អាជ្ញាធរ មន្ត្រីរាជការ ជាមួយប្រជាពលរដ្ឋ ក្នុងខេត្តបាត់ដំបង រួមគ្នាដង្ហែពានរង្វាន់ជ័យលាភី ក្រុងទេសចរណ៍ស្អាតអាស៊ាន បំផុសគំនិតដល់អ្នកជំនាន់ ក្រោយ អោយស្រឡាញ់បរិស្ថាន មូលដ្ឋានល្អ ទីក្រុងស្អាត។
 |
ក្នុងពិធីនៅថ្ងៃទី ២៣ ខែមករា ឆ្នាំ២០២២ នេះ លោក សុខ លូ អភិបាលខេត្តបាត់ដំបង បានលើកឡើងថាៈ ផ្តើមចេញពីភាពជោគជ័យ ដែលទទួលបាន នាពេលនេះ វាជាមោទនភាព របស់ខេត្តបាត់ដំបង និងរបស់ប្រជាជន ទូទាំងខេត្តបាត់ដំបងទាំងមូល ពានរង្វាន់នេះ គឺជារបស់យើងទាំងអស់គ្នា ដូចនេះ យើងត្រូវរួមគ្នា ដើម្បីរក្សាតំណែង ជ័យលាភី ពានរង្វាន់ខាងលើ ធ្វើយ៉ាងណាឱ្យទីក្រុងយើង មានសោភ័ណភាព ភាពស្រស់ស្អាត បរិស្ថានល្អ ទុកជាគំរូ និងបង្ហាញដល់កូនចៅ អ្នកបន្តវេនក្រោយៗទៀត។
តាមរយៈមន្ទីរទេសចរណ៍ខេត្ត នៅថ្ងៃទី១ – ២ ខែមករា ឆ្នាំ២០២២ កន្លងមក គណៈកម្មាធិការជាតិ វាយតម្លៃទីក្រុងស្អាត បានចុះមកវាយតម្លៃ ក្រុងបាត់ដំបង លើវិញ្ញាសាប្រឡងប្រណាំង ទីក្រុងស្អាតកម្ពុជា លើកទី៣ ដូចនេះ យើងត្រូវបន្តរួមគ្នា ដើម្បីក្រុងបាត់ដំបង រក្សាអោយបាននូវជ័យលាភី ទីក្រុងស្អាតផ្ការំដួល ៣ ទង ជាលើកទី៣បន្ត។
 |
ជាមួយគ្នានេះ លោក សុខ លូ បានអំពាវនាវដល់ គ្រប់ភាគីពាក់ព័ន្ធ ពិសេសបងប្អូន ប្រជាពលរដ្ឋ រស់នៅក្នុងខេត្តបាត់ដំបង ត្រូវរួមគ្នាបន្ថែមទៀត រក្សានូវអនាម័យ លើកកម្ពស់ បរិស្ថានក្នុងសហគមន៍ ទីក្រុង ក៏ដូចជា ខេត្តរបស់យើងទាំងមូល ចូលរួមជាមួយអាជ្ញាធរក្រុង ខេត្ត ដោះស្រាយបញ្ហាសណ្តាប់ធ្នាប់ តាមទីផ្សារ ឬទីសាធារណៈនានា ចូលរួមរៀបចំ សោភ័ណភាពលំនៅដ្ឋាន ក្នុងក្រុងអោយស័ក្តិសមជាទីក្រុង បេតិកភណ្ឌវប្បធម៌ ប្រវត្តិសាស្ត្រ និងទីក្រុងទេសចរណ៍ ប្រកបដោយភាពវៃឆ្លាត ទន្ទឹមនេះ ក៏ចាំបាច់ត្រូវរួមគ្នា រក្សាដីចំណីផ្លូវ តាមមុខផ្ទះ សម្រាប់ជាផ្លូវថ្មើរជើង រួមទាំងដោះស្រាយសំណង់បណ្ដោះអាសន្នទាំងអស់ នៅតាមទីតាំងដីសាធារណៈរបស់រដ្ឋ ដូចជា ចំណីស្ទឹង ប្រឡាយរំដោះទឹក ចិញ្ចើមផ្លូវជាដើម លើសពីនេះ គ្រប់ៗគ្នា គប្បីពង្រឹងការដុះដើមឈើ តាមបណ្តាផ្លូវនានាក្នុងក្រុង ឬទីប្រជុំជន ឲ្យកាន់តែមានភាពស្រស់បំព្រង ស្រូបយកភ្ញៀវទេសចរជាតិ អន្តរជាតិ ឱកាន់តែច្រើន ថែមទៀត៕
rasmeinews.com/Thmeythmey
មតិពីមិត្តអ្នកអាន