្ធដោយរុក្ខជាតិតូចធំស្ទើរជុំជិត ភ្ញៀវទេសចរត្រូវមានការប្រុងប្រយ័ត្នខ្ពស់ចំពោះសត្វអាសិរពិសគ្រប់ប្រភេទដែលនៅលាក់បំបាំងខ្លួនតាមមែកឈើ និងស្លឹកឈើ។
ទឹកធ្លាក់វាលពួច
ដៃម្ខាងកាន់កាំបិតខ្វែវសម្រាប់ត្រួសត្រាយផ្លូវដើរមុខ និងដៃម្ខាងទៀតកាន់ភេសជ្ជៈមួយស្បោងសម្រាប់លក់ជូនភ្ញៀវស្រេកទឹក លោក នុន បានឲ្យដឹងថា៖ «ភាគច្រើនជាភ្ញៀវជនជាតិបរទេស ដែលពួកគេដើរឡើងភ្នំដោយខ្វះការប្រុងប្រយ័ត្នណាស់។ វាមិនធ្លាប់មានរឿងអ្វីកើតឡើងទេ ប៉ុន្ដែយើងគួរតែរវៀសភ្នែក»។ ដើរត្បុលឡើងភ្នំតាមព្រៃរបោះ ប្រមាណ ៣០ នាទី ស្រាប់តែទៅដល់ទឹកធ្លាក់មួយកន្លែងដែល លោក នុន អះអាងថាជាទឹកធ្លាក់ដំណាក់ទីពីរ។ ស្ថិតនៅកម្ពស់ប្រមាណ ២០ ម៉ែត្រ និងមុខកាត់ជាងមួយម៉ែត្រសម្រាប់រដូវប្រាំង ទឹកធ្លាក់ល្បាក់ទីពីរហូរធ្លាក់លើថ្លុកទឹកប្រមាណជា ៥ គុណ ១០ ម៉ែត្រ សមល្មមសម្រាប់ការងូតទឹកលេងកម្សាន្ដ។
ទឹកធ្លាក់វាលពួច
បើទោះបីជាដុំសិលាតូចធំពង្រាយខ្លួនរាយប៉ាយតាមខ្នងភ្នំរហូតដល់បាតទឹកធ្លាក់ច្រើនសន្ធឹកយ៉ាងណាក៏ដោយ ក៏ប្រអប់ថ្មផ្ដុំពីថ្មភ្នំ និងផ្សារភ្ជាប់ដោយស៊ីម៉ងត៍ដែលរួមរឹតដោយឫសរុក្ខជាតិអស់កាលជា យូរអង្វែង មិនមែនជាសកម្មភាពរបស់ធម្មជាតិឡើយ ក្រោយបញ្ចប់ការងូតទឹកដ៏ត្រជាក់ស្រេង មគ្គុទ្ទេសក៍ព្រៃរូបនេះបាន បន្ដបង្ហាញផ្លូវចុះមកកាន់ទឹកធ្លាក់ដំណាក់ទីមួយទៅតាមផ្លូវបត់បែន និងផ្លូវកាត់ទៅកាន់ភ្នំបូកគោ។ ដំណើរចុះ និងឡើងចម្ងាយប្រហែល ៣០០ ម៉ែត្រពីទឹកធ្លាក់ទីពីរ ទឹកធ្លាក់កម្ពស់ ៥០ ម៉ែត្រកំពុងរង់ចាំស្វាគមន៍ភ្ញៀវគ្រប់ពេលវេលា។ ទឹកហូរប៉ុនមួយទុយោធំធ្លាក់លើថ្ម គ្មានថ្លុកទឹកទ្រ ជាទស្សនីយភាពហាក់កណ្ដោចកណ្ដែងនារដូវប្រាំង។
ទឹកធ្លាក់មួយកន្លែងទៀតហូរធ្លាក់គ្មានដក់ទឹក។
ពេលថតរូបអនុស្សាវរីយ៍ជាមួយទឹកធ្លាក់ដ៏ខ្ពស់នេះ សូមកុំភ្លេចផ្ដិតយករូបភាពឯនាយឆ្វេងដៃជាមួយរុក្ខជាតិលើជ្រលងដែលចាក់ឫសប្រមាណ ៤០ ម៉ែត្រធ្លាក់ដល់បាតជ្រោះដ៏គួរឲ្យតោងលេង។ នៅមិនទាន់អស់សម្រាប់អ្នកចូលចិត្ដដំណើរផ្សងព្រេងឡើយ លោក នុន បានបន្ថែមថា បើភ្ញៀវមិននឿយហត់ក្នុងការដើរបន្ដ ពួកគេគួរតែចំណាយប្រមាណ ១ ម៉ោងទៀតទៅរុករកទីឋាន ទឹកធ្លាក់ជាច្រើននៅផ្នែកខាងលើ៕
(សរុបដោយ ហេង វុធ្ធ)
(ប្រភពព័ត៌មាន: postkhmer និង news.sabay.com.kh)
មតិពីមិត្តអ្នកអាន