ក្រសួងទេសចរណ៍គ្រោងរៀបចំពិធីបុណ្យសមុទ្រនៅខេត្តព្រះសីហនុនៅចុងឆ្នាំ ២០២០ នេះ ប្រសិនបើស្ថានភាពជំងឺកូវីដ ១៩ បានធូរស្រាល ខណៈក្រសួងកំពុងធ្វើយុទ្ធនាការដើម្បីពង្រឹងវិស័យទេសចរណ៍ឱ្យកាន់តែសុវត្ថិភាព និងមានសេវាកម្មកាន់តែល្អដើម្បីទាក់ទាញភ្ញៀវទេសចរបរទេសឡើងវិញ។
សកម្មភាពពលរដ្ឋកម្សាន្តនៅសមុទ្រខេត្តព្រះសីហនុដើមឆ្នាំនេះ។
កាលពីថ្ងៃទី ១៦ មិថុនា លោក ថោង ខុន រដ្ឋមន្ត្រីក្រសួងទេសចរណ៍ និងលោក គួច ចំរើន អភិបាលខេត្តព្រះសីហនុបានដឹកនាំកិច្ចប្រជុំជាមួយមន្ត្រីពាក់ព័ន្ធនានានៅសាលាខេត្តព្រះសីហនុ និងបានចុះពិនិត្យទីតាំងជាក់ស្ដែងមួយចំនួនដើម្បីដាក់ផែនការត្រៀមរៀបចំពិធីបុណ្យសមុទ្រនៅចុងឆ្នាំ ២០២០ នេះ។
លោក ថោង ខុន ថា៖ «ក្នុងករណីដែលសភាពការណ៍កូវីដបានធូរស្រាល ហើយរដ្ឋាភិបាលអនុញ្ញាត ក្រសួងទេសចរណ៍គ្រោងកំណត់យកការរៀបចំពិធីបុណ្យសមុទ្រលើកទី ៩ នៅខេត្តព្រះសីហនុនាចុងឆ្នាំនេះ ជាយុទ្ធនាការពង្រឹងគុណភាពសេវាកម្មទេសចរណ៍ និងធានាបានសុវត្ថិភាពទេសចរណ៍ដើម្បីផ្សព្វផ្សាយទៅកាន់ទីផ្សារទេសចរណ៍អន្តរជាតិថា កម្ពុជានៅតែជាគោលដៅទេសចរណ៍មានសុវត្ថិភាព និងមានគុណភាពសេវាកម្មទេសចរណ៍ល្អប្រសើរជាងមុន»។
លោក តុប សុភ័ក មន្ត្រីនាំពាក្យក្រសួងទេសចរណ៍បានឲ្យដឹងថា រដ្ឋាភិបាលបានអនុញ្ញាតគោលការណ៍ឱ្យរៀបចំពិធីបុណ្យសមុទ្ររួចហើយនៅក្នុងអំឡុងខែធ្នូ ប៉ុន្តែកាលបរិច្ឆេទជាក់លាក់មិនទាន់សម្រេចជាផ្លូវការនៅឡើយ។
លោកថ្លែងថា៖ «ជាទូទៅពិធីបុណ្យហ្នឹងគឺយើងធ្វើនៅចុងឆ្នាំ ប៉ុន្តែសម្រាប់ឆ្នាំនេះ រដ្ឋាភិបាលបានសម្រេចជាគោលការណ៍ឱ្យធ្វើ ប៉ុន្តែមិនទាន់សម្រេចជាកាលបរិច្ឆេទជាក់លាក់នៅឡើយទេ»។
លោក ឃាង ភារម្យ មន្ត្រីនាំពាក្យសាលាខេត្តព្រះសីហនុបានឲ្យដឹងដែរថា កម្មវិធីបុណ្យសមុទ្រដែលមានរៀបចំកម្មវិធីកម្សាន្ត និងការតាំងពិព័រណ៍គឺនឹងធ្វើឡើងនៅរង្វង់មូលព្រះថោងនាងនាគស្ថិតក្នុងភូមិគគីរ ឃុំបិតត្រាំង ស្រុកព្រៃនប់ ខណៈតំបន់ឆ្នេរសមុទ្រសាធារណៈប្រវែងជាង ៩ គីឡូម៉ែត្រនឹងទុកជាតំបន់ទំនេរ ដើម្បីឱ្យពលរដ្ឋធ្វើដំណើរចេញពីកន្លែងរៀបចំពិធីបុណ្យសមុទ្រមកលេងកម្សាន្តលើឆ្នេរទាំងអស់។
លោកថ្លែងថា៖ «ប៉ុន្តែនៅលើឆ្នេរទាំងហ្នឹង យើងក៏អាចរៀបចំឱ្យមានព្រឹត្តិការណ៍កម្សាន្តផ្សេងៗទៀត ដោយសារឥឡូវយើងរង់ចាំគណៈកម្មការថ្នាក់ជាតិ និងថ្នាក់ខេត្តធ្វើការរួមគ្នា ដើម្បីរៀបចំប្លង់នៅលើឆ្នេរហ្នឹងហើយយើងនឹងអាចផ្សាយឱ្យបានទូលាយ»។
នៅក្នុងកិច្ចប្រជុំកាលពីថ្ងៃទី ១៦ មិថុនា លោក ថោង ខុន ក៏បានស្នើឱ្យខេត្តព្រះសីហនុ និងមន្ទីរទេសចរណ៍ខេត្តរៀបចំសាងសង់បង្គន់អនាម័យសាធារណៈឱ្យបានច្រើនតាមស្ដង់ដា និងការកែលម្អសេវាផ្សេងៗដើម្បីឱ្យអ្នកទេសចរកាន់តែងាយស្រួលទទួលបានព័ត៌មាន និងគោលដៅទេសចរណ៍។
កាលពីថ្ងៃទី ៩ មិថុនាកន្លងទៅលោក គួច ចំរើន អភិបាលខេត្តព្រះសីហនុបានឲ្យដឹងថា ខេត្តបានរៀបចំត្រៀមសាងសង់បង្គន់អនាម័យសាធារណៈឱ្យបានជាង ២០ កន្លែងដែលក្នុង ១ កន្លែងអាចមានបន្ទប់ទឹកចាប់ពី ១០ ទៅ ២០ បន្ទប់ ហើយបន្ទប់ខ្លះសម្រាប់ប្រើទឹកសាបលាងជម្រះខ្លួន និងអាចបង្កើតម៉ាតលក់គ្រឿងភេសជ្ជៈ និងឧបករណ៍ហែលទឹកដែរ។
លោកថ្លែងថា៖ «ជាបឋមនៅពេលកំពុងធ្វើផ្លូវបេតុងគឺបានសម្រេចបង្កប់ឱ្យហើយជាស្រេចថា ថ្ងៃក្រោយបើយើងកសាងបន្ទប់ទឹកសាធារណៈទៅគឺទឹកបង្គន់ទាំងនោះ យើងមិនអនុញ្ញាតឱ្យហូរចូលសមុទ្រទេ។ ដោយសារទាក់ទងនីតិវិធីហិរញ្ញវត្ថុយើងមិនអាចគិតឥឡូវហើយធ្វើឥឡូវបានទេ។ អ៊ីចឹងត្រូវរៀបចំផែនការចំណាយនៅក្នុងហិរញ្ញវត្ថុរបស់យើង។ អ៊ីចឹងនៅចំពោះមុខនេះ យើងធ្វើបានត្រឹមដាក់លូសិន»។
លោកថ្លែងទៀតថា៖ «ក្រុមបច្ចេកទេសរបស់យើងកំពុងតែធ្វើឌីហ្សាញ ហើយឆ្នេរខ្លះដែលមានទំហំធំ គឺអាចបង្កើតឱ្យមានចំណតរថយន្តដែលចតរថយន្តចាប់ពី ២០ ទៅ ៣០ រថយន្តទៅតាមឆ្នេរដោយមិនធ្វើឲ្យប៉ះពាល់ការធ្វើដំណើររបស់ពលរដ្ឋទេ»។
លោក ឃាង ភារម្យ បញ្ជាក់ដែរថា បង្គន់ទាំងនោះនឹងត្រូវសង់ឱ្យបានឆាប់តាមដែលអាចធ្វើទៅបាន ប៉ុន្តែលោកថាលោក គួច ចំរើន កំពុងដឹកនាំក្រុមការងារជំនាញដើម្បីសិក្សាអំពីការសាងសង់បង្គន់ទាំងនោះ និងមិនទាន់បានកំណត់អំពីថវិកាត្រូវចំណាយ ហើយបច្ចុប្បន្នខេត្តក៏ពុំទាន់មានថវិកានោះទេ។
លោកថ្លែងថា៖ «ក្រុមការងារកំពុងសិក្សាហើយពេលយើងសិក្សាចប់ ទើបយើងដឹងថា បន្ទប់ទឹក ១ ហ្នឹង ចំណាយអស់ថវិកាប៉ុន្មាន រយៈពេលសាងសង់ប៉ុន្មានហើយប្រភពថវិកាយកមកពីណា ទាំងអស់ហ្នឹងគឺយើងកំណត់នៅក្នុងការសិក្សាហ្នឹង»។
ខេត្តព្រះសីហនុកំពុងស្ថាបនាផ្លូវអាទិភាព ៣៤ ខ្សែមានប្រវែង ៨២ ៥០៥ ម៉ែត្រ ដែលត្រូវចែកចេញជា ៣ ប្រភេទ រួមមាន មហាវិថី វិថី និងអនុវិថី ដោយផ្ដោតលើគុណភាពភាពធន់នឹងអាកាសធាតុ និងផ្ដល់លើផ្លូវថ្មើរជើង ផ្លូវជិះកង់ ...ខណៈរដ្ឋាភិបាលនឹងប្រែក្លាយក្រុងព្រះសីហនុជាតំបន់ប៉ូលអភិវឌ្ឍន៍មួយដ៏សំខាន់ និងជាទីក្រុងឆ្លាតវៃនាពេលខាងមុខ៕
（ប្រភពព័ត៌មាន: postkhmer.com）
មតិពីមិត្តអ្នកអាន