លោកថោង ខុន រដ្ឋមន្ត្រីក្រសួងទេសចរណ៍ បានជួបពិភាក្សាជាមួយលោក Philippe Sternmetz នាយកទីភ្នាក់ងារអភិវឌ្ឍន៍បារាំងប្រចាំកម្ពុជា នៅទីស្ដីការក្រសួងទេសចរណ៍ នារសៀលថ្ងៃទី៣១ ខែកក្កដា ឆ្នាំ២០១៩ អំពី ការសិក្សាលទ្ធភាព នៃគម្រោង«ទីក្រុងប្រកបដោយបរិយាប័ន្ន»។
ទីក្រុងកំពត បាត់ដំបងនិងក្រចេះត្រូវអភិវឌ្ឍ ឲ្យក្លាយជាគោលដៅទេសចរណ៍ទាក់ទាញទី២ (រូបថត៖ vayofm.com)
ក្នុងជំនួបនោះ មានការប្តេជ្ញាចិត្តរួមគ្នា នៅក្នុងការជំរុញការអនុវត្តគម្រោង «ទីក្រុងប្រកបដោយបរិយាប័ន្ន» សម្រាប់ទីក្រុងនៅក្នុងខេត្តចំនួន៣ រួមមាន ខេត្តកំពត ខេត្តបាត់ដំបង និងខេត្តក្រចេះ ជាគោលដៅទេសចរណ៍ដ៏ទាក់ទាញទី២។ ជាគោលដៅទេសចរណ៍ដ៏ទាក់ទាញទី២ បន្ទាប់ពីគោលដៅទេសចរណ៍ធំៗរបស់កម្ពុជា មានដូចជា សៀមរាប-អង្គរ រាជធានីភ្នំពេញ និងតំបន់ឆ្នេរសមុទ្រ។
លោករដ្ឋមន្ត្រីថោង ខុន និងប្រធានគណៈប្រតិភូ បានវាយតម្លៃចំពោះកិច្ចសហប្រតិបត្តិការរវាងក្រសួងទេសចរណ៍ និងទីភ្នាក់ងារអភិវឌ្ឍន៍បារាំង នាពេលកន្លងមក។ ភាគីទាំងពីរបានប្តេជ្ញារួមគ្នា បន្តពង្រឹងកិច្ចសហប្រតិបត្តិការឲ្យរឹតតែខ្លាំងថែមទៀត ដើម្បីអភិវឌ្ឍន៍វិស័យទេសចរណ៍ឲ្យកាន់តែល្អប្រសើរ និងដើម្បីបន្តដើរតួនាទីកាន់តែសំខាន់ ក្នុងការរួមចំណែកជំរុញកំណើនសេដ្ឋកិច្ចកម្ពុជា ប្រកបដោយចីរភាព និងបរិយាប័ន្ន។ ជាពិសេស ដើម្បីជំរុញកំណើនភ្ញៀវទេសចរជាតិ-អន្តរជាតិកាន់តែច្រើនឡើង៕
（ប្រភព៖ vayofm.com សរុបដោយ ហេង វុធ្ធី）
មតិពីមិត្តអ្នកអាន